Փաստ ինֆո

Պուշկին-Կողբացի անկյունով իջնելիս հետիոտն, թե՝ վարորդ, զարմանքից քար են կտրում։ Այստեղ տեղի է ունեցել անկարելի և անպատկերացնելի մի բան, ինչն ուղղակի ցուցանում է՝ քաղաքը տեր չունի։

«Փաստինֆո»-ն արդեն անդրադարձել է Պուշկին-Կողբացի խաչմերուկի հատվածում ստեղծված իրավիճակին, որտեղ, պարզվում է, մայթերի բարեկարգման ծրագրի ներքո քաղաքապետարանը զավթել և օկուպացրել է Եզնիկ Կողբացի փողոցի մի մասը, որի հետեւանքով ճանապարհն այնքան է նեղացել, որ դարձել է խցանումների ու վթարների պատճառ։

Ավտոմեքենաներն ամեն օր ու ժամ բախվում են անհաղթահարելիի հետ, քանի որ հաճախ դատապարտված են ժամերով մնալու խնդրո առարկա՝ «տուպիկի» մեջ՝ չիմանալով՝ ո՞նց դուրս պրծնել:

Քաղաքային իշխանությունը պատկերացում ունի՝ ի՞նչ ասել է փողոց, հասկանու՞մ է, որ մայթերը՝ քայլելու, իսկ փողոցները նախևառաջ՝ տրանսպորտային երթևեկության համար են և եթե իրենց անիշխանության հետևանքով, ընդհուպ՝ իմացությամբ և թողտվությամբ՝ հետիոտնից մայթն է խլում, վարորդից՝ փողոցը, ապա ստեղծվում է կատաստրոֆիկ մի վիճակ...

Իսկ եթե անանցանելի փողոցում «լռվում է» անհետաձգելի օգնության շտապող շտապօգնության մեքենա՞ն, կամ, ասենք՝ աղբատարը, ինչպես այսօր․․․

Լուսանկարն արվել է այսօր, երբ աղբատար մեքենան ուղղակի «լռվել էր» Կողբացի փողոցում, քանի որ անտերության մատնված մայրաքաղաքի կենտրոնում փողոցն այնքան է նեղացվել, որ այլեւս աներթեւեկելի է դարձել։ Դե իսկ ճանապարհային ոստիկանություն, նույնպես, պարզվում է չունենք, որը գոնե կարգելեր ավտոմեքենաների կայանումը՝ քաղաքապետարանի թեթեւ ձեռքով օկուպացված փողոցում։

Աղբյուր` Փաստինֆո