Փաստ ինֆո

Իր կնոջը խեղդամահ անելու մեջ մեղադրվող Մրգավետ համայնքի ղեկավարի որդին՝ Նարեկ Սարգսյանը, չի ընդունում մեղադրանքը, պնդում է, թե կնոջը չի խեղդել, չի սպանել։ Փոխարենը՝ կասկածներ են հայտնում մահացած կնոջը՝ հնարավոր դավաճանության մասին։

Հիշեցնենք, որ մայիսի 5-ին Երևանի բնակարաններից մեկում հայտնաբերվել է 35-ամյա Տաթևիկ Աբրահամյանի դին՝ պարանոցի և դեմքի շրջանում բռնության հետքերով։ Վերջինս ոստիկանության Կոտայքի մարզային վարչության նախկին պետ, ոստիկանության գնդապետ Ավետիք Աբրահամյանի դուստրն էր, աշխատում էր ԵՊՀ-ում՝ որպես դասախոս։

Քրեական վարույթի շրջանակներում ձերբակալվել, ապա՝ կալանավորվել է Տաթևիկ Աբրահամյանի ամուսինը՝ Նարեկ Սարգսյանը։ Նրան մեղադրանք է առաջադրվել ՀՀ քրեական օրենսգրքի (2003թ ընդունված ՔՕ հեղ. ) 104-րդ հոդվածի առաջին մասով՝ սպանության հատկանիշներով։ Նարեկ Սարգսյանը Մրգավետ համայնքի ղեկավարի որդին է, որն ըստ մեղադրանքի՝ խեղդամահ է արել կնոջը։

Պաշտպանության կողմը, սակայն, նախաքննության ընթացքից դժգոհություններ ունեն, ավելին, կարծում են, որ քննությունը ոչ միայն պատշաճ չի իրականացվում, այլև՝ ուղղորդված է, մեղադրանքում անգամ նշված չէ՝ ենթադրյալ սպանության շարժառիթը, նպատակը։

Նարեկ Սարգսյանի պաշտպան Աննա Ծառուկյանը «Փաստինֆո»-ի հետ զրույցում նշեց, որ առ այս պահը չի ստացվել դիակի դատաբժշկական փորձաքննության եզրակացությունը, բայց Սարգսյանը կալանավորված է սպանության մեղադրանքով այն դեպքում, երբ որևէ մեկն առանց փորձաքննության եզրակացության չի կարող ասել, թե ինչի հետևանքով է վրա հասել մահը։ Ստացվել է միայն մեկ փորձաքննության եզրակացություն, համաձայն որի՝ Սարգսյանի վրա որևէ հետք չի հայտնաբերվել։ Պաշտպանի փոխանցմամբ՝ Սարգսյանի տեսակցությունների վրա արգելք է դրվել, թեև օրենսդրական փոփոխություններից հետո քննիչը նման լիազորություն չունի, որոշումն այժմ վիճարկվում է։ Ըստ պաշտպանի՝ սա խոշտանգում է, որովհետև ցանկացած կալանավորված անձ պետք է կապը չկորցնի իր ընտանիքի և անձնական կյանքի հետ, այս դեպքում՝ կինը չկա, չի կարողանում տեսնել նաեւ ծնողներին, երեխային, ընկերներին։

«Չեմ տեսնում ակտիվություն քննիչի կողմից՝ բացահայտման ուղղությամբ։ Ինքն իր համար արդեն որոշում է կայացրել, որ Նարեկ Սարգսյանն է մեղավոր, ութ ժամ է ընդամենը նախորդ անգամ աշխատել։ Ե՛վ առաջին ատյանի դատարանը, և Վերաքննիչ դատարանն անցել են այդ հիմքի վրայով, չեն պատճառաբանել, թե ինչպես կարելի է երկու ամսվա ընթացքում գրեթե մեկ օր աշխատել այն պարագայում, երբ քննչական խումբը հինգ հոգուց է բաղկացած»,- նշեց Ծառուկյանը՝ համոզմունք հայտնելով, որ կալանքի երկարացման որոշման դեմ արդեն կ բողոք է ներկայացվել, պատրաստվում է նաեւ ՄԻԵԴ դիմում ներկայացնել և միայն այն հանգամանքը, որ անհրաժեշտ ջանասիրություն չի ցուցաբերվում՝ գործի բացահայտման ուղղությամբ և ՀՀ ներպետական ատյանները նորմալ են համարում, որ մարդը կարող է կալանավորված մնալ այն պայմաններում, երբ քննիչները երկու ամսվա ընթացքում ընդամենն 8 ժամ են աշխատել, ՄԻԵԴ-ի կողմից արդեն արդյունք է նախատեսվում։

Պաշտպանը նշեց, որ նախաքննության մեջ օբյեկտիվություն չի տեսնում, ապա ավելացրեց՝ գործում առկա չէ որևէ տվյալ, որն ուղղակիորեն կվկայեր այն մասին, որ Նարեկ Սարգսյանից բացի այլ կասկածյալ չէր կարող լինել. «Տրամաբանություն չկա, ինքը բոլոր հնարավոր նմուշները հանձնել է, որևէ խնդիր չի տեսել։ Դատաբժշկական փորձաքննության վերաբերյալ բազմաթիվ հարցեր եմ ուղղել, հակառակ պարագայում՝ չէի անի դա՝ մտավախություն ունենալով, որ կարող է վնասել իմ պաշտպանյալին։ Որևէ չունենք, միայն ուզում ենք, որ արդարացի լինի»։

Պաշտպանի փոխանցմամբ՝ Նարեկ Սարգսյանը պնդում է, որ միջամտություններ կան գործով, ավելին՝ հաղորդում է ներկայացվել՝ տուժողի հոր և նրա որդու կողմից ենթադրյալ միջամտությունների մասին։

Մեղադրյալը քրեական վարույթի շրջանակներում ցուցմունք է տվել, որից մանրամասներ պաշտպանը չհայտնեց, միայն նշեց, որ Սարգսյանն իր ցուցմունքում նշել է դեպքի օրը՝ մեկ այլ անձի այնտեղ գտնվելու վերաբերյալ։ Ընդ որում, պաշտպանության կողմը չի բացառում, որ խոսքը ոչ թե մեկ անձի, այլ՝ մի քանի անձի մասին. «Դեպքից երկու օր առաջ երեք տղամարդ է եկել բնակարան։ Կան ենթադրություններ, որ անձինք են եղել։ Եթե քննիչն օբյեկտիվ աշխատի, շատ բան կարող է բացահայտվել»։

Նախաքննության ընթացքում առգրավվել են տարածքում առկա բոլոր տեսախցիկները, բացի՝ նկուղային հարկում առկա տեսախցիկներից, և թեև պաշտպանության կողմը միջնորդել է՝ ուսումնասիրել նաև դրանք, նման գործողություններ դեռևս չեն իրականացվել. «Անձը՝ քննիչը, հասկանում է, որ տեսախցիկների արձանագրածները 15 օրից ավել չեն պահպանվում, ինչու՞ առ այս պահը չեն առգրավել նկուղային հարկի տեսախցիկները։ Ինչպե՞ս չասենք, որ սա ուղղորդում է»։

Ըստ նախաքննական մարմնի, տեսախցիկներն արձանագրել են, որ Նարեկ Սարգսյանը երեխայի հետ դուրս է եկել, դեպքի վայրում կինը մոտ երկու ժամ միայնակ է եղել, հետո՝ վերադարձել է, սակայն պաշտպանը նշեց, որ անձի նույնականացման փորձաքննություն դեռևս առկա չէ, տեղեկություններ չկան, թե դեպքի ժամանակ որտեղ է եղել երեխան, դիակի դատաբժշկական փորձաքննության եզրակացությունը չի ստացվել, հետևաբար, դեռևս հայտնի չէ, թե կոնկրետ երբ է տեղի ունեցել դեպքը, արդյոք գործ ունենք սպանության հետ, թե ոչ։

Ինչ վերաբերում է կնոջ դին հայտնաբերելուն, պաշտպանը նշեց, որ, երբ իր պաշտպանյալը մուտք է գործել, տեսել է ուշագնացություն, չի կարող պնդել, որ այդ պահին կյանքի էլեմենտներ չի ունեցել, նույնիսկ՝ չի մոտեցել։ Պաշտպանները չեն բացառում նաեւ բժշկական անփութությունը. «Ըստ քննիչի՝ խեղդամահության մեղադրանք ունենք, սակայն դիակի վրա՝ գլխի հարվածում նույնպես վնասվածքներ կան։ Պետք է ԴՏՓ եզրակացությունը ստացվի, հասկանանք՝ մահն ինչից է վրա հասել՝ գլխի հարված է, խեղդամահություն է, թե բժշկական անփութության արդյունք է։ Ինչպես կարելի է պրոֆեսիոնալ դաշտում պնդել մի բան այն դեպքում, երբ ունենք դիակի արտաքին զննության արդյունքում արձանագրված երկու վնասվածք՝ գլխի հատվածում և կոկորդի հատվածում և պնդել, որ դա միայն խեղդամահություն է։ Նարեկը մատնահետքեր է հանձնել, պարզվելու է, որ ինքը որևէ առնչություն չունի»։ Ծառուկյանի փոխանցմամբ՝ դիակի արտաքին զննությամբ կնոջ վրա որոշակի հետքեր են հայտնաբերվել՝ ենթադրյալ բռնության, կա կանխավարկած, որ կնոջ նկատմամբ բռնություն է գործադրվել. «Ես նույնիսկ միջնորդություն եմ ներկայացրել՝ սեռական ակտի հետ կապված։ Պատրաստ ենք նմուշ հանձնել, այդ թվում, որ հասկանանք՝ երբ է տեղի ունեցել վերջին սեռական ակտը, հասկանանք՝ կարող է այլ կասկածներ ունենք, այլ անձինք կան, որն է իրականությունը »։

Նշենք, որ տուժողի և Սարգսյանի հարաբերությունների մասին մամուլն առաջին անգամ անդրադարձել էր 2017թ սեպտեմբերի 1-ին, երբ ԵՊՀ շենքի մոտից երիտասարդը «փախցրել» էր դասախոսին։

Հայտնի էր դարձել, որ աղջկա ծնողները դեմ են եղել այդ հարաբերություններին՝ հաշվի առնելով նաեւ ազգակցական կապերը, բացի այդ, 2016թ -ից Նարեկ Սարգսյանի վերաբերյալ քրեական գործ էր քննվում դատարանում՝ գումարային հարցերի շուրջ առաջացած վիճաբանության ժամանակ անձին մարմնական վնասվածքներ պատճառելու վերաբերյալ, որը հետագայում կարճվել էր՝ տուժողի և ամբաստանյալի հաշտության հիմքով։

Ծառուկյանն, անդրադառնալով կնոջ և Սարգսյանի հարաբերություններին, նշեց, որ Նարեկ Սարգսյանի պնդմամբ՝ իրենք առանձնացել էին, քանի որ կինն աշխատում և բնակվում էր Երևանում, Սարգսյանն էլ՝ տուն էր կառուցում և կառուցապատման աշխատանքներից հետո պետք է բնակվեին միասին, որոշակի վեճեր եղել են, սակայն որևէ բռնություն չի եղել, ըստ մեղադրյալի՝ դեպքից մեկ օր առաջ միասին զբոսնել են։

Դեպքի լուսաբանման բազմակողմանիության ապահովման անհրաժեշտությունը նկատի ունենալով՝ «Փաստինֆո»-ն կապ հաստատեց նաև տուժողի իրավահաջորդի ներկայացուցիչ Հովիկ Սուքիասյանի հետ, որը, սակայն զերծ մնաց գործի վերաբերյալ դիրքորոշում հայտնելուց, քանի որ չունի տուժողի ծնողների համաձայնությունը, հրապարակումներից հետո ծնողները վերապրում են վիշտը։

Հեղինակ՝ Իզաբել Սահակյան

Աղբյուր` Փաստինֆո