Փաստ ինֆո

ԱԽ քարտուղարի երեկվա հայտարարությունների մեջ որևէ նոր բան չտեսա, ՀՀ իշխանությունները շարունակում են իրենց քաղաքականությունը՝ խաղաղության դարաշրջանի պատրվակով հանձնել Հայաստանի և Արցախի կենսական շահերը թուրք-ադրբեջանական ոհմակին: Չգիտեմ՝ միգուցե սա միտումնավոր է արվում, միգուցե պարզապես չեն հասկանում, կամ չեն ուզում հասկանալ իրականությունը և ապրում են ադրբեջանամետ ու թրքահաճո երազանքների մեջ:Ես չեմ հասկանում, իրենք են մեզ խելագարության հասցնում, թե՝ կարծում են, որ մարդիկ չեն կարող տրամաբանել:

«Փաստինֆո»-ի հետ զրույցում ասել է ԲՀԿ քաղխորհրդի անդամ, ԱԺ նախկին պատգամավոր Արման Աբովյանը՝ անդրադառնալով ԱԽ քարտուղար Արմեն Գրիգորյանի՝ երեկվա հարցազրույցին։ Հիշեցնենք, որ վերջինս երեկ հայտարարել է, թե Հայաստանը պատրաստ է Ադրբեջանի հետ խաղաղության պայմանագրի ստորագրմանը, կա գաղափար այն անել առանց ԼՂ հարցի վերջնական լուծման, սակայն բանաձեւ դեռեւս չունեն։

Արման Աբովյանի խոսքով՝ ՀՀ իշխանությունները ցանկանում են խաղաղության գնալ այն երկրների հետ, որոնց պետական կոնցեպտը Հայաստանի մասնատումն է.

«Ադրբեջանի և Թուրքիայի պետական կոնցեպտը ենթադրում է Հայաստանի մասնատում, իրենք սա չեն էլ թաքցնում, ավելին՝ նախապատրաստվում են սրան՝ կուտակելով զորքեր ՀՀ սահմանին, ներխուժելով ՀՀ տարածք, առաջ մղելով «Զանգեզուրի միջանցքի» գաղափարը, բացի սա՝ Ալիևը բացահայտ հայտարարել է, որ միջազգային իրավունքը չի աշխատում, աշխատում է միայն ուժի գործոնը, եթե իրենք ապավինում են, որ այս հայասպան, բարբարոս պետությունների հետ խաղաղություն կհաստատեն ու դրանով կապահովեն իրենց անձնական անվտանգությունը, ապա սխալվում են: ՀՀ իշխանությունը շատ հստակ և պարզ ասել է, որ խաղաղությունը տեսնում է՝ իսպառ հանձնվելով թուրք-ադրբեջանական ոհմակին և պրոպագանդա են անում՝ մարդկանց մեջ վախ սերմանելով, որ պատերազմից վատ բան չկա, տեղեկացնեմ նրանց, որ կա դրանից վատ բան, դա կոտորածն է, ցեղասպանությունը և տարհանումը »,-ասաց Աբովյանը:

Ավելին՝ ԱԽ քարտուղարը հայտարարել էր, թե Արցախահայության անվտանգության երաշխավորը այնտեղ տեղակայված ռուս խաղաղապահներն են։ Դիտարկմանը՝ արդյո՞ք ՀՀ իշխանություններն այսպիսով ամբողջությամբ չեն հրաժարվում Արցախից և Արցախի հարցի կարգավորումը թողնում են Ադրբեջանի հայեցողությանը՝ Արման Աբովյանն արձագանքել է, որ  իրենք միայն Արցախից չեն հրաժարվում, այլ նաև Հայաստանից, երբ ՀՀ տարածքային ամբողջականության խախտումը ներկայացնում են որպես նորմալ երևույթ, կամ արտաբերում են հայկական բնակավայրերի ադրբեջանական անվանումները, դրա մասին է վկայում: Ավելին, ինչպես նկատեց բանախոսը, Հայաստանի իշխանությունները ադրբեջանական կողմի հայտարարություններից հետո խառնվում են իրար ու մի նոր տարօրինակ հայտարարություն են անում.

«Երբ ռազմական հանցագործ Ալիևը մատ թափ տվեց մեր իշխանությունների վրա և ասաց, որ հայկական զորքերը պետք է դուրս բերվեն Արցախից, հաջորդ օրը ՀՀ իշխանությունները ափալ-թափալ հայտարարեցին, որ մինչև սեպտեմբերի զորքերն Արցախից պետք է դուրս գան»,-ասաց նա:

Անդրադառնալով ընդհանուր տարածաշրջանային գործընթացներին՝ Արման Աբովյանն արձանագրում է՝ հիմա գծվում է նոր աշխարհակարգի սահմանները, իսկ այն պետությունները, որոնց տարածքով անցնելու են սահմանները, այդ պետություններն այլևս գոյություն չեն ունենա, կամ կունենան միայն ֆորմալ ձևով.

«Հիմա մենք տեսնում ենք, որ աշխարհաքաղաքական սահմանները ձգտում են գծել նաև Հայաստանի տարածքով, ինչին Հայաստանը ոչ միայն չի ընդդիմանում, այլ անվանում է խաղաղության դարաշրջան, բայց թող չփորձեն Հայաստանի շահերի վրա խաղալը ներկայացնեն ինչ-որ բարիք»,-ասաց Աբովյանը:

Աղբյուր` Փաստինֆո