Փաստ ինֆո

«Անկեղծ ասած, ինձ էլ անակնկալի բերեցին այսօր՝ մամուլի ասուլիսի ընթացքում, Ռուսաստանի Դաշնության Արտաքին գործերի նախարար Լավրովի հայտնած մտքերը՝ Արցախի վերաբերյալ։ Խոսել Արցախի դելիմիտացիայի և դեմարկացիայի մասին, նշանակում է մի բան՝ աշխարհում իրավիճակ է փոխվում և, չի բացառվում, որ մենք ականատես ենք լինում նոր որոշումների ընդունման, որը շատ -շատերի համար անսպասելի և զարմանալի է լինելու»,- «Փաստինֆո» -ի հետ զրույցում ասել է միջազգայնագետ Գրիգոր Բալասանյանը, վերլուծելով Լավրովի հայաստանյան ասուլիսի ընթացքում այսօր հայտնած մտքերը։

Ինչպես արդեն տեղեկացրել ենք՝ Լավրովը, պատասխանելով Փառուխի շուրջ ստեղծված վիճակի վերաբերյալ լրագրողի հարցին, թե ի՞նչ է արվում ադրբեջանական զորքերը ելման դիրքեր վերադարձնելու ուղղությամբ՝ հայտարարել է «Ռուս զինվորականները և մեր հայ ընկերները խնդիրը պահում են ուշադրության կենտրոնում՝ որպես առաջնահերթություն։ Այնտեղ արդեն որոշակի արդյունքներ կան՝ իրավիճակի հանգուցալուծման հետ կապված։ Եվ մենք փոխըմբռնում ունենք, որ մեկնարկվող սահմանագծման գործընթացի շրջանակում այդ հարցը կքննարկվի և անպայման լուծում կստանա» ։

Գրիգոր Բալասանյանի դիտարկմամբ՝ ամեն անգամ, երբ ռուսական կողմը խոսում էր Հայաստանի և Ադրբեջանի միջև սահմանների դեմարկացիայի և դելիմիտացիայի մասին, Լավրովը մշտապես դիրքորոշում էր հայտնում, որ Արցախի կամ, ինչպես ինքն է սիրում ասել, Լեռնային Ղարաբաղի տարածաշրջանի (нагорно-карабахский регион) հարցը կապ ունենալ չի կարող Հայաստանի սահմանների դեմարկացիայի և դելիմիտացիայի հետ.«Եվ հիմա, երբ Լավրովը, բոլորի համար անսպասելի խոսում է Արցախի սահմանների դելիմիտացիայի և դեմարկացիայի մասին, շատերի խաղաթղթերն, ուղղակի, իրար է խառնում։ Չի բացառվում, որ հենց սրանով էր պայմանավորված այն փաստը, որ այսօր, Լավրովի այցից ընդամենը րոպեներ առաջ, ԱՄՆ դեսպանը, ժողովրդական լեզվով ասած, ափալ – թափալ վազում էր դեպի ՀՀ Արտաքին գործերի նախարարություն։ Հավանաբար, ծրագրում էական փոփոխություններ են եղել, որոնց մասին ամերիկյան կողմն ամենավերջում է տեղեկացել»։

Ըստ նրա՝ եթե Հայաստանի Հանրապետության իշխանություններն ու արտաքին գերատեսչությունը կարողանան ճիշտ կողմնորոշվել և վերջապես հասկանան, որ Արցախի հարցի լուծման բանալին գտնվում է Մոսկվայում, այլ ոչ թե Բրյուսելում, և, որ Միշելն այն անձնավորությունը չէ, ում հետ կարելի է բանակցել, ով, իրականում, ըստ էության, հարց լուծող էլ չէ, ապա սա նշանակում է, որ մենք կկարողանանք օգտվել այս հանգամանքից և, առնվազն, ԼՂԻՄ սահմաններով Արցախի վերականգնումը Ռուսաստանի Դաշնության համար դարձնելով ներքին խնդիր, մեզ կհաջողվի, ի վերջո, հայանպաստ լուծում ստանալ արցախյան հիմնահարցի վերաբերյալ։

Հարցին՝ ինչպե՞ս կարող էին բացահայտ և անթաքույց կերպով հավաքական Արևմուտքի շահերը սպասարկող հայաստանյան օրվա իշխանությունները նման շրջադարձ թույլ տալ, միջազգայնագետը պատասխանել է՝ սա նշանակում է, որ Ռուսաստանի Դաշնությունն իր ձեռքն է վերցնում ողջ գործընթացը, և գալու է մի պահ, երբ հայաստանյան իշխանություններն, ըստ էության, որևէ հարց, այլևս, չեն որոշելու։ Փոխարենը, հետսովետական երկրների ճակատագրերը որոշվելու են Մոսկվա – Վաշինգտոն հարաբերությունների և աշխարհաքաղաքական նոր սահմանների գծման համատեքստում։ Սա նշանակում է նաև, որ հետխորհրդային տարածքում Ամերիկայի Միացյալ Նահանգները կորցնում է իր ազդեցությունը՝ տեղը զիջելով՝ Ռուսաստան – Թուրքիա – Իրան եռանկյունուն, որին հետագայում կարող են միանալ նաև Չինաստանն ու այլ երկրներ։

Թե ինչպե՞ս լավրովյան այսօրվա անակնկալին կարձագանքի հավաքական Արևմուտքը, մասնավորապես, ԱՄՆ-ն ու Եվրոմիությունը, ովքեր վերջին շրջանում ահռելի ջանքեր էին ներդնում, Արցախյան հարցի էստաֆետը, վերջնականապես, իրենց ձեռքը վերցնելու համար, միջազգայնագետ Գրիգոր Բալասանյանը պատասխանում է՝ Լավրովն այսօր բացահայտ կերպով ցույց տվեց՝ ինչ որոշումներ էլ որ կայացնեն հավաքական Արևմուտքի ազդեցության տակ գործող հայաստանյան օրվա իշխանությունները, հարցերն այս տարածաշրջանում, լուծվելու է բացառապես և միայն աշխարհաքաղաքական կենտրոնների կողմից, որտեղ այս պահին որոշվում է ողջ հետ խորհրդային միության ճակատագիրը, և, անգամ մեծ ցանկության պարագայում, հայաստանյան իշխանությունները որևէ կերպ ի զորու չեն լինելու ազդել դրանց վրա։

Աղբյուր` Փաստինֆո