Փաստ ինֆո

«Փողոցային պայքարի ընթացքում, ամեն ինչից բացի, բավականին լուրջ նյարդերի պայքար է գնում նաև, ընդ որում՝ երկու կողմերից էլ, և սա, գնալով, ավելի ու ավելի է շատանալու»,- «Փաստինֆո» -ի հետ զրույցում ասել է քաղտեխնոլոգ Կարեն Քոչարյանը՝ վերլուծելով հունիսի 3-ի դատապարտելի միջադեպը։ Հիշեցնենք, որ հունիսի 3-ին՝ Կառավարական ամառանոցների հարևանությամբ, ուժայինները, անսպասելի, ագրեսիվ վարք ցուցաբերեցին՝ բռնություն ու հատուկ միջոցներ կիրառելով խաղաղ ակցիայի մասնակիցների նկատմամբ։

Կարեն Քոչարյանը նկատում է՝ բացի այն պայքարից, որ ընթանում է բոլորի աչքի առաջ և տեսնում են բոլորը, կա նաև անտեսանելի պայքար. «Այստեղ, այս անտեսանելի պայքարում, բոլորը հասկանում են՝ պարտվելու է նա, ում նյարդերն առաջինը տեղի կտան։ Ինչ վերաբերում է հունիսի 3-ի դեպքերին, ապա, միանշանակ կերպով պետք է փաստենք, որ իշխանական կողմի նյարդերը, պահի տակ տեղի տվեցին։ Ե՛վ դրանից առաջ, և՛ դրանց հետո ակցիաներին մասնակցող ցուցարարները նույն կերպ անցել էին ոչ միայն Կառավարական ամառանոցի, այլ նաև՝ շատ ու շատ այլ պետական հիմնարկների կողքով, ակցիաներ էին իրականացրել դրանց դիմաց, բայց ոչ մի անգամ նմանօրինակ վարք ու միջադեպ, ոստիկանական ուժերի կողմից, չէր գրանցվել, չնայած որ, բիրտ ուժի կիրառումներ, իհարկե, այս կամ այն կերպ եղել էին։ Հունիսի 3-ի դեպքերից հետո, իշխանությունն արագ կերպով հավաքեց իրեն, սթափ ուղեղով վերլուծեց ու հասկացավ, որ դա այլ բան չէր, քան տեղիք տված նյարդերի հետևանք ու, որ կարող է տանել պարտության, հենց այդ պատճառով էլ հաջորդ օրը, նույն տեղում իրականացված նույնաբովանդակ ակցիայի ընթացքում, որևէ տեսակի միջադեպ չգրանցվեց»,- ասել է Կարեն Քոչարյանը։

Արդյո՞ք առաջիկա օրերին Ռուսաստանի Դաշնության Արտաքին գործերի նախարար Սերգեյ Լավրովի հայաստանյան այցը կարո՞ղ է որևէ տեսակի հետևանքներ թողնել «Դիմադրության» շարժման, փողոցային պայքարի ընթացքի կամ ծրագրերի վրա, Կարեն Քոչարյանը պատասխանում է՝ ո՛չ Լավրովը, ո՛չ Վոլոդինը չեն գալիս հայաստանյան ներքին օրակարգերի քննարկման նպատակով, դրանք ՀԱՊԿ ծրագրերի շրջանակներում նախատեսված պաշտոնական այցեր են. «Մյուս կողմից, երբ նրանք հենց այս շրջանում այցելում են Հայաստան, ապա պարզ է, որ չի կարող որևէ տեսակի խոսակցություն չլինել այն մասին, թե ինչո՞ւ է հայաստանյան կողմն այսքան շահագրգռված 2020 թվականի նոյեմբերի 9-ին ստորագրված փաստաթղթի մեջ ներքաշել Բրյուսելին, ինչին բազմիցս, անթաքույց դեմ է արտահայտվել պաշտոնական Մոսկվան։ Հետևաբար, Հայաստան գալուց հետո, այս թեմայով խոսակցություններ չլինել չեն կարող»,- նկատել է բանախոսը։

Ավելի քան մեկ ամիս փողոցային պայքարի դուրս եկած ընդդիմություն ուր է, ի վերջո, հասել, արդյո՞ք փակուղային իրավիճակում են հայտնվել ընդդիմության առաջնորդները, հարցին ի պատասխան՝ Կարեն Քոչարյանն արձագանքում է՝ փակուղու մասին խոսք, անգամ, լինել չի կարող. «Պայքարի այս ողջ ընթացքում, ընդդիմությունը բավականին հետաքրքիր փաստեր է ֆիքսել, ի դեպ, այնպիսի փաստեր, որոնք չէին սպասում ո՛չ իշխանությունը, ո՛չ էլ, հենց իրենք՝ ընդդիմությունը։ Օրինակ, բոլորը, մեղմ ասած, զարմացած են, որ հնարավոր էր այսքան տևական, երկար ժամանակով փողոցում ունենալ բավականին լուրջ զանգված։ Սա, հաստատ, ընդդիմության ֆիքսված հաջողություններից մեկն է, որը գալիս է մեկ անգամ ևս ապացուցելու հետևյալը՝ անկախ ամեն ինչից, երկրի ներսում կա ճգնաժամ, որը խիստ լուրջ է և, որի հանգուցալուծումը հենց այնպես մաշեցնել չի հաջողվի, ինչպես  կարծում և արտահայտվում էին իշխանությունները»։

Ամփոփելով դրությունը Կարեն Քոչարյանն ասում է՝ ստեղծված իրավիճակից դուրս գալու համար թե՞ իշխանությունը, թե՛ ընդդիմությունը փորձելու են, ամեն մեկն իր համար բարենպաստ ելքեր փնտրի, սակայն, մեկ փաստ ակնհայտ է՝ իշխանության շանսերն այս պայքարում գնալով նվազում են, և սա կապված է ոչ թե ընդդիմության կատարած գործողություններով, այլ աշխարհաքաղաքական զարգացումների և վերադասավորումներ հանգամանքով։

Աղբյուր` Փաստինֆո