Փաստ ինֆո

Լեո-Պարոնյան ավտոճանապարհին հղի կնոջ՝ Սոնա Մնացականյանի՝ մահվան ելքով վրաերթի գործով մեղադրյալ ՃՈ ծառայող Արամ Նավասարդյանը չի կալանավորվի։ Երևանի ընդհանուր իրավասության դատարանը՝ դատավոր Ռազմիկ Մարիկյանի նախագահությամբ, մերժել է Նավասարդյանի նկատմամբ կալանավորումը որպես խափանման միջոց ընտրելու մասին միջնորդությունը։ Այս մասին «Փաստինֆո»-ի հետ զրույցում հայտնեց փաստաբան Ռուբեն Բալոյանը։ 

Ինչպես արդեն տեղեկացրել ենք՝ ողբերգական դեպքը տեղի է ունեցել ապրիլի 26-ին՝ Լեո-Պարոնյան փողոցների հատվածում: Նիկոլ Փաշինյանի ավտոշարասյանն ուղեկցող ՃՈ ավտոմեքենան վրաերթի է ենթարկել հղի կնոջը, ապա, ըստ, ականատես վկաների՝ չի կանգնեցրել մեքենան՝ հեռանալով դեպքի վայրից: ՔԿ-ն, սակայն, ի սկզբանե ՃՈ մայորին մեղադրանք է առաջադրել միայն ՀՀ քրեական օրենսգրքի 242-րդ հոդվածի 2-րդ մասով, իսկ դեպքի վայրը լքելու դրվագով՝ ոչ: Հետագայում, գործի նկատմամբ հսկողություն իրականացնող դատախազը ցուցում է տվել՝ լրացնել մեղադրանքը՝ մեղադրանք առաջադրելով նաև ՀՀ քրեական օրենսգրքի 244-րդ հոդվածի 1-ին մասով և ՀՀ քրեական դատավարության օրենսգրքի 130-րդ հոդվածով սահմանված կարգով որոշում կայացնել մեղադրյալի նկատմամբ կալանավորումը որպես խափանման միջոց ընտրելու միջնորդություն հարուցելու մասին: Քննիչի կողմից առարկություններ են ներկայացվել, որը մերժվել է։ Նավասարդյանի մեղադրանքը լրացվել է և կալանավորման միջնորդություն ներկայացվել դատարան, որը մերժվել է՝ կալանավորման հիմքերի բացակայության հիմքով։

Փաստաբան Ռուբեն Բալոյանը նշեց, որ դեռևս դատարանի որոշումը չի ստացել, հետևաբար, չի կարող մեկնաբանել դատարանի որոշումը։ Կալանավորման միջնորդության մեջ քննիչը մատնանշել է գործի քննությանը խոչընդոտելու և գործի վարույթից թաքնվելու հավանականությունը, ինչը, փաստաբանն անլուրջ է համարում։

«Լուրջ անձնավորություն է, հրամանատար է, ի՞նչ քննությունից թաքնվել։ Դուք դրան լու՞րջ եք վերաբերում։ Դա բացառված բան է, երեք երեխա ունի, ընտանիք, մշտական բնակության վայր, աշխատանք։ Իրենց այդպես է պետք, այդպես է մատուցվում հանրությանը։ Ի՞նչ թաքնվել, չկա նման բան։ Ոչ էլ դեպքի վայրից է դիմել փախուստի, չհիմնավորված ենթադրություններ են։ Ինչ-որ հեռահար նկատառումներով փորձ է արվում երիտասարդ աղջկա մահվան ողբերգական դեպքը քաղաքական նպատակներով օգտագործելու»,- նշեց Բալոյանը։

Թեև Նավասարդյանի մեղադրանքը լրացվել է նաև դեպքի վայրը լքելու հատկանիշներով, պաշտպանության կողմը շարունակում է պնդել՝ Նավասարդյանը դեպքի վայրը չի լքել։

«Խոսքը հանցակազմի մասին է, կա՞ հանցակազմ տվյալ անձի գործողություններում, թե՝ ոչ, պետք է նպատակ լինի։ Ի՞նչ նպատակ է հետապնդում դրանով, իր անձը բոլորին հայտնի է, ցանկության դեպքում էլ՝ չի կարող թաքցնել իր անձը, ինչու ինքը դա չի՞ հասկանում։ Այսինքն, որ վրաերթից հետո մի փոքր վերև է բարձրացել, կանգնել է, զանգել է շտապօգնություն, նշանակում է, որ փախչե՞լ է, բա ավտոշարասյուն էր գալիս հետևից, ճանապարհ չտա՞ր։ Եկել է, տեսուչին քաշքշել են դեպքի վայրում։ Տեսանյութեր կան, վկաներ կան։ Ի՞նչ աներ, համազգեստո՞վ գար դեպքի վայր։ Ճիշտ կլինե՞ր դա։ Իր գործողությունները համարում եմ ճիշտ և օրինական»,- նշեց Բալոյանը՝ պնդելով, որ Նավասարդյանը դեպքի վայրը չի լքել. «Ինչ վերաբերում է վրաերթին, ես Ձեզ ասել եմ, շարունակում եմ պնդել, որ, եթե այդ աղջիկը հետ չվերադառնար, վրաերթը տեղի չէր ունենա, քանի որ վրաերթը տեղի է ունեցել ավտոմեքենայի կողային հատվածով։ Եթե կես քայլ էլ հետ չգար... բայց ինքը շատ արագ երեք քայլ է կատարում, ինչն էլ հանդիսանում է վրաերթի պատճառ»։

Պաշտպանության կողմը վրաերթը պայմանավորում է տուժողի գործողություններով։

Հիշեցնենք, որ ապրիլի 26-ին՝ ժամը 18.05-ի սահմաններում, Լեո-Պարոնյան-Պռոշյան փողոցների հատվածում Նիկոլ Փաշինյանի կառավարական ավտոշարասյան մեքենաներից մեկը վրաերթի է ենթարկել 28 տարեկան երիտասարդ հղի կնոջ՝ Սոնա Մնացականյանին, որը տեղափոխվել էր «Նաիրի» հիվանդանոց, որտեղ գիտակցության չգալով՝ մահացել է։ Չի հաջողվել փրկել նաեւ պտղի կյանքը։ Ականատես վկան լրագրողներին հայտնել էր, որ վրաերթից հետո շարասյունը հեռացել է, չի կանգնել՝ տուժածին օգնություն ցույց տալու համար։ Ավելի ուշ նաեւ ՔԿ-ն էր պաշտոնապես հաստատել, որ վրաերթից հետո նշված ավտոմեքենայի վարորդը դեպքից հետո թողել է ճանապարհատրանսպորտային պատահարի վայրը և հեռացել։

Նույն աղբյուրի փոխանցմամբ՝ վարորդը դեպքի վայր է վերադարձել ժամը 20:05-ին՝ այսինքն՝ դեպքից մոտ երկու ժամ հետո, երբ այդ մասին արդեն հայտնի էր դարձել մամուլին, ու մասնակցել կատարվող քննչական գործողություններին։ Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով և 244-րդ հոդվածի 1-ին մասով, որի շրջանակներում ձերբակալվել է վաշտի հրամանատարը։ Վարույթն իրականացնող մարմինը, սակայն, Արամ Նավասարդյանին մեղադրանք է առաջադրել միայն ՀՀ քրեական օրենսգրքի 242-րդ հոդվածի 2-րդ մասով, այսինքն՝ ճանապարհային երթևեկության անվտանգության ապահովմանն ուղղված պահանջները խախտելը, որն անզգուշությամբ առաջացրել է մարդու մահ ու ստորագրությամբ ազատ արձակել։ Այսինքն՝ դեպքի վայրը լքելու դրվագով մեղադրանք չէր առաջադրվել, սակայն հետագայում դատախազի ցուցումով Նավասարդյանի մեղադրանքը լրացվել է նաեւ հենց դեպքի վայրը լքելու համար ու կալանավորելու միջնորդություն ներկայացվել դատարան, ինչը մերժվել է։

Հեղինակ՝ Իզաբել Սահակյան

Աղբյուր` Փաստինֆո