Փաստ ինֆո

«Արմենիա Մարիոթ» հյուրանոցում  այս պահին տեղի է ունենում դատական բարեփոխումներին վերաբերող միջոցառում, որին ներկա են նաև միջազգային կառույցների ներկայացուցիչներ, դատական իշխանության ամենատարբեր օղակների ղեկավար կազմի ներկայացուցիչներ, սակայն ընդդիմադիր պատգամավորներից որևէ մեկը հրավիրված չէ։ Այս մասին լրագրողների հետ զրույցում ասաց ԱԺ «Պատիվ ունեմ» խմբակցության քարտուղար Հայկ Մամիջանյանն ու հավելեց, որ  իրենք էլ՝ «Հայաստան» և «Պատիվ ունեմ» խմբակցությունների պատգամավորները, ցանկություն են հայտնել մասնակցել և ներկայացնել Հայաստանում դատական իշխանության իրական իրավիճակը։

«Ցանկանում էինք խոսել քաղաքական հայացքների համար բանտարկված անձանց մասին, որոնց թիվն արդեն տասնյակների է հասնում, ոստիկանական բռնություններից, դրանց վերաբերյալ դատական իշխանության լռությունից։ Երևի խնդիրն այն է, որ ՍԴ աշխատակիցները, որոնք այս միջոցառման կազմակերպիչն են, ԵԽԽՎ զեկույցներ չեն կարդում, Արարատ Միրզոյանին չեն լսում, տեղյակ չեն, որ մենք ժողովրդավարության բաստիոն ենք։ Երկրագնդի ամենաժողովրդավար երկիրն ենք»,-ասաց Հայկ Մամիջանյանը։

Ընդդիմադիր պատգամավորի խոսքով՝  ժողովրդավարության այն փուչիկը, որն ամեն օր տարբեր տեղերում փորձում է փչել Փաշինյանը, շուտով պայթելու է։

«Այն վաղ թե ուշ պայթելու է: Իսկ թե ինչ իրավիճակում է դատական իշխանությունը, ինչպես են գործեր կարվում, սա նույնիսկ զանգով արդարադատություն չի, սա կնոպկայով արդարադատություն է, որոնց մասին ավելի մասնագիտական կխոսենք դեռ»,-նշեց Մամիջանյանը։

Աղբյուր` Փաստինֆո