Փաստ ինֆո

Ընդդիմության հանրահավաքին մասնակցելու համար Ագրարային համալսարանի ՈՒԽ նախագահին իբրև շահագրգռելու վերաբերյալ քրեական գործով Էմմա Սարգսյանին ձերբակալելու որոշման դեմ բողոք է ներկայացվել։ Այս մասին «Փաստինֆո»-ն տեղեկանում է Էմմա Սարգսյանի պաշտպան Ռուբեն Մելիքյանից։

Ինչպես արդեն տեղեկացրել ենք՝ Էմմա Սարգսյանը և Ավետիք Չալաբյանը ձերբակալվել են երեկ՝ ՔԿ-ում քննվող քրեական գործի շրջանակներում։ Նշենք, որ Էմմա Սարգսյանն ինքնակամ ներկայացել էր վարույթն իրականացնող մարմին՝ իմանալով քրեական գործի մասին, միայնակ մայր է և այժմ նրա 14-ամյա դուստրը միայնակ է մնացել տանը։

Ընդ որում, թեև Սարգսյանն ինքնակամ էր ներկայացել, քննիչը որպես ձերբակալության նպատակ մատնանշել էր փախուստը կանխելը, ինչը փաստաբանի գնահատմամբ, ողջամիտ համարվել չէր կարող, ինչպես նաև՝ քննիչի կողմից մատնանշվել է անմիջականորեն ծագած կասկածը, որը ևս, ըստ փաստաբանի, գոյություն ունենալ չէր կարող։

Մելիքյանի գնահատմամբ՝ վերջին շրջանում իրականացվող հետապնդումները, հարուցվող քրեական գործերը նպատակ են հետապնդում խոչընդոտելու քաղաքացիներին՝ ազատորեն իրականացնելու իրենց իրավունքները, որովհետև մարդկանց մոտ մտցնում են սխալ պատկերացում այն մասին, որ ակցիաներին մարդիկ են գալիս՝ գումարի դիմաց։

«Քաղաքական իշխանությունները ոչնչի առջև չեն խորշում՝ 14 տարեկան աղջիկ ունեցող միայնակ մորը ձերբակալելուց սկսած, մինչև՝ գործակալների՝ պրովոկացիա անելու և ինչ-որ բաներ կորզելու, ձայնագրելու և համացանցում տարածելու այդ արատավոր պրակտիկան։ Իրականում իշխանությունն օգտագործում է իր ձեռքի տակ եղած միջոցները՝ քաղաքական հակառակորդների դեմ, սակայն դա ձևակերպում են որպես օրինական կամ իրավական գործընթաց, դրանք իրար հետ որևէ կապ չունեն, մաքուր քաղաքական գործեր են՝ թե Ավետիք Չալաբյան, Էմմա Սարգսյան գործը, թե՛ մի շարք այլ գործեր, որոնք այս ընթացքում հարուցվել են և հանգեցրել են անձանց ազատությունից զրկելուն»,-նշեց Մելիքյանը։

Անդրադառնալով տարածված ձայնագրությանը՝ Ագրարային համալսարանի ՈՒԽ նախագահի մասնակցությամբ, հարցին՝ վերջինս է ձայնագրել, թե ոչ, Մելիքյանը զերծ մնաց դատողություններ կատարելուց, միայն նշեց, որ եթե մարդիկ հետաքրքրվեն, տեսնեն այդ մարդու հրապարակային խոսքը, թե որտեղ են նրան ամբիոն տրամադրում, որտեղ է առաջինը տպագրվել դա, ապա կտեսնեն, որ դա լավ կազմակերպված և ինչ-որ առումով ստացված սադրանք էր։

Հարցին՝ արդյոք ձայնագրության աղբյուրը հայտնի է, դա թույլատրելի ապացույց կարո՞ղ է համարվել՝ Մելիքյանը պատասխանեց, որ դա կարևոր հարց է, որը դատավարական առումով բարձրացվելու է, միջնորդություն կներկայացվի հետագայում։

«Արդեն վատ պրակտիկա է դառնում, երբ չգիտես թե որտեղից այսպիսի «ձայնագրություններ» են հանդես գալիս և մարդկանց նկատմամբ հետապնդումներ են իրականացվում։ Օրինակ՝ հայտնի պատմության ուսուցչի գործը, որով ձայնագրությունն անթույլատրելի ճանաչվեց։ Սա նոր պրակտիկա է, նոր ձեռագիր է»,- նշեց Մելիքյանը։

Անդրադառնալով հարցին, թե արդյո՞ք կասկածանքի շուրջ Էմմա Սարգսյանն արդեն դիրքորոշում հայտնել է, թե ոչ՝ փաստաբանը նշեց, որ պատրաստվում էին գնալ և մանրամասն խոսել, բայց երբ քննիչը որոշում կայացրեց ձերբակալման մասին, այդ ամենը տևել է չորս ժամ և ժամը 04-ի սահմաններում հնարավորություն էր տրվել՝ ինչ-որ բան ասելու, սակայն այնքան ուշ էր, որ ցանկության դեպքում էլ չէին կարող կապակցված բան ասել, դեռևս ցուցմունք չի տրվել, սակայն դա չի նշանակում, որ ասելիք չունեն։

Ինչ վերաբերում է Էմմա Սարգսյանի անձը բնութագրող հատկանիշներին, փաստաբանը նշեց, որ Սարգսյանը երեք բուհ է ավարտել՝ Հայաստանում, Գերմանիայում, մեր երկրին բազմաթիվ ծառայություններ մատուցած մարդ է, որը մտահոգ է ներկայիս իրավիճակով։

«Մենք գործ ունենք ոչ թե քաղաքական ծրագրեր ունեցող, այլ՝ բարձր կրթական ցենզ ունեցող, բարձր գիտակցություն, արժանապատվության զգացում ունեցող քաղաքացու հետ, որն այս պատմության մեջ է հայտնվել»,- նշեց Մելիքյանը։

Հիշեցնենք, որ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 163-րդ հոդվածի 3-րդ մասի 2-րդ կետի հատկանիշներով հարուցվել է քրեական գործ՝ ընդդիմության հավաքներին Հայաստանի ազգային ագրարային համալսարանի ուսանողների մասնակցության դիմաց նույն համալսարանի ուսանողական խորհրդի նախագահին նյութապես շահագրգռելու դեպքի առթիվ: Ենթադրյալ դեպքի վերաբերյալ 2022 թվականի մայիսի 9-ին լրատվական կայքերից մեկում ձայնագրություն է հրապարակվել՝ «1000 դրամ յուրաքանչյուր ուսանողի համար, Ագրարային համալսարանի դասախոսը դրդում է ուսխորհրդի նախագահին գումարի դիմաց կազմակերպել, որպեսզի ուսանողները մասնակցեն ընդդիմության հավաքներին՝ յուրաքանչյուր ուսանողի դիմաց առաջարկելով 1000 դրամ» վերտառությամբ:

Ըստ ՔԿ-ի՝ քաղաքական ընդդիմության կողմից կազմակերպվող հավաքներին մասնակցելու և որոշակի գործողություններ կատարելու դիմաց Հայաստանի ազգային ագրարային համալսարանի ուսանողական խորհրդի նախագահին նյութապես շահագրգռել են՝ առաջարկելով երկու հազար ուսանողի հավաքներին ներգրավելու դիմաց տրամադրել 2.000.000 ՀՀ դրամ գումար: Քրեական գործի շրջանակներում ձերբակալվել է հասարակական-քաղաքական գործիչ Ավետիք Չալաբյանը և Էմմա Սարգսյանը։

Հեղինակ՝ Իզաբել Սահակյան

Աղբյուր` Փաստինֆո