Փաստ ինֆո

Իշխող ուժի վարկանիշը կտրուկ նվազել է՝ դառնալով մոտ 20%, բայց դրա հաշվին ընդդիմության ձայները չի ավելացել, հասարակության շուրջ 40%-ը չի տեսնում այն այլընտրանքը, որն իրենց համար ընդունելի լուծումներ կառաջարկի: «Փաստինֆո»-ի հետ զրույցում նման տեսակետ է հայտնել Gallup International Association-ի հայաստանյան ներկայացուցչության տնօրեն Արամ Նավասարդյանը:

Նրա խոսքով՝ իրականում հասարակության ավելի մեծ մասն է դժգոհ գործող իշխանություններից, սակայն նրանց միայն մի մասն է մասնակցում ընդդիմության՝ Նիկոլ Փաշինյանի հրաժարականի պահանջով ակցիաներին: Սրա հիմնական պատճառը, ըստ Արամ Նավասարդյանի, այն է, որ մարդիկ չեն տեսնում այն ուժը, որը կկարողանա իրենց համար ընդունելի եղանակով լուծումներ առաջարկել խնդիրներին.

«Շատ անգամ ընդդիմության ասում են՝ չեք կարողանում մեծ թվով մարդիկ հավաքել, բայց երբ տեսնում ես, ովքեր են դա ասում, հասկանում ես, որ անգամ 10%-ը դրա չեն կարող հավաքել, իսկ թե որքան մարդ կհավաքվի՝ դա կախված է մեսիջներից, ով է կազմակերպում և արդյո՞ք դա արդյունքին միտված միջոցառում է, թե հերթական միջոցառումն է, քանի որ մարդիկ 1-2 անգամ մասնակցելով, կարող են երրորդ անգամ չմասնակցել՝ելնելով նրանից, որ չեն տեսնում փոփոխություն »,-ասաց Նավասարդյանը:

Զրուցակցի արձանագրմամբ՝ երկրորդ պատճառն այն է, որ ընդդիմության շրջանում չկա հստակ ուրվագծված լիդեր.

«Ապակենտրոն մոտեցումները, միգուցե, ընդունելի լինեն, բայց գալիս է մի փուլ, երբ որևէ մեկը պետք է ստանձնի պատասխանատվությունը և առաջնորդի հանրությանը, եթե չկա հստակ ուրվագծված առաջնորդ, դժվար է մարդկանց համոզել, որ առաջնորդը հետագայում ի հայտ կգա։ Երբ ընդդիմությունը խոսում է 250-հոգանոց ցուցակի մասին, դա լավ գաղափար է, բայց եթե դա չի հիմնավորվում կոնկրետ անուններով, ապա դա ճիշտ չէ, քանի որ այստեղ քանակը չի խնդիրը, այլ՝ որակը, մի՞թե նրանք այդքան խոցելի անձինք են, որոնք կարող են խնդիրներ ունենալ, երբ իրենց անունները հրապարակվեն, թե ուղղակի են ասում , որ այդ մարդիկ կան։ Ինձ համար գաղափարը լավն է, բայց ամորֆ է, մարդիկ մտածում են՝ ասեցին 250 հոգի, բայց ովքեր են նրանք, այստեղ իդեայի մաշում է գնում: Եթե կա 5-6 լիդեր շարժման մեջ, սա լավ է, բայց կորցնում է հստակությունը, իսկ ում ասածն է որոշիչը, օրինակ՝ որևէ ձեռնարկությունում չկա մի քանի տնօրեն, կա մեկ տնօրեն և տեղակալներ՝ տարբեր ուղղություններով, հիմա քանի չկա տնօրենը, ով պատասխանատվություն է կրում, դա բերում է նրան, որ տեղակալները ոչ այնքան են պատրաստ ստանձնել պատասխանատվություն կամ կտրուկ քայլերի են պատրաստ գնալ»,-ասաց Նավասարդյանը:

Փորձագետը նկատում է՝ վերջին մեկ ամսում ընդդիմության գործողություններում հստակ քայլեր չեն նկատվում, մինչդեռ հանրությունը ավելի ռեալ գործողություններ է սպասում

«Քայլերթը լավ միջոցառում է, բայց երբ դա կրկնում ես ամեն օր և ոչ մի կոնկրետ արդյունք չես արձանագրում, դա լուծում չէ, երբ գործողությունները չեն բերում արդյունքի, ապա դա այդքան էլ լավ չի անդրադառնա շարժման վրա: Եթե ընդդիմությունն ասում է՝ 30-40 հազար մարդ է հավաքվում, իշխանությունն էլ ասում է՝ 5000 մարդ, կարելի է 5000-ով էլ քայլեր անել, եթե հիշում եք Նիկոլ Փաշինյանը մոտ 100-150 հոգու հետ գրավեցին ռադիոտունը, չեն ասում, որ ճիշտ են արել, բայց դա կոնկրետ քայլ էր: Նիկոլ Փաշինյանը, որպես այդպիսի գործողությունների պրոֆեսիոնալ, դա իրականացրել է, իրեն նաև սովորեցրել են, այդպիսի միջոցառումների «հակաթույնը », լավ խոսք կա՝ «եկել եք սատանի մայլա, քյանդրբազություն եք անում», այն գործողությունները, որոնք հիմա ընդդիմությունն է փորձում անել, Նիկոլ Փաշինյանին պրոֆեսիոնալ մակարդակով սովորեցրել են և պետք է խոստովանել, որ 5+ գնահատականով ինքն այդ ամենը իրականացրել է, տիրապետում է այդ տեխնոլոգիաներին, ուստի տիրապետում է նաև դրա «հակաթույնին »,-ասաց նա և հավելեց. «Մարդիկ նույն տեքստերը, մեսիջները լսելով հոգնում են, ոնց հասկանում եմ Նիկոլ Փաշինյանը և իր թիմը շատ հմուտ օգտագործում են դա, ինչպես նախորդ պայքարի ժամանակ, իրենք թողնում են, որպեսզի շարժումն ինքնուրույն մարի , երևացող հակազդեցություն չեն ցույց տալիս, վրանները չեն խլում, որպեսզի հետ ասեն՝ձեր առաջ քաշած մեսիջները ոչ մի արձագանք չգտան և դուք ինքներդ մաշվեցիք»,-ասաց Նավասարդյանը:

Զրույցի վերջում փորձագետն ընդգծվեց՝եթե շարժումը մարի և որևէ արդյունք չլինի, դա կլինի ամենավատ գործողությունը, որը ընդդիմությունը կարող էր անել.

«Չի կարելի հերթական անգամ հիասթափեցնել ժողովրդին, բայց եթե այդպես լինի, ապա հետագայում նույնիսկ այլ ընդդիմադիր ուժեր մեծ դժվարությունների կհանդիպեն՝ ձգտելով մարդկանց հանել փողոց »,-ասաց նա:

Աղբյուր` Փաստինֆո