Փաստ ինֆո

Արևմտյան որոշ երկրների և կազմակերպությունների լռությունն ունի որոշակի արժեք, հիմնավոր կասկածներ ունեմ, որ այդ արժեքները Նիկոլ Փաշինյանը վճարում է՝ ի հաշիվ Ղարաբաղյան հակամարտության շուրջ ընթացող բանակցությունների: Պետությունը դնել նման խոցելի իրավիճակում և իրականացնել հակաժողովրդական, հակամարդկային գործողություններ սեփական ժողովրդի դեմ, երբ երկիրը գտնվում է բանակցային կարևորագույն փուլում, սրան ունակ են միայն մարդիկ, որոնք զուրկ են պետական մտածողությունից:«Փաստինֆո»-ի հետ զրույցում ասել է «Պատիվ ունեմ» խմբակցության քարտուղար Հայկ Մամիջանյանը՝ անդրադառնալով ուրբաթ օրը կառավարական առանձնատներին հարող տարածքում ցուցարարների նկատմամբ բիրտ ուժ, հատուկ միջոցներ կիրառելուն։

Հիշեցնենք, որ ուրբաթ օրը «Դիմադրության» շարժման հերթական քայլերթի ժամանակ, երբ ցուցարարները կառավարական առանձնատանը հարող տարածքից պատրաստվում էին քայլերթով շարժվել դեպի ԱԺ, ոստիկաններն աննախադեպ բիրտ ուժ կիրառեցին ցուցարարների նկատմամբ, մինչև անգամ լուսաձայնային նռնակներ կիրառեցին, ինչի հետեւանքով մի քանի տասնյակ մարդ տեղափոխվել է հիվանդանոց։ Ընդդիմադիրները ոստիկանության այս գործողությունները բնութագրել էին որպես «Կոլցո» օպերացիա:

Հայկ Մամիջանյանը մեզ հետ զրույցում ընդգծեց՝ ընդդիմությանը երթը խաղաղ բնույթ էր կրում, իսկ հետևանքների ողջ պատասխանատվությունը կրում է իշխանությունը:

Նկատենք, որ միջադեպի անմիջապես հաջորդ օրը, երբ ցուցարարները կրկին կառավարական առանձնատան դիմաց էին, այս անգամ ոստիկանները թույլ տվեցին, որ քաղաքացիները շարունակեց իրենց երթը:

Թե ինչու՞ ոստիկանները հենց այդ օրը որոշեցին բիրտ ուժ կիրառել, Հայկ Մամիջանյանը հորդորեց այս հարցն ուղղել ոստիկաններին: Պատգամավորը,սակայն, նաև հաստատեց, որ միջադեպի օրերին ոստիկանապետ Վահե Ղազարյանը երկրում չի եղել:

Ինչ վերաբերում է ընդդիմության հետագա քայլերին՝ արդյո՞ք մարտավարական փոփոխություններ կլինեն ընդդիմադիրների գործողություններում, Մամիջանյանն ասաց.

«Մեր բոլոր գործողությունները համաձայնեցվում և հայտարարվում են հարթակից՝ հանրության հետ երկխոսելու արդյունքում, այնպես որ սպասեք այսօրվա հանրահավաքին»:

Աղբյուր` Փաստինֆո