Փաստ ինֆո

Արցախը բեռ չէր, Արցախը զրահաբաճկոն էր, որը միտումնավոր կամ դավադրաբար հանելով՝ խոցելի դարձրեցիք և՛ Արցախը, և՛ Հայաստանը։ Հետ կանգնեք այդ քայլերից, քանի դեռ ուշ չէ։ Այս մասին Արցախի ԱԺ արտահերթ նիստում պատգամավոր Արթուր Մոսիյանը, ինչին արձագանքելով ԱՀ ԱԺ նախագահ Արթուր Թովմասյանը նշեց՝ «Խաղաղության գինը տարածաշրջանում՝ Արցախը չէ։ Սա պետք է հասկանանք», ապա դիմեց ՀՀ ԱԺ խմբակցություններին՝ հորդորելով կանգնել Արցախի կողքին։

Մոսիյանը հայտնեց, որ ամիսներ առաջ ցանկանում էին մի շարք հանդիպումներ ունենալ՝ միջխորհրդարանական հանձնաժողովի ձևաչափով, որը չէր կայանում, որովհետև կային հարցեր, որոնք ցանկանում էին բարձրացնել։

«Ինչևէ, ԱԺ նախագահի և հինգ խմբակցությունների մասնակցությամբ ուղևորվեցինք Երևան՝ հանդիպեցինք ՀՀ ԱԺ նախագահի և մի քանի պատգամավորների հետ։ Մտահոգություններ ունենալով հարց ուղղեցի ՀՀ ԱԺ նախագահ Ալեն Սիմոնյանին՝ նշելով, թե կարգավիճակ ասելով ձեր իշխանությունն ինչ է հասկանում, կարո՞ղ է մի օր ասեք՝ Ադրբեջանի կազմում։ Ալեն Սիմոնյանը վիրավորված ասեց՝ մեզ ինչի տեղ եք դնում, խոսքը վերաբերում է անկախացմանը կամ Հայաստանին միացմանը, հո չենք ասելու Ադրբեջանի կազմում։ Մեր ընկերներից մեկն անգամ ինձ կշտամբեց, թե ինչու այդպիսի հարց տվեցի, մարդը վիրավորվեց, ես էլ ասացի՝ ճիշտ եմ արել, որովհետև այդ տեսակը ես ճանաչում եմ»,- նշեց Մոսիյանը՝ հավելելով, որ երեկ վարչապետի և իջեցված հրահանգով որոշ պատգամավորների ելույթից հետո պարզ դարձավ մի ճշմարտություն՝ այն, ինչ մտածում էին, դժբախտաբար դարձավ իրականություն։

Մոսիյանը վստահեցրեց, որ այդ տեսակը մեր ժողովրդի մեջ շատ չէ, թեկուզ՝ ժամանակավոր իշխանության հասած կամ իշխանության բերած որոշակի խնդիրներ լուծելու համար՝ այդ տեսակը մեծամասնություն չէ, չի կարող հայ ազգի մեջ այդ տեսակը լինել մեծամասնություն։

«Ամեն ինչ պարզ է, ամեն ինչ ակնհայտ է՝ Հայաստանի օրվա իշխանությունների ասածներում։ Արդեն վերջին պատերազմից հետո թե՛ Փաշինյանը, թե՛ Ալիևը արցախցիների հետ խոսում են նույն լեզվով։ Հայաստանի իշխանություններին հորդորում եմ դադարեցնել այդ ահաբեկությունը, պատերազմով սպառնալն ու վախեցնելը՝ թե Արցախի, թե Հայաստանի, թե Սփյուռքի ժողովրդին։ Հայ ժողովրդից ավելի ոչ ոք խաղաղության գինը չգիտի»,- ընդգծեց Մոսիյանը՝ նշելով, որ 5 կետերով ոչ միայն վտանգվում է մեր բազմահազար զոհերի գնով ձեռք բերված անկախությունը, ազատ, անկախ ապրելու իրավունքը, այլև՝ կետերից մեկով նշվում է, որ ապագայում ՀՀ-ն ոչ մի պահանջ չի կարող ներկայացնել։

«Փաստորեն այս աղետալի քայլով Նիկոլ Փաշինյանը և իր վարչախումբը ոչ միայն զրոյացնում է սերունդների, մեր բազմահազար զոհերի, վիրավորների թափած քրտինքի, արյան գինը, այլև՝ ապագա սերունդների համար է որոշում՝ այդ կետը ամրագրելով պայմանագրի մեջ, ապագա սերունդների հաշվին է դա անում։ Իմ դաստիարակությունն ինձ թույլ չի տալիս նույն հարցը տալ, որն ասաց Ալեն Սիմոնյանը՝ դուք մեզ ինչի տեղ եք դրել։ Կխնդրեի, որ ինքը պատասխանի այդ հարցին՝ իրենք իրենց ինչի տեղ են դրել, որ մի խմբակով կամ մի քանի հոգով ուզում են որոշել մի ամբողջ ժողովրդի ճակատագիր՝ թե Արցախում, թե Հայաստանում»,- նշեց Մոսիյանը՝ հավելելով, որ վերջին տարիներին պարբերաբար թեզ էր շրջանառվում, թե Արցախը բեռ է , մինչդեռ Արցախը բեռ չէր, Արցախը զրահաբաճկոն էր։

Աղբյուր` Փաստինֆո