Փաստ ինֆո

«Սուրմալու» առևտրի կենտրոնի դեռևս՝ անհստակ և  բազմաթիվ հարցականներ պարունակող, սակայն, արդեն իսկ՝ ուղղորդվող  քրեական գործը ի՞նչ ընթացք կունենա, կարծես՝ կանխորոշվում է վարչապետի պաշտոնը զբաղեցնողի կողմից։ Անմիջապես՝ հանրության աչքի առաջ,  կառավարության նիստում  է ուղղությունը տրվում։  Օրենքի բազմաշերտ խախտումներով  և անվտանգության բոլոր կանոնները ոտնակոխ արած այս առևտրի կենտրոնը, բնականաբար, միակը չէ։ Սակայն ունենք փաստ՝ Սուրմալուում  տեղի ունեցա՛ծն է  բազմաթիվ մարդկային կյանքեր խլել, ընդ որում, նաև՝ դեռ չծնված, մի քանի տասնյակ վիրավորներ, դեռևս՝ չգտնված անձ․․․  Այս ամենի ֆոնին՝ ոչ մի պաշտոնանկություն, թեպետ ի սկզբանե հայտնի դարձավ, որ քաղաքաշինության, տեխնիկական և հրդեհային անվտանգության տեսչական մարմինը ստուգման արդյունքում բազմաթիվ խախտումներ է հայտնաբերել Սուրմալուում, տուգանել  և դրանք վերացնելու  հրահանգ կամ հրաման տվել։ Ընդ որում, մեկ տարի առաջ։ Տվել է և անուշադրության մատնել  «Սուրմալու» առևտրի կենտրոնում իր իսկ մատնանշած խնդիրներն էլ, իր հրամանն էլ․․․

Հիմա, Բեյրութի պայթյունը կառավարության նիստի ընթացքում վկայակոչող Փաշինյանը նույն հանցանքն է գործել՝ հանձնարարել է համապատասխան կառույցներին և ոչ ի՛նքն է հետևողական եղել, ո՛չ էլ՝ այդ հանձնարարությունը ստացողները։ Հարց՝ ինչու՞ չեն եղել։ Պատասխանը մեկն է և միանշանակ՝ նրանց համար միևնույն է։ Հայաստանն էլ, հայ մարդն էլ։ Կարևորը՝ իրենց իշխանությունն է, պաշտոնը,  պարգևավճարը, իրենց կորած ժամացույցը, օծանելիքը․․․Ի վերջո, կարևորը  իրենց չարածի ֆոնին սելֆիներն են։ Փիարը։ Խմբակային և առանձին։ Տեղի ունեցող ողբերգությունը նույնիսկ՝ նախընտրական քարոզարշավի սկիզբ դարձնելով․․․

Այսօր վարչապետի աթոռին համառորեն կառչածը կառավարության նիստում համապատասխան գերատեսչությունների ղեկավարներին /ԱԻՆ, ԱՆ, ՔԿ և այլն/ իր ուղղած հարցերում սեփական ցանկալի պատասխանը մանրամասն զետեղելու արդյունքում ստանում էր ցանկալի պատասխանները։ Այսինքն, այդպիսով ուղղորդում էր նրանց, թե ինչ և ինչպես ներկայացնեն։ Բավական չէ, որ գործից բացարձակ անտեղյակների մի բազմություն հավաքվել ու քննարկում է պետությանդ և ՀՀ քաղաքացուն  վերաբերվող կարևորագույն թեմաներ, դեռ մի բան էլ՝ մարդկայնորեն տգեղ, տհաճ ու մեծ հաշվով, անտարբեր, բայց  նաև՝ ցուցադրական տեքստեր են ասվում։ Եվ այդ տեքստերն էլ ամբողջովին վկայում են իշխանությունների անտարբերության մասին։

Փաստորեն, վարչապետի աթոռին նստածը «Սուրմալու»-ի հարցում հին մեղավոր է։  Ասում է՝ « 20 թվականի օգոստոսին Բեյրութում տեղի ունեցած պայթյունից հետո համապատասխան գերատեսչություններին հանձնարարել էի հավաքել տեղեկություն պայթյունավտանգ բոլոր հնարավոր այն օբյեկտների մասին, որոնք ունեն  պայթյունավտանգ նյութեր»:  Հետո էլ, թե՝ «ինքը փորձել է հաշվետվություն ստանալ տրված հանձնարարականի կատարման վերաբերյալ»: Ի՞նչ ասել է՝ փորձել է։ Այսինքն, վարչապետը նրա համար է, որ  ընդամենը «փորձի՞»  հաշվետվություններ ստանա՞լ։ Փորձի և չստանա՞, այսինքն։ Ի՞նչ է սա նշանակում։ Արդյո՞ք ոչ՝ հստակ խոստովանություն, որ ինքն իրավիճակին չի տիրապետում, քանի որ իր տված հանձնարարականների վերաբերյալ հաշվետվություն ստանալու փորձը անհաջողությամբ է պսակվել։ Ասել է, թե՝ կառավարությունում իր հանձնարարականները չե՛ն կատարում։ Հայերի և Հայաստանի անվտանգության վերաբերյալ հանձնարարականները վեջները չի,  ի շահ Ադրբեջանի՝ ստրկաբար ենթարկվում են․․․

Հարց, եթե չեն կատարում, ինչու՞ են տվյալ պաշտոնյաները շարունակում պաշտոնավարել։ Միգուցե ԽԾԲ-ն խեղդու՞մ է երբեմնի ընդդիմադիրին, որ ամբիոնը գրկած՝ նախկիններին վերագրվող խնամի-ծանոթ-բարեկամից էր խոսում։ Իսկ գուցե հակառա՞կն է՝ այսինքն,  ի՛ր խոսքը կատարող չկա։ Երկու դեպքում էլ՝ հրաժարականների շքերթ պիտի տեսնեինք։

Իսկ փաստերը որքան էլ՝ աղաղակող են և խայտառակ, սակայն պաշտոնանկությունների, հրաժարականների  շքերթ չկա։ 44-օրյա խայտառակ  պարտությունից  հետո չեղավ, հիմա՝ կլինի՞․․․

Փարիսեցիաբար, մեկմեկու պաս տալով,  ու՞մ էին խաբում կառավարության նիստում, թե՝ անցած որոնողական աշխատանքների ժամանակ ոչ մի բանի կարիք չի եղել, այն դեպքում, երբ ժամեր շարունակ՝ տեխնիկայից սկսած՝ ավարտած՝  ամենապրիմիտիվ անհրաժեշտություններից զուրկ են եղել մարդիկ։ Փրկարարները, կամավորները, կարմիրխաչական կամավորները աշխատեցին։ Բայց՝  իշխանության՝ անկազմակերպ, փնթի, կատարվածի ահագնությունը չպատկերացնելու հետևանքով մարդկային կյանքեր կորցրինք։

Աղբյուր` Փաստինֆո