Փաստ ինֆո

«Մայիսի 28-ի վաղ առավոտյան` ժամը 6-ի կողմերը, մոտ 10 տղամարդ մուտք են գործել Պավել Մանուկյանի բնակարան և ասել են՝ դուք չգիտե՞ք, թե ի՞նչ է եղել, մենք ձեզ պետք է ձերբակալենք։ Երբ Մանուկյանը խնդրել է, որպեսզի պարզաբանեն՝ ի՞նչ հիմքով են իրեն ձերբակալում, պատասխանել են՝ դու պետք է դա իմանաս»,- «Փաստինֆո» լրատվականի եթերում այս մասին ասում է օրեր առաջ ձերբակալված ազատամարտիկ Պավլիկ Մանուկյանի պաշտպան Զարուհի Փոստանջյանը և հավելում՝ մինչ այս պահը, որևէ մեկն, անգամ, ազատամարտիկի ընտանիքի անդամները, տեղյակ չեն եղել, թե որտեղ է պահվում վերջինս։ Միայն այսօր է ինքն այցելել «Նուբարաշեն» ՔԿՀ և տեսակցել Պավլիկ Մանուկյանի հետ։

«Նույնիսկ, եթե, մարդուն վերցնում են արգելանքի տակ, հարազատներին, պարտադիր, պետք է տեղեկացնեն, թե ո՞ւր են տեղափոխում մարդուն և ի՞նչ իրավական հիմքի վրա են դա անում։ Պաշտոնապես ոչ մի զանգ կամ տեղեկատվություն չի փոխանցվել, բացի այդ՝ պաշտոնապես որևէ որոշում չի ներկայացվել։ Ստացվում է, որ առանց որևէ փաստաթուղթ տրամադրելու կամ որոշում ցույց տալու, Պավել Մանուկյանին, նախ տեղափոխել են Կենտրոնի Ոստիկանական բաժանմունք, որտեղից ժամեր անց՝ քրեակատարողական հիմնարկ»,- ասում է Զարուհի Փոստանջյանը։

Երբ «Նուբարաշեն» ՔԿՀ-ում Պավել Մանուկյանի պաշտպան Զարուհի Փոստանջյանը փորձել է պարզել, թե ի՞նչ իրավական հիմքերով են նրան ընդունել քրեակատարողական հիմնարկ, վերջինիս պատասխանել են, որ Առաջին ատյանի դատարանի դատավոր պարոն Մակյանի կողմից կարգադրութուն է արձակվել, որի հիմքում ընկած է Վճռաբեկ դատարանի որոշումը, որը, Զարուհի Փոստանջյանի փոխանցմամբ, իբրև թե, կայացվել է մայիսի 26-ին, սակայն, նույնիսկ, քրեական դատավարության օրենսգրքի պահանջը՝ հրապարակել այն դատական իշխանության պաշտոնական կայքում, չի կատարվել՝ որոշումը չկա, բացակայում է։

Զարուհի Փոստանջյանը հավելում է՝ վերոհիշյալ ապօրինություններին գումարվում է նաև այն հանգամանքը, որ իր պաշտպանյալ Պավել Մանուկյանի առողջական վիճակը համատեղելի չէ կալանքի հետ, այս հանգամանքը, նույնպես, հաշվի չի առնվել։

Ամփոփելով զրույցը, Զարուհի Փոստանջյանը խոսքն ուղղում է Վճռաբեկ դատարանի դատավորներին՝ հռետորական հարցադրում կատարելով նրանց. «Դուք ձեր ապագայի մասին չե՞ք մտածում.. Մի հատ նայեք ովքեր մի քանի տարի առաջ ինչե՞ր էին անում, ի՞նչ են անում կամ որտե՞ղ են նրանք հիմա։ Հատուկ կարգադրությունների ներքո իրենց թալանը տեղափոխելով Շվեյցարական բանկերի հաշվեհամարներին, նրանք դեռ չգիտեն, թե ի՞նչ է իրենց սպասվում ապագայում։ Եվ հիմա մտածում եք՝ այն, ինչ դուք եք ապօրինաբար կամ պարգևավճարով ձեռք բերել, իսկապես դա ձեզ է մնալու՞…»,- ասում է Փոստանջյանը։

Մանրամասները՝ տեսանյութում։

Աղբյուր` Փաստինֆո