Փաստ ինֆո

Վերաքննիչ քրեական դատարանի նախագահ Տիգրան Սահակյանը փաստացի թույլ չի տալիս ՀՀ դատավորների միության նախագահ, Վերաքննիչ քրեական դատարանի դատավոր Ալեքսանդր Ազարյանին առողջական խնդիրների լուծման համար մեկնել արձակուրդ՝ հրաժարվելով ստորագրել դիմումը։ Դատավորների միության նախագահ Ալեքսանդր Ազարյանը «Փաստինֆո»-ի հետ զրույցում հաստատեց տեղեկությունը՝ նշելով, որ նախօրեին, երբ պարզվեց, որ առկա հիվանդությունը սրվել է ու անհրաժեշտություն է առաջացել Մոսկվա մեկնելու, դիմում է ներկայացվել։

Մեկ տարի առաջ եւս նույն պատճառով Ազարյանը Մոսկվայում հետազոտվել է և, նկատի ունենալով, որ հիվանդությունը սրվել է, անհրաժեշտություն է առաջացել կրկին Մոսկվա մեկնելու, ինչի կապակցությամբ նախօրեին իր օգնականի միջոցով դատարանի նախագահին գրավոր դիմում է ներկայացրել, որպեսզի վերջինս թույլատրի երկուշաբթի օրվանից իրեն հասանելի արձակուրդից օգտվել։ Օգնականը դիմումը փոխանցել է գրասենյակի պետին։ Նույն օրը դատավոր Ալեքսանդր Ազարյանն անձամբ զանգել է դատարանի նախագահին և տեղեկացրել, որ դիմում է ներկայացրել, իսկ երեկ առավոտյան գրասենյակի պետը կապ է հաստատել օգնականի հետ՝ հայտնելով, որ դատարանի նախագահը դիմումը մերժել է, չի ստորագրել։ Ազարյանը մի քանի անգամ զանգահարել է դատարանի նախագահին, սակայն վերջինս հեռախոսազանգերին առ այս պահը չի պատասխանել, ինչից հետո դատավորը կապ է հաստատել գրասենյակի պետի հետ՝ պարզելու դիմումի չստորագրման պատճառը, սակայն վերջինս նշել է, թե տեղյակ չէ և առաջարկել մնացած հարցերը քննարկել դատարանի նախագահի հետ, որը, սակայն, զանգերին չի պատասխանել։

Դրանից հետո դատավորը երկրորդ դիմումն է ներկայացրել, պատճենն էլ ներկայացրել ԲԴԽ-ին, որպեսզի վերջիններս տեղյակ լինեն, որ Ազարյանը ցանկանում է արձակուրդ մեկնել և դատարանի նախագահը մի քիչ զգոն լինի, դիմումին ընթացք տա։ Երկրորդ դիմումը, սակայն, կրկին չեն մուտքագրել գրասենյակում։ Մասնավորապես, օգնականը դիմումը տարել է գրասենյակ, կապվել են գրասենյակի պետի հետ, որը, ըստ ստացված տեղեկությունների, ասել է չմուտքագրել այն։ Այսինքն՝ դիմումը նույնիսկ չի մուտքագրվել, հրաժարվում են մուտքագրել և այժմ դատավորը դիմումն էլեկտրոնային տարբերակով է ուղարկել ինչպես դատարանի նախագահին, այնպես էլ՝ ԲԴԽ-ին, փոխանցել նաև՝ առձեռն, այժմ սպասում է պատասխանին։ Իսկ թե ինչով է սա պայմանավորում՝ Ալեքսանդր Ազարյանը նշեց. «Ես դատարանի նախագահի հետ նորմալ հարաբերությունների մեջ եմ գտնվել, կարող եմ հստակ ասել, որ դա իր կամքը չէ, ենթադրում եմ, գրեթե վստահ եմ, որ դա իրեն թելադրվում է ԲԴԽ նախագահի պաշտոնակատարի կողմից»։

Հեղինակ՝ Իզաբել Սահակյան

Աղբյուր` Փաստինֆո