Փաստ ինֆո

Երեւանի ավագանու «Լույս» խմբակցության ղեկավար Դավիթ Խաժակյանը «Փաստինֆո»-ի հետ զրույցում մանրամասներ է ներկայացրել նախկին փոխվարչապետ, ՔՊ վարչության անդամ Տիգրան Ավինյանի հետ մայրաքաղաքի ավագանում խմբակցությունների հանդիպման մասին։

Խաժակյանն ասաց, որ Ավինյանը իրենց հետ հանդիպել է որպես քաղաքապետի տեղակալի թեկնածու եւ ներկայացրել է իր անելիքներն ու ոլորտները, պատասխանել խմբակցության հարցերին։

Նկատենք, որ Ավինյանը իշխող ուժի քաղաքապետի թեկնածուն է։ Թեեւ ընտըական տարին դեռ չի մեկնարկել եւ Երեւանի քաղաքապետի ընտրություններ նշանակված չեն, Ավինյանը շտապել է հայտնել այդ մասին։ Ավելին, նա այդ մասին հայտնել է «Սուրմալու» առեւտի կենտրոնի մոխիրների վրա, երբ դեռ փրկարարները որոնողական աշխատանքներ էին իրականացնում, փլատակների տակից դիակներ հանում՝ նշելով, որ «Սուրմալու»-ի տարածք է եկել որպես ՔՊ վարչության անդամ ու Երևանի քաղաքապետի ապագա թեկնածու։ Իսկ մամուլը տեւական ժամանակ է՝ գրում է, որ Երեւանի քաղաքապետարանում կադրային հարցերը որոշում է քաղաքապետարանում որեւէ կարգավիճակ չունեցող Ավինյանը։

Խաժակյանից հետաքրքրվեցինք, թե ի՞նչ խնդիր է լուծում իշխող ուժը Ավինյանին քաղաքապետարան բերելով, արդյո՞ք ֆալշ ստարտ չի հայտարարել։ Ըստ Խաժակյանի, այս պահին Երեւանի քաղաքապետի տեղակալի թեկնածուի հարցը գտնվում է իշխանության տիրույթում։ «Մնացածը, թե ինչ է որոշել իշխող ուժը, ես չեմ կարող ասել։ Ավագանին պետք է քվեարկի ցանկացած քաղաքապետի տեղակալի առաջադրման համար եւ դրան ընդառաջ, կարծես թե, ծանոթագրական հանդիպում էր։ Կա որոշում իշխող ուժի կողմից իրեն ներկայացնելու որպես քաղաքապետի տեղակալ, այն հաստիքի վրա, որը կա, որն ավելացվել է ԱԺ-ի կողմից շատ ավելի վաղ ժամանակահատվածում։ Օրենքով սահմանված ավագանու պարտավորությունն է՝ քաղաքապետի ներկայացմամբ առաջադրված քաղաքապետի տեղակալի համար քվեարկելը»,-ասաց Դավիթ Խաժակյանը։

Ավագանու «Լույս» խմբակցության ղեկավար Դավիթ Խաժակյանը չի կարծում թե իրականությանը համապատասխանում են մամուլի դիտարկումներն այն մասին, թե Երեւանի քաղաքապետի պաշտոնից Հայկ Մարությանին հեռացնելուց հետո իրական քաղաքապետը Հրաչյա Սարգսյանը չէ եւ Ավինյանը ազդեցություն ունի որոշումների կայացման գործում։ «Դրանք խիստ չափազանցված են եւ, կարծում եմ, իրականությանը չեն համապատասխանում։ Այո, կադրային հարցերում իշխող կուսակցության կադրերը ներկայացվում են եւ նշանակվում, բայց դա չի նշանակում, որ Հրաչյա Սարգսյանի կողմից քաղաքապետի գործառույթները չեն իրականացվում։ Ե՛վ բովանդակային, ե՛ւ մնացած բոլոր իմաստներով կայացվում են իր կողմից։ Ավելին ասեմ, թաղապետերի թեկնածուները Մարությանի պաշտոնավարման վերջին մեկ տարվա ընթացքում եւս իր կողմից չեն նշանակվել, իրականացվել են իշխող ուժի կողմից, բայց Մարությանի մասին ոչ ոք չէր ասում, որ ինքը չի իրական քաղաքապետը, այլ մեկ ուրիշ անձ է»։

Այս միջամտութունը Խաժակյանը քաղաքական իմաստով նորմալ է համարում ՝ նշելով, որ համայնքային իշխանությունը վերապահված է ոչ թե քաղաքապետի անձին, այլ իշխող ուժին, ինչը համամասնական ընտրակարգի թիվ մեկ բաղադրիչն է, նրա խոսքով։

«Դա չի նշանակում, որ կուսակցական դիրքորոշումները պետք է քաղաքի շահերից վեր դասվեն, բայց այլ կերպ որեւէ երկրում, որեւէ ժամանակահատվածում չի եղել»։

«Լույս» խմբակցության ղեկավարը նաեւ չի կարծում, թե իշխանությունը ֆալշ ստարտ է տվել եւ փորձում է ապագա քաղաքապետի հարցն իր ներսում լուծել։Նրա խոսքով , այսօր ամբողջ քաղաքական դաշտը պատրաստվում է Երեւանի ընտրություններին։ «Ընդդիմությունից մինչեւ իշխանություն, եթե ֆալշ ստարտ է, ապա բոլորն են ֆալշ ստարտ տվել, որովհետեւ արդեն շրջանառվում են բոլոր այն անունները, որոնք հավանական է՝ մասնակցել։ Շրջանառվում է Լեւոն Քոչարյանի անունը, շրջանառվում է Մանե Թանդիլյանի անունը, շրջանառվում է Տարոն Մարգարյանի անունը, շրջանառվում է Դավիթ Խաժակյանի անունը, շրջանառվում է Արթուր Վանեցյանի անունը։ Այդ անունները չեն հնարվել, իրենք ցանկացել են մամուլով շրջանառել, շրջանառվել են ՝ անկախ նրանից, անձնապես որեւէ մեկը հաստատել է դա, թե չի հաստատե»,- «Փաստինֆո»-ին ասաց Խաժակյանը՝ հավելելով, որ մեկ տարի անց Երեւանի քաղաքապետի հարցը լուծելու է Երեւանի բնակչությունը։

Ինչ վերաբերում է Տիգրան Ավինյանի՝ որպես քաղաքապետի տեղակալի թեկնածուի վերաբերյալ «Լույս» -ի դիրքորոշմանը, հաշվի առնելով ԼՀԿ-իշխանություն համագործակցությունը՝ ի դեմս Էդմոն Մարուքյանի կողմից հատուկ հանձնարարություններով դեսպանի պաշտոնի ստանձնման, Խաժակյանն ասաց, թե ԼՀԿ-ն իշխանության մաս չէ եւ պատասխանատվություն չի ստանցձնել․«Ոչ մի քաղաքագիտական հիմնավորմամբ հնարավոր չէ պնդել, որ ԼՀԿ-ն պատասխանատվություն է ստանձնել։ Մեկ դեսպան ունենալով, այն էլ, կոնկրետ արտաքին բլոկի կոնկրետ ուղղվածությամբ, հնարավոր չի պնդել, որ պատասխանատվության մաս ունի, չկա կոալիցիա, չկա հարցերի համատեղ լուծման մեխանիզմ ։ Կա ընդամենը մեկ հատուկ հանձնարարություններով դեսպանի կարգավիճակ։ «Լույս» խմբակցությունը միասնական դիրքորոշում դեռ չի ձեւավորել, ունեցել ենք ծանոթագրական հանդիպում» ։

Խաժակյանն ասաց, որ դեռ 2017 թվականից, երբ ՀՀԿ-ն էր իշխանության, «Ելքի» կազմում էլ իրենք որեւէ քաղաքապետի տեղակալի թեկնածուին դեմ չեն քվեարկել։

Աղբյուր` Փաստինֆո