Փաստ ինֆո

Այս պահին ՀՀ պաշտպանության նախարարության բնակարանային հաշվառման հերթացուցակում ընդգրկված են 1188 զինծառայողներ և 805 զինվորական կենսաթոշակառուներ: Ընդհանուր առմամբ 1993 զինծառայողի մասով նախկինից չմարված պարտավորություններ կան, Այսինքն՝ խոսքը շուրջ 2000 շահառուի մասին է: Այս մասին ԱԺ նիստում «Զինվորական ծառայության եւ զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքի նախագծի քննարկման ժամանակ հայտարարեց ՊՆ նախարար Սուրեն Պապիկյանը:

Նախարարը նաև նշեց, որ 2019 թվականից առ այսօր ՊՆ կենտրոնական բնակարանային հանձնաժողովի կողմից քննարկվել և բնակարան ձեռք բերելու համար բնակարանի գնման վկայագրի միջոցով անհատույց պետական ֆինանսական աջակցություն է տրամադրել 557 զինվորական կենսաթոշակառուի.
« Նրանք այն անձինք են, ում նկատմամբ պետությունը ունեցել է պարտավորություն, պարտավորությունները մարվել են»,-ասաց նախարարը:

ՊՆ համակարգի սպայական և ավագ ենթասպայական կազմերի պայմանագրային զինծառայողների կողմից բնակարան կամ բնակելի տուն ձեռք բերելու կամ կառուցելու նպատակով մատչելի և արտոնյալ պայմաններով երկարաժամկետ հիփոթեքային վարկավորման ծրագրով 2019 թվականից մինչև օրս 472 զինծառայողներ հիփոթեքային վարկավորման ծրագրով ձեռք են բերել բնակարաններ: «Այսինքն՝ ընդհանուր առմամբ շուրջ 1000 զինծառայողի կարիքներ, ըստ էության, հոգացել ենք 2019-2021 թվականներին»,-ասաց Պապիկյանը:

Նրա խոսքով՝ այս տարի շուրջ 1013 դիմում է ներկայացվել ծրագրից օգտվելու համար.

«Մենք 500 տեղի համար ունենք 1013 դիմորդ: Բնականաբար 500 տեղի համար արդեն իսկ իրենց իրավունքները ստացել են մեր զինծառայողները, վարչապետի որոշմամբ մնացած 513 շահառուի կարիքները ևս կբավարարենք կառավարության առաջիկա նիստերից մեկում, փաստաթղթերն արդեն իսկ շրջանառվում են»,-հայտնեց նախարարը:

Աղբյուր` Փաստինֆո