Փաստ ինֆո

«Բրյուսելում այսօր տեղի ունեցող Փաշինյան – Ալիև հանդիպումից, ըստ էության, ոչինչ պետք չէ սպասել։ Փաստաթուղթ այնտեղ այսօր չի ստորագրվելու։ Ամենաշատը, որ կարվի այսօր՝ կողմերի դիրքորոշումը հստակեցնելն է։ Իմ խորին համոզմամբ, այս հանդիպումը կայացել է ռուսական կողմի տեղեկացվածության պարագայում»,- «Փաստինֆո»-ի հետ զրույցում նշել է միջազգայնագետ Գրիգոր Բալասանյանը։

Վերջինիս արձանագրմամբ՝ Ալիև - Փաշինյան էական բանակցություններն իրականանալու են նոյեմբերի 9-ին ստորագրված արձանագրության տրամաբանության շրջանակներում.«Սա Եվրոպայի համար պարզապես փորձ է՝ փրկելու սեփական դեմքն ու ցույց տալու, որ ինքը նույնպես բանակցային պրոցեսում դեր կարող է խաղալ՝ Հրավային Կովկասում որոշակի ներկայություն ապահովելու համար։ Պատահական չէ՝ ամիսներ առաջ ՌԴ նախագահ Պուտինը հստակեցրեց, բոլորին ցույց տալով իրենց տեղն առ այն, որ պայմանագիրը ստորագրվելու է ռուսական Զինված Ուժերի Գլխավոր Շտաբում պահվող քարտեզներին համապատասխան։ Բացի դրանից, Պուտինը բառացիորեն վերջերս խոսքով դիմեց երկու կողմերին (իհարկե, առաջին հերթին նկատի ունենալով հենց Ալիևին), հիշեցնելով, որ որևէ մեկի մտքով անգամ չանցնի փորձել քայլեր իրականացնել, չկատարելու՝ նոյեմբերի 9-ի արձանագրությամբ ստանձնած պարտավորությունները, սրանով, մեկ անգամ ևս ընդգծելով, որ այս հարցում վերջնական խոսքը Ռուսաստանի Դաշնությանն է և միայն իրենը»։

Թե ինչո՞ւ հայ հասարակությունը, մեծ իմաստով, տեղեկացված չէ Բրյուսելում ընթացող բանակցությունների բովանդակությունից, միջազգայնագետը կարծում է՝ ինտրիգ ապահովելու նպատակով միայն՝ փորձելով այն ներկայացնել կարևորության քողի ներքո։

Հիշեցնենք, որ Բրյուսելում սկսվել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը՝ Եվրոպական խորհրդի նախագահ Շառլ Միշելի միջնորդությամբ։

Ավելի վաղ Նիկոլ Փաշինյանն առանձնազրույց է ունեցել Եվրոպական խորհրդի նախագահ Շառլ Միշելի հետ։ Զրուցակիցներն անդրադարձել են այսօր նախատեսված Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպմանը և կարևորել երկխոսության շարունակականությունը:

Նիկոլ Փաշինյանը ներկայացրել է ադրբեջանական ստորաբաժանումների վերջին գործողությունների հետևանքով Արցախում ստեղծված իրավիճակը, հումանիտար խնդիրներն ու ընդգծել միջազգային հանրության հասցեական արձագանքի անհրաժեշտությունը:

ՀՀ վարչապետը և Շառլ Միշելը մտքեր են փոխանակել նախորդ տարվա դեկտեմբերի 14-ին Բրյուսելում կայացած եռակողմ հանդիպմանը ձեռք բերված պայմանավորվածությունների կատարման ընթացքի վերաբերյալ:
Կողմերը հույս են հայտնել, որ այսօրվա եռակողմ բանակցությունները կլինեն արդյունավետ, ինչը կնպաստի կայունությանն ու խնդիրների համապարփակ կարգավորմանը:

Աղբյուր` Փաստինֆո