Փաստ ինֆո

Վերաքննիչ քրեական դատարանում՝ դատավոր Կարեն Բիշարյանի նախագահությամբ, կայացել է Նիկոլ Փաշինյանի կողմից առերևույթ պետական դավաճանություն կատարելու հատկանիշներով քրեական գործ հարուցելու պահանջով բողոքի քննությունը։

«Փաստինֆո»-ի թղթակցի հաղորդմամբ՝ դատարանն անցել է բողոքի բուն քննությանը։ Փաստաբան Հակոբ Մարտիրոսյանն այսօր ներկայացրել է բողոքի հիմքերը՝ հիշեցնելով, որ հաղորդումը ներկայացվել էր վարչապետի պաշտոնը զբաղեցնող ՀՀ քաղաքացի Նիկոլ Փաշինյանի կողմից առանձնապես ծանր հանցագործություն՝ պետական դավաճանություն կատարելու, ինչպես նաև՝ պաշտոնեական լիազորություններն անցնելու վերաբերյալ։

Պաշտոնեական լիազորություններն անցնելու դրվագը վերաբերում է 2020թ նոյեմբերի 9-ի հայտարարության՝ միջպետական պայմանագիրն առանց վավերացման ստորագրելուն։ Ըստ Մարտիրոսյանի՝ դատախազությունն իրավունք չուներ ներկայացված հաղորդումն ուղարկելու, կցելու մեկ այլ քրեական գործի։ Դա, բողոքաբեր կողմի գնահատմամբ, օրենքի դաշտից դուրս գործողություն է, հետևաբար անգործություն է ցուցաբերվել.պետք է որոշում կայացվեր՝ քրեական գործ հարուցելու, հարուցումը մերժելու մասին կամ ուղարկվեր ըստ ենթակայության՝ նյութեր նախապատրաստելու, ինչն այս պարագայում չի իրականացվել։

Փաստաբանը հիշեցրեց նաև այն, որ առաջին ատյանի դատարանի դատավոր Կարեն Ֆարխոյանը մերժել է բողոքն այն դեպքում, երբ համանման դեպքով՝ Արա Զոհրաբյանի բողոքի վերաբերյալ առաջին ատյանի դատարանը բավարարել էր։ Մարտիրոսյանը նշեց, որ դատախազի անգործության հետևանքով զոհված զինծառայողների ծնողներին տևական ժամանակ տուժողի կարգավիճակ տրված չի եղել, ինչի հետևանքով՝ այս բողոքի շրջանակներում ծնողները զրկված են իրենց ներկայացուցչությունից։ Առաջին ատյանի դատարանի որոշումը, որով մերժվել էր իրենց բողոքը, Մարտիրոսյանի գնահատմամբ՝ անհիմն է. Կարեն Ֆարխոյանը շահագրգիռ է եղել գործի ելքով, չի պահպանել օրենքի պահանջը։ Նախագահող դատավոր Բիշարյանն արձագանքեց՝ հորդորելով վիճարկել որոշումն՝ առանց նման գնահատականների։

Հակոբ Մարտիրոսյանը ուշադրություն հրավիրեց նաև այն հանգամանքի վրա, որ Նիկոլ Փաշինյանը Մովսես Հակոբյանի հայտարարությունների վերաբերյալ քրեական գործով մեղադրյալի կարգավիճակ չունի, հետևաբար, հաղորդումը չէր կարող կցվել այդ գործին։ Բացի այդ՝ փաստաբանը պետական դավաճանության հատկանիշներով առանձին գործի չհարուցումը կապում է Նիկոլ Փաշինյանի անձով։ «Ինչու չեք ցանկանում քրեական գործ հարուցել պետական դավաճանության հատկանիշներով»,- հռետորական հարց բարձրացրեց Մարտիրոսյանը։ Ապա` նաև հետաքրքրվեց, թե ինչու ՞ դատախազությունը չի ցանկանում զոհված 5000 մեր զավակների վերաբերյալ մասն անջատել Մովսես Հակոբյանի հայտարարությունների հիման վրա ՔՕ 308-րդ հոդվածով հարուցված գործից։

Բողոքաբեր կողմը միջնորդեց՝ ամբողջությամբ բեկանել առաջին ատյանի դատարանի որոշումը։

Հիշեցնենք, որ նախկին դատախազ Հակոբ Մարտիրոսյանը և Արծվիկ Մինասյանը դեռևս 2021թ. հունիս ամսին ներկայացված հանցագործության մասին հաղորդման մասին է։ Մասնավորապես, նրանք հաղորդում էին ներկայացրել՝ պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։ Ներկայացված հանցագործության մասին հաղորդմամբ Հակոբ Մարտիրոսյանը ներկայացրել է փաստական հանգամանքներ, որոնք առերևույթ վկայում են Նիկոլ Փաշինյանի կողմից թշնամի պետությանն օգուտ տալու մասին՝ ի վնաս ՀՀ-ի։ Ներկայացված հանցագործության մասին հաղորդումն առանձին քննության առարկա չի դարձվել, մասնավորապես, դատախազությունը հաղորդումը «մասնատել» է և մի մասով ուղարկել է ԱԱԾ քննչական դեպարտամենտ՝ Շուշիի անկման և Արցախի հարավային ուղղությամբ կատարված իրադարձությունների վերաբերյալ քրեական գործի, իսկ մի մասով՝ ՀՔԾ-ում քննվող՝ Մովսես Հակոբյանի կողմից ասուլիսում արված հայտարարությունների առթիվ հարուցված քրեական գործի շրջանակներում։ Դատախազության կողմից հաղորդմանը պատշաճ կարգով ընթացք չտալու հանգամանքը դիտարկվել է որպես անգործություն և դատախազության անգործության դեմ փաստաբանը բողոք է ներկայացրել դատարան։ Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, մերժել էր բողոքը։ Դատարանի այս որոշման դեմ վերաքննիչ բողոք է ներկայացվել, որը մակագրվել է Վերաքննիչ քրեական դատարանի դատավոր Կարեն Բիշարյանին։

Հեղինակ՝ Իզաբել Սահակյան

Աղբյուր` Փաստինֆո