Փաստ ինֆո

Կապիտուլյացիոն ակտի ստորագրմանը հաջորդած բողոքի ակցիայի ընթացքում ԱԺ նախկին նախագահ Արարատ Միրզոյանի նկատմամբ բռնություն գործադրելու մեջ մեղադրվող Ժիրիկ Սիրեկանյանը շուրջ 1.5 տարի է, ինչ շարունակում է մնալ մեղադրյալի կարգավիճակում, թեև գործում առկա նյութերով հաստատվել է՝ Սիրեկանյանը դեպքի վայրում չի եղել։ Վարույթն իրականացնող մարմինը քրեական գործը Սիրեկանյանի մասով ո՛չ կարճում է, ոչ էլ՝ դատարան ուղարկում, դրել է «սեյֆում» և հայտնի էլ չէ, թե որքան է պատրաստվում այնտեղ պահել։ 

Ժիրիկ Սիրեկանյանի պաշտպան Լուսինե Մարտիրոսյանը «Փաստինֆո»-ի հետ զրույցում հայտնեց, որ նոր միջնորդություն է ներկայացրել՝ Սիրեկանյանի նկատմամբ քրեական հետապնդումը դադարեցնելու մասին։

«Վերլուծելով արդեն իսկ մեզ ներկայացված ապացույցները` ցուցմունքներ, դեպքի վայրի տեսագրություններ, հեռախոսային խոսակցությունների զննության արձանագրություններ, զանգերի ալեհավաքների տեղակայումները, շտապ օգնության կանչի զննության արձանագրությունը, ակնհայտ է դառնում որ տվյալ անձը որևէ առնչություն չունի ենթադրյալ հանցագործության կատարման հետ։ Քննությունն արդեն իսկ կատարել է բոլոր անհրաժեշտ քննչական գործողությունները, և պատահական չի, որ նրա մասնակցության վերաբերյալ գեթ մեկ տվյալ ձեռք չի բերվել, ավելին հերքվել է»,-նշեց Լուսինե Մարտիրոսյանը։

Հիշեցնենք, որ 2020թ նոյեմբերի 9-ի լույս 10-ի գիշերը Նիկոլ Փաշինյանի կողմից կապիտուլյացիոն ակտի ստորագրումից հետո Երևանում լայնածավալ բողոքի ակցիաներ են իրականացվել, ինչի ընթացքում մի խումբ քաղաքացիներ մուտք են գործել կառավարության և ԱԺ շենքեր և կառավարական ամառանոց։ Բացի դա՝ նույն օրը Դեմիրճյան փողոցում բռնություն է գործադրվել ՀՀ ԱԺ նախագահ Արարատ Միրզոյանի նկատմամբ, վերջինս ստացել էր մարմնական վնասվածքներ։ Քաղաքացիների ՀՀ կառավարության շենք, կառավարական առանձնատուն մուտք գործելուց հետո՝ Ն. Փաշինյանը հայտարարել է, թե հափշտակվել է օծանելիք, համակարգիչ, ժամացույց եւ այլ իրեր։ Դեպքերի առթիվ ՀՀ ԱԱԾ-ում հարուցվել է քրեական գործ, որից առանձնացված մասով նախաքննությունն ավարտվել է և գործն ուղարկվել է դատարան, իսկ մյուս դրվագներով, այդ թվում՝ Արարատ Միրզոյանի նկատմամբ բռնություն գործադրելու դրվագով նախաքննությունը շարունակվում է։

Սիրեկանյանին նոյեմբերի 12-ին մեղադրանք է առաջադրվել ՀՀ քրեական օրենսգրքի 225-րդ հոդվածի 2-րդ մասով և 301.1 հոդվածի 1-ին մասով, իսկ նոյեմբերի 13-ին դատարանը բավարարել է նրա նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Պաշտպանը վերաքննիչ բողոք է ներկայացրել Սիրեկանյանին կալանավորելու մասին որոշման դեմ, ինչը դեկտեմբերի 17-ին բավարարվել է և վերջինս ազատ է արձակվել։ Վերաքննիչ դատարանի նշված որոշման դեմ ՀՀ գլխավոր դատախազի կողմից բերվել է վճռաբեկ բողոք, որը բավարարվել է և Սիրեկանյանը կալանավորվել է։

Լուսանկարը՝ ԱԺ-ի։

Հեղինակ՝ Իզաբել Սահակյան

Աղբյուր` Փաստինֆո