Փաստ ինֆո

Ադրբեջանի կողմից կառուցվող Լաչինի միջանցքը շրջանցող նոր ճանապարհի երթուղին համաձայնեցված է եղել Արցախի իշխանությունների հետ՝ ռուսական կողմի միջնորդությամբ:

«Փաստինֆո»-ի հետ զրույցում այս մասին հայտնել է Արցախի «Արդարություն» կուսակցության պատգամավոր Մետաքսե Հակոբյանը:Ինչպես արդեն հայտնի է, ադրբեջանական կողմը Բերձորը շրջանցող նոր ճանապարհ է կառուցում, Լաչինի միջանցքին փոխարինող նոր ճանապարհն անցնելու է Ստեփանակերտ-Կրկժան-Ղայբալու-Զառսլու-Լիսագոր-Բերդաձորի ենթաշրջան (Մեծ Շեն, Հին Շեն, Տասը Վերստ, Կանաչ Թալա, Եղցահող) հատվածով և դուրս է գալու Գորիսի շրջանի Կոռնիձոր գյուղի մոտ:

Նշենք, որ նոյեմբերի 9-ի եռակողմ հայտարարության մեջ հստակ ասվում է, որ երեք տարվա ընթացքում Լաչինի միջանցքի երկայնքով նոր երթուղու կառուցման նախագիծ պիտի հաստատվի կողմերի միջև, նոր ճանապարհը պետք է Հայաստանն Արցախին կապի և այնտեղ պետք է ռուս խաղաղապահներ տեղակայվեն, մինչդեռ ադրբեջանական կողմը շտապում է կառուցել նոր ճանապարհը, ընդ որում, սեփական միջոցներով՝ առանց հայկական կողմի մասնակցության:

«Փաստինֆո»-ի հետ զրույցում արցախցի պատգամավոր Մետաքսե Հակոբյանը նշեց, որ ճանապարհն ունենալու է միջանցքի կարգավիճակ, այնտեղ տեղակայելու են նաև ռուս խաղաղապահները.

«Նոյեմբերի 9-ի փաստաթղթում հստակ նշված է, որ Լաչինի միջանցքին փոխարինող նոր միջանցք է կառուցվելու, իսկ ռուս խաղաղապահները Լաչինի միջանցքից տեղափոխվելու են նոր կառուցվող միջանցքը, այսինքն դա ճանապարհ էլ չէ, այլ՝ միջանցք է, այնտեղ հստակ ժամկետ է նշված նույնիսկ՝ 3 տարի, սակայն դրանից հետո Ալիևը բազմիցս է հայտարարել, որ չի թողնելու երբեք տարվա ընթացքում լինի, ջանք ու եռանդ չի խնայելու, որ այդ ճանապարհը կառուցվի շուտ, նշում էր, որ 1.5 տարում անպայման կառուցելու է»,-ասաց նա:

Արցախցի պատգամավորը նկատում է՝ թեև նոյեմբերի 9-ի եռակողմ փաստաթղթում հստակ նշված է, որ ճանապարհը համատեղ է կառուցվելու, սակայն հայկական կողմը որևէ կերպ չի մասնակցում կառուցման գործընթացին.

«Հայկական կողմը ճանապարհի կառուցման մեջ որևէ դերակատարում չունի, չկա այդպիսի հատված, որ հայկական կողմը պետք է կառուցի: Մենք գնում-գալիս ենք, հեռվից նայում ենք այդ ճանապարհին, բայց տեսնում ենք, որ հայկական կողմը որևէ մասնակցություն չունի այդտեղ, բա ինչպե՞ս եղավ, որ ադրբեջանցին, այսքան «բարի է», «մեղմ է», ինչպես Հայաստանի վարչապետն է ասում՝ «խաղաղասերն է», որ մեզ համար ճանապարհ է սարքում ու այդտեղ որևէ թակարդ չկա, դա Արցախը Հայաստանին կապող միակ զարկերակն է լինելու և ես չեմ պատկերացնում՝ ինչպե՞ս պետք է ադրբեջանցու կառուցած ճանապարհն ընդունեմ որպես ճանապարհ, որն Արցախը կապելու է ողջ աշխարհի հետ, սա ավելի շատ հարցեր է առաջացնում»,-ասաց Հակոբյանը

Հարցին՝ հաշվի առնելով, որ Ադրբեջանը սեփական միջոցներով է նոր ճանապարհը կառուցում, արդյո՞ք մտավախություն չկա, որ ինչ-որ պահի ադրբեջանական կողմը կարող է պարզապես արգելել, որ հայկական մեքենաներն անցնեն այդ ճանապարհով կամ վիզային ռեժիմ սահմանի ճանապարհին, պատգամավորը նշեց, որ Ադրբեջանը չի կարող արգելել կամ վիզա պահանջել, քանի որ ճանապարհը լինելու է ռուսական կողմի վերահսկողության ներքո

«Այս առումով չեն կարող արգելել, բայց մեր նենգ թշնամուն մենք չենք կարող կանխորոշել ու հասկանալ՝ ինչ կա դրա տակ թաքնված ու ինչ պայմանավորվածություններ ունեն Հայաստանի իշխանությունների հետ, որքանո՞վ են Արցախի իշխանությունները տեղեկացված դրա մասին, այս հարցերի պատասխանները չենք կարողանում գտնել»,-ասաց արցախցի պատգամավորը:

Աղբյուր` Փաստինֆո