Փաստ ինֆո

Դատախազությունն Առուշ Առուշանյանի գործով դատավճռի դեմ բողոք է ներկայացրել։ Պահանջում է բեկանել արդարացման դատական ակտը։

Այսինքն, ի՞նչ է ստացվում, դատախազությունը կույր ու խուլ է բոլոր այն դեպքերում, երբ հանիրավի դատապարտվում են մեր քաղաքացիները, երբ խաղաղ ցուցարարները բռնի ուժով բերման են ենթարկվում անհեթեթ մեղադրանքներով, երբ ակնհայտ սարքովի գործերով ազատազրկման են դատապարտվում քաղաքական գործիչները, երբ բռնաբարվում է ՀՀ Մայր օրենքը, երբ մի ողջ իրավապահ ոլորտ պատերազմում նահատակվածների հարազատներին մի կառույցից մյուս կառույցն է հրում՝ ժամանակ ձգելով․․․

Նույն կերպ՝ մեր ռազմագերիների և անհայտ կորածների հետ կապված՝ իրավապահ ոլորտն ուղղակի պապանձված վիճակում է։ Պատկերացնու՞մ եք՝ ինչ վայնասուն կբարձրացներ նման դեպքերում հարևան երկրի ղեկավարը, նրանց իրավապահները, իսկ սրանց վեջն էլ չի, որ 2020 թվականի նոյեմբերի 9-ի եռակողմ համաձայնագիր կոչվածը սկզբից մինչև վերջ ադրբեջանը խախտել է։

Փոխարենը, բան է, երբ մի դատավոր արդար վճիռ է կայացնում՝ Առուշ Առուշանյանի սարքովի գործը՝ վկա, այս կառույցն անմիջապես իրեն զգացնել է տալիս, ընդ որում, միշտ օրենքի և իրավունքի, ՀՀ Սահմանադրության դեմ, Հայաստանի քաղաքացու դեմ։

Բնականաբար, ի շահ փաշինյանի աթոռի, կամքի, հրամանի և հրահանգի։

Այսօր ԲԴԽ-ում տեղի ունեցավ խայտառակ երևույթ․ երբ ի վերջո, երկար բանակցելուց հետո Ջհանգիրյանն ընդունեց զոհված հայորդիների ծնողներին, պարզվեց, որ դատարանը որոշել է հետագա նիստերը շարունակել առանց լրատվամիջոցների և առանց տուժողների։ Ժողովրդավարություն, խոսքի ազատություն՝ օդի փչոց են , որոնց ոտնահարման ավելի լավ նախադեպ դժվար թե գտնվեր։

Այսինքն, միայն վերջերս տուժողի կարգավիճակ ստացած՝ 44-օրյա պատերազմում նահատակվածների ծնողները, ըստ տվյալ դատը վարող դատավորի, չպետք է մասնակցեն իրենց որդիներին ԱԺ-ում սեփական ինքնախոստովանական ցուցմունքով՝ սպանդի տարածի դեմ դատական հայցի քննությանը։ Հարց է ծագում՝ իսկ դատական նիստի որպես առանձին կողմ հանդես եկող «տուժողներին» ո՞վ պիտի ներկայացնի․․․միայն պաշտպա՞նը․․․

Ըստ ամենայնի, այս անմարդկային արարածները հոգեբանորեն ամեն կերպ ուզում են ճնշել ծնողներին։ Ո՞ր մեղքի համար, նրա, որ հայրենիքի համար իրենց որդիները կյա՞նքն են զոհել։

Դատելով փեշն առաջինը փաշինյանի վրա գցող գլխավոր դատախազի առաջանցիկ քայլերից, նա ոչ մեկին չի զիջի իր այդ գործառույթը, ավելին, չի բացառվում նույնիսկ, որ վերջում նրա պաշտպանյալը դառնա տուժող կողմ, իսկ ծնողներն էլ՝ մեղավոր․․․

Ծուռ հայելիների աշխարհում ենք հայտնվել։ Տևականորեն։

Ի վերջո, գործ ունենք 5000 երիտասարդ կյանքեր սառնասրտորեն զոհաբերողի հետ, որը դեռ ասֆալտին փռելով և պատերին ծեփելով զբաղված ժամանակ էր հոխորտում, թե՝ «ո՞վ է այն դատավորը, որ կհամարձակվի դեմ դուրս գալ․․․»։

Հաստատ Բիշարյան ազգանունով անձը երբևէ չի կարող լինել այդ դատավորը․․․

Աղբյուր` Փաստինֆո