Փաստ ինֆո

Ցույցին մասնակցելը հիմք չի կարող հանդիսանալ, որ որևէ քաղաքացու մուտքը Հայաստան արգելելու համար, սա ակնհայտ ոչ իրավաչափ գործողություն է, վարչարարություն իրականցնողները՝ ի դեմս ՀՀ-ի, խախտել են Սահմանադրությունը և Մարդու իրավունքների եվրոպական կոնվենցիան՝ քաղաքական շարժառիթներով: «Փաստինֆո»-ի հետ զրույցում ասել է «Երկիր Ծիրանի» Զարուհի Փոստանջյանը:

Ավելի վաղ հայտնել էինք, որ հուլիսի 14-ին Հայաստան էր ժամանել Ֆրանսիայի հայկական ընկերությունները համակարգող խորհրդի նախագահ, ՀՅԴ Բյուրոյի անդամ Մուրադ Փափազյանը, սակայն «Զվարթնոց» օդանավակայանում ԱԱԾ աշխատակիցներն արգելել էին Փափազյանի մուտքը Հայաստան՝ պատճառաբանելով, թե ինքն անցանկալի անձ է Հայաստանի համար։

ԱԱԾ-ն հրաժարվում էր որևէ մեկնաբանություն տալ՝ ի՞նչ հիմքով է նրա մուտքը Հայաստան արգելվել, իսկ այսօր էլ ՀՀ վարչապետի աշխատակազմը հայտարարություն է տարածել՝ հաստատելով, որ Մուրադ Փափազյանի մուտքը արգելվել է, քանի որ նա Ֆրանսիայում մասնակցել է ընդդեմ Նիկոլ Փաշինյանի կազմակերպած ակցիայի:

Մեզ հետ զրույցում Զարուհի Փոստանջյանն արձանագրում է՝ խաղաղ ցույցին մասնակցելը սահմանադրական հիմնարար իրավունք է, ուստի այս դեպքում խախտվել են Մուրադ Փափազյանը հիմնարար իրավունքները.

«Փաշինյանի, էրդողանի, Ալիևի, թեկուզ Բայդենի կամ Պուտինի դեմ կազմակերպված ցույցերը որևէ խնդիր չպետք է առաջացնեն մարդկանց համար, ցույցին մասնակցելը, թե՛ Ֆրանսիայում, թե՛ Հայաստանում սահմանադրական հիմնարար իրավունք է, այդ իրավունքը չի կարող չհարգվել ՀՀ իշխանությունների կողմից, մարդու հիմնարար իրավունքը չի կարող սահմանափակվել այսպիսի կամայական գնահատմամբ»,-ասաց զրուցակիցը:

Փոստանջյանի գնահատմամբ՝ սա շատ վտանգավոր ուղերձ է Սփյուռքին, որը նաև պառակտիչ բնույթ ունի.

«Սփյուռքի մեր հայրենակիցները 4 տարի է՝չեն մասնակցում Սփյուռք-Հայաստան համագումար, վերջին համագումարը տեղի է ունեցել 2017թ-ին, դրանից հետո ոչ մի համագումար չի եղել, սա հստակ ուղերձ է ՝ պառակտելու Սփյուռքը:

Մի կողմից ազգը պառակտում են ներսից Հայաստանի ներսում՝ սև-սպիտակ, նախկին-ներկա անելով, պառակտում են ղարաբաղցի-հայաստանցի, հիմա էլ անցել են Սփյուռքի պառակտմանը, մեր այս դժվարին շրջանում այնպես են անում, որ պառակտեն բոլորիս, սա վաղեմի երազանքն է Էրդողանի, որ Սփյուռքի տարանջատվի, նա էր ուզում, որ Հայաստանի և Սփյուռքի օրակարգը չհամընկնի, հանդես չգանք միասնաբար»,-ասաց նա:

Փոստանջյանի խոսքով՝ մյուս կողմից սա ուղերձ է մեր սփյուռքի հայրենակիցներին՝ իրենց քաղաքական դիրքորոշումը զսպելու համար։

«Ես բազմիցս տարբեր սփյուռքահայերի հետ կազմակերպել եմ բողոքի ակցիաներ ընդդեմ Կառավարության, մարդիկ այդ իրավունքը ունեն և ՀՀ-ն պարտավոր է հարգել այս իրավունքը, պետք է ընդունի, որ Սփյուռք իր գնահատականն ունի այս իշխանությունների վարած քաղաքականության վերաբերյալ»,-ասաց նա:

Զարուհի Փոստանջյանը նաև հիշեցնում է, որ Հայաստան էր ժամանել նաև թուրքական «Գորշ Գայլեր» ահաբեկչական խմբավորման հետ մտերիմ Սամսոն Օզարարատը, սակայն նրա մուտքը չարգելվեց.

«Բա նրա մուտքն ինչո՞ւ չի արվել, նրա այցն իրապես վտանգավոր է, նա մի կազմակերպության անդամ է, որը եվրոպական տարբեր երկրների կողմից ճանաչվել է ահաբեկչական կազմակերպություն»,-ասաց Փոստանջյանը:

Աղբյուր` Փաստինֆո