Փաստ ինֆո

ՀՀ գլխավոր դատախազությունը կդիմի Հակակոռուպցիոն կոմիտե՝ պարզելու, թե ինչու մինչ այս պահը չի կատարվել իրենց ցուցումը և ինչու զոհվածների ծնողները դատավարական կարգավիճակ չունեն։

Ինչպես արդեն տեղեկացրել ենք՝ զոհված զինծառայողների ծնողները ՀՀ գլխավոր դատախազությունից պահանջում էին քրեական գործով իրենց որպես տուժողների իրավահաջորդ ճանաչել, ինչը բավարարվել է և դատախազը ցուցում էր տվել քննիչին՝ ծնողներին տուժողների իրավահաջորդ ճանաչելու վերաբերյալ։ Մյուս պահանջը, որը ներկայացվել էր ծնողների կողմից, վերաբերում էր Նիկոլ Փաշինյանին քրեական գործով որպես մեղադրյալ ներգրավելուն։ Այսօր ծնողները գնացել էին Հակակոռուպցիոն կոմիտե՝ որպես տուժողի իրավահաջորդ ներգրավվելու համար, սակայն քննիչը հրաժարվել է ընդունել ծնողներին՝ պատճառաբանելով, թե զբաղված է՝ փաստացի հրաժարվելով կատարել դատախազի ցուցումը՝ նրանց դատավարական կարգավիճակ տալու վերաբերյալ։

Հակակոռուպցիոն կոմիտեում ստացված նման արձագանքից հետո ծնողները ՀՀ գլխավոր դատախազության դիմաց են հավաքվել։ Ծնողները լիազորել են փաստաբան Վահան Հովհաննիսյանին՝ հանդիպել դատախազի հետ։

Զոհված զինծառայողների ծնողների ներկայացուցիչ, փաստաբան Վահան Հովհաննիսյանը լրագրողների հետ զրույցում տեղեկացրեց, որ ինքը չի հանդիպել գլխավոր դատախազի հետ, հանդիպել է Արա Մարտիրոսյանի և դատախազի խորհրդականի հետ։

«Այնպես հասկացա, որ իրենց կողմից լիազորություններն ամբողջ ծավալով կատարված են, այսպես ասած՝ գնդակը Հակակոռուպցիոն կոմիտեի դաշտում է»,- նշեց Հովհաննիսյանը։

Ինչ վերաբերում է ցուցումի կատարմանը, ապա փաստաբանը տեղեկացրեց, որ դատախազը նշել է՝ վարույթն իրականացնող մարմինն ունի առավելագույնը եռօրյա ժամկետ՝ դատավարական ժամկետ տրամադրելու համար, իսկ չտրամադրելու դեպքում՝ դատախազն ունի համապատասխան գործառույթներ՝ որոշում կայացնելու համար։ Նրա փոխանցմամբ՝ այսօր հսկող դատախազը նամակ կուղարկի քննիչին, թե ինչու ցուցումը չի կատարվել։ Անդրադառնալով Փաշինյանի հարցաքննությանը՝ փաստաբանը տեղեկացրեց, որ ստացված պատասխանից հասկացել է, որ Փաշինյանը չի հարցաքննվել։

Աղբյուր` Փաստինֆո