Փաստ ինֆո

ԲԴԽ նախկին նախագահ Ռուբեն Վարդազարյանի լիազորությունները դադարեցնելու մասին որոշման դեմ բողոքը ԲԴԽ-ում դեռ չի քննարկվել։

ԲԴԽ ամդամ Գրիգոր Բեքմեզյանը «Փաստինֆո»-ի հետ զրուցում ասաց, որ բողոքի լուծման համար 2 ամիս ժամկետ է սահմանված, կարծում է՝ մոտակա օրերին այն կքննարկվի։

Հիշեցնենք, որ հունիսի 23-ին ԲԴԽ-ն դադարեցրեց Ռուբեն Վարդազարյանի լիազորությունները՝ որպես կարգապահական տույժ, իսկ վարույթը հարուցվել էր Գրիգոր Բեքմեզյանի, Լիպարիտ Մելիքջանյանի, Դավիթ Խաչատուրյանի նախաձեռնությամբ՝ որպես հիմք մատնանշելով լրատվականներից մեկում հրապարակված հարցազրույցը, որտեղ Վարդազարյանն անդրադարձել է ՍԴ որոշմանը՝ Գագիկ Ջհանգիրյանի՝ ԲԴԽ անդամ ընտրվելու դիմումի վերաբերյալ։ Ռ. Վարդազարյանին կարգապահական պատասխանատվության ենթարկելու միջնորդությունը քննարկվել է առանց Ռ. Վարդազարյան ու նրա փաստաբանի ներկայության՝ խախտելով նրանց՝ լսելի լինելու իրավունքը։

Բացի այդ՝ հետագայում պարզվել է, որ Վարդազարյանն ունեցել է առողջական խնդիրներ, ինչով պայմանավորված չի ներկայացել նիստին։ Հունիսի 20-ին հրավիրած ասուլիսում Ռ.Վարդազարյանը աղմկահարույց ձայնագրություն է հրապարակել, որի համաձայն՝ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։ Ջհանգիրյանը հանրայինի եթերում՝ խոստովանել է, որ բանակցություններ վարել է Վարդազարյանի հետ՝ հրաժարական տալու համար։ Ավելին, հայտարարել է, որ ԲԴԽ նախագահին հրաժարական պարտադրելն այնքան էլ հեշտ գործ չէ ու ինքը նրա նկատմամբ հոգեբանական հնարքներ է կիրառել, «կուտ» տվել։

Այլ խոսքով՝ ձայնագրության հրապարակմամբ, ինչպես նաև՝ դրան հաջորդող հարցազրույցով փաստվել է, որ Վարդազարյանի նկատմամբ հետապնդումը քաղաքական բնույթի է, իսկ իր վերաբերյալ կարգապահական վարույթի քննությանը մասնակցել է բացարկման ենթակա անձ՝ Գ. Ջհանգիրյանը։ Ոչ պատշաճ դատարանի, ինչպես նաև՝ առողջական խնդիրներով պայմանավորված նիստին ներկա չգտնվելու հանգամանքներով պայմանավորված Վարդազարյանը բողոք է ներկայացրել ԲԴԽ՝ նոր երևան եկած հանգամանքների հիմքով։ Բացի այդ՝ Վարդազարյանը բարձրացնում է նաև օրենսդրական բացի խնդիր՝ կապված ԲԴԽ անդամի նկատմամբ հանձնախմբի կողմից վարույթի հարուցման և հետագայում միջնորդության քննությանը հանձմախմբի անդամների մասնակցության հետ։ Բողոքից բացի Վարդազարյանը միջնորդություն էր ներկայացրել՝ պահանջելով բողոքի վերաբերյալ քննությունը և դրա լուծումը կատարել մինչև հուլիսի 27-ը՝ Դատավորների ընդհանուր ժողովը, որի օրակարգում լինելու է ԲԴԽ դատավոր անդամի ընտրության հարցը։

Գրիգոր Բեքմեզյանը հստակ ժամկետներ չնշեց, միայն հավելեց՝ այդ միջնորդությունը ևս կքննարկվի՝ օրենքով նախատեսված ժամկետներում։

Հեղինակ՝ Իզաբել Սահակյան

Աղբյուր` Փաստինֆո