Փաստ ինֆո

«Վ.Ա.Ս. ԳՐՈՒՊ» ընկերության կողմից անբարեխիղճ մրցակցություն վարելու մասին «Փաստինֆո»-ի արձանագրած խախտումը հաստատվել է նաեւ Մրցակցության պաշտպանության հանձնաժողովի կողմից եւ ընկերությանը տուգանելու որոշում կայացվել։

Ավելի վաղ «Փաստինֆո»-ն արձանագրել էր, որ Ռուսաստանի դեմ միջազգային պատժամիջոցներին կարծես «միացել» են նաև որոշ հայ գործարարներ՝ բացահայտ հակագովազդ իրականացնելով ռուսական արտադրանքի դեմ: Մասնավորապես, «Վ.Ա.Ս. ԳՐՈՒՊ» ընկերությունն իտալական մակարոնի գովազդ է անում՝ ի հաշիվ ռուսական մակարոնի որակի հակագովազդի:

Ընդ որում՝ անբարեխիղճ մրցակցության ցցուն օրինակը «Փաստինֆո»-ն նկատել էր հենց «Վ.Ա.Ս. ԳՐՈՒՊ» ՍՊ ընկերության կայքէջում, որտեղ «Խոհարարական խորհուրդներ՝ մակարոն» խորագրի ներքո հրապարկել էր ռուսական մակարոնի վերաբերյալ հակագովազդ:

«Փաստինֆո»-ն գրավոր հարցմամբ դիմել էր «Վ.Ա.Ս ԳՐՈՒՊ»-ընկերությունը՝ պարզելու՝ որն է վարկաբեկող գովազդի, հետեւապես նաեւ անբարեխիղճ մրցակցության պատճառը, սակայն ընկերությունից մեր հարցմանն ի պատասխան պնդել էին, թե նշված նյութում անբարեխիղճ գովազդ չկա, այն պարզապես տեղեկատվական բնույթ է կրում։

Նույն թեմայի առնչությամբ հարցում էինք ուղարկել նաև մրցակցության պետական հանձնաժողով, որտեղից հայտնել էին, որ սույն գովազդի մասին տեղեկացել են մեր հարցումից ու քննարկման առարկա դարձրել։

«Փաստինֆո»-ն տեղեկացավ, որ հանձնաժողովում հարուցվել է վարույթ, որի արդյունքում հաստատվել է մեր արձանագրած խախտումը։ Հանձնաժողովը եզրակացրել է, որ «Վ.Ա.Ս. ԳՐՈՒՊ» ընկերության «vas.am» կայքում հրապարակված «Եւ ինչու է իտալական մակարոնը նախընտրելի» վերտառությամբ հրապարակումը վարկաբեկում է ռուսական մակարոնը, որի միջոցով այն արտադրող, իրացնող տնտեսվարողների նկատմամբ դրսեւորվել է անբարեխիղճ մրցակցություն։

Հանձնաժողովի հուլիսի 25-ի որոշմամբ՝ «Վ.Ա.Ս. ԳՐՈՒՊ» ընկերությունը տուգանվել է 2.832.436 մլն դրամի չափով տուգանք։

Ի դեպ, «Վ.Ա.Ս. ԳՐՈՒՊ» ընկերության կայքում հրապարակված նյութը հեռացվել է:

Հայ որոշ գործարարներ սկսել են ռուսական արտադրանքի դեմ բացահայտ հակագովազդ անել՝ անուղղակի միանալով Ռուսաստանի դեմ միջազգային պատժամիջոցներին

Աղբյուր` Փաստինֆո