Փաստ ինֆո

Իշխանափոխության համար անհրաժեշտ որոշակի պայմաններ այս պահին կան: «Փաստինֆո»-ի հետ զրույցում հայտարարել է քաղտեխնոլոգ Արմեն Բադալյանը՝ անդրադառնալով ապրիլի 17-ից Երեւանում մեկնարկած ժողովրդական պայքարին: Հիշեցնենք, որ այդ օրը Արթուր Վանեցյանը հայտարարեց Ազատության հրապարակում անժամկետ բողոքի ակցիա սկսելու մասին, ինչից հետո էական փոխվեց երկրի ներքաղաքական իրավիճակը։ Ազատության հրապարակը դարձավ միաժամանակ մի քանի ակցիաների իրականացման հարթակ, քաղաքական զբոսանքների ու քննարկումների վայր։ Իսկ ապրիլի 25-ից արդեն ակցիաներ սկսեց նաեւ «Դիմադրություն» շարժումը, հասարակական, քաղաքական այլ ․ուժեր՝ իրականացնելով ցանցայի անհնազանդության ակցիաներ։

Փորձագետի դիտարկմամբ՝ ընդդիմությունը կիրառում է աշխարհում բավականին տարածված տեխնոլոգիաներ՝ երթեր, ցույցեր, իրազեկման ակցիաներ։ Ավելին՝ նրա խոսքով՝ կիրառվող տեխնոլոգիաներն էլ ընդդիմության կողմից լիարժեքությամբ չեն կիրառվում, շատ դեպքերում էլ դրանք 2018թ-ի իշխանափոխության ժամանակ կիրառվող տեխնոլոգիաների կրկնությունն են.

«Չէի ասի՝ ընդդիմությունն ինչ-որ արտառոց տեխնոլոգիաներ է հորինել, որ աշխարհը չի տեսել, այդ տեխնոլոգիաները 2018թ-ին Հայաստանում օգտագործվել են, բայց պետք է նշել, որ խնդիրը տեխնոլոգիաները չեն, տեխնոլոգիան ինչ-որ հրաշք չէ, որ անես ու հաստատ արդյունք ստանաս, պետք է կարողանաս համապատասխան պայմաններում այդ տեխնոլոգիաները կիրառել, միայն այդ դեպքում արդյունք կունենաս, հակառակ դեպքում՝ եթե պայմաններ չլինեն համարժեք և եթե տեխնոլոգիաներն արդյունավետ չօգտագործես, ապա արդյունք չես ստանա»,-ասաց Արմեն Բադալյանը:

Քաղտեխնոլոգն այս պահին իշխանափոխություն իրականացնելու պայմաններ տեսնում է, թեև նշում է, որ դրանք դեռ ամբողջովին բավարար չեն վերջնական արդյունքի հասնելու համար:Իսկ թե արդյո՞ք հանրային տրամադրությունների փոփոխություն նկատում է, Արմեն Բադալյանը նշեց, որ դա մեծապես կախված է ընդդիմության աշխատանքի որակից.

«Ինչքան որակը բարձր լինի, հանրային տրամադրվածությունն այնքան բարձր կլինի: Գնալով կարողանում են հասարակության լարել, բայց դա դեռևս միայն Երևանում է, մի քիչ էլ Գյումրիում, բայց մյուս մարզերում չեն աշխատում, ինչը իրենց թերությունն է, օրինակ՝ Սյունիքում, հյուսիսային մարզերում, բոլոր հնարավոր բնակավայրերը, որոնք կարող են ներգրավել «Դիմադրության շարժմանը», չեն անում»,-ասաց քաղտեխնոլոգը:

Նրա դիտարկմամբ՝ հանրային տրամադրությունների վրա մեծապես ազդել է հատկապես վերջերս տեղի ունեցած ողբերգական դեպքը, որբ Նիկոլ Փաշինյանի ավտոշարասյունը վթարի էր ենթարկել 28 ամյա հղի կնոջը, որն էլ մահացել էր.

«Եթե դուրս գային, օգնություն ցույց տային կնոջը, դա ուրիշ կլիներ, բայց երբ խփում-գցում ու գնում ես, սա շատերի գիտակցության մեջ շատ բան փոխեց»,-ասաց Արմեն Բադալյանը:

Ինչ վերաբերում է ընդդիմության ակցիաների ժամանակ տեղի ունեցող սադրանքներին՝ քաղտեխնոլոգն ասաց. «Դա բնական է, աշխարհի բոլոր երկրներում էլ իշխանությունը սադրիչների է ուղարկում, կան մարդիկ էլ, որ իրենք են գալիս, որոնք իշխող քաղաքական ուժի կողմնակիցներ են լինում և փորձում են իշխանություններին արջի ծառայություն մատուցել, ինչի արդյունքում սադրանք է լինում, սրա վրա լուրջ ուշադրություն պետք չէ դարձնել, բայց սադրանքների զոհ չպետք է գնալ»,-ասաց Արմեն Բադալյանը:

Աղբյուր` Փաստինֆո