Փաստ ինֆո

Երևանի ընդհանուր իրավասության դատարանը՝ դատավոր Մանվել Շահվերդյանի նախագահությամբ, 1 ամսով հետաձգել է ՀՀ ՊՆ նախկին նախարար Դավիթ Տոնոյանի և ՀՀ ԶՈՒ ԳՇ պետի նախկին տեղակալ Ստեփան Գալստյանի խափանման միջոցի հարցի քննությունը։

«Փաստինֆո»-ի հաղորդմամբ՝ Երևանի ընդհանուր իրավասության դատարանում՝ դատավոր Մանվել Շահվերդյանի նախագահությամբ, այսօր կայացել է ՊՆ նախկին նախարար Դավիթ Տոնոյանի, զենքի մատակարարմամբ զբաղվող գործարար Դավիթ Գալստյանի՝ «Պատրոն Դավո»-ի, ՀՀ ԶՈՒ ԳՇ նախկին պետ Արտակ Դավթյանի, ԶՈՒ ԳՇ պետի նախկին տեղակալ Ստեփան Գալստյանի և մյուսների գործով դատական նիստը։

Դատական նիստի ընթացքում Դավիթ Տոնոյանի պաշտպանները միջնորդություն են ներկայացրել՝ Տոնոյանի գույքի և դրամական միջոցների վրա դրված արգելանքը վերացնելու մասին։ Միջնորդության հիմքում դրվել է այն, որ գործով պատճառված վնասի չափն արդեն երաշխավորված է, հետևաբար, հետագայում քաղաքացիական հայցի խնդիր չի կարող առաջանալ, վերացված է գույքի վրա արգելանք դնելու նպատակահարմարությունը, անհրաժեշտությունը։ Պաշտպանության կողմը միացել է միջնորդությանը, մեղադրող դատախազը՝ առարկել։ Գույքի վրա դրված արգելանքը վերացնելու մասին միջնորդության լուծումը դատարանը հետաձգեց, ինչից հետո Դավիթ Տոնոյանի և Ստեփան Գալստյանի պաշտպանները միջնորդություն են ներկայացրել՝ իրենց պաշտպանյալների նկատմամբ ընտրված խափանման միջոց կալանավորումն անազատության հետ կապ չունեցող խափանման միջոցով փոխարինելու մասին, որը ևս հետաձգվել է։

Փաստաբան Սերգեյ Հովհաննիսյանը «Փաստինֆո»-ի հետ զրույցում նշեց, որ միջնորդության հիմքում դրվել է այն հանգամանքը, որ ամբողջ քրեական գործն իրենից որևէ բարդություն չի ներկայացնում, փաստաթղթավորված գործ է և վկաների վրա ազդելու կամ որևէ այլ տեսակի ապացույցներ ձեռք բերելուն խոչընդոտելու ռիսկի մասին խոսք լինել չի կարող, եթե անգամ նման ռիսկ առկա է, արդեն իսկ ենթադրյալ հանցագործությամբ պատճառված վնասն ապահովված լինելու, երաշխավորված լինելու պայմաններում էականորեն նվազում է խոչընդոտելու ռիսկը, հետևաբար, գոնե այս փուլում արդեն իսկ այլ խափանման միջոցն ի զորու է ապահովելու մեղադրյալի պատշաճ վարքագիծը։ Ընդ որում, դատական նիստերը տեղի են ունենում ամսվա ընթացքում մեկ անգամ, իսկ հաջորդ դատական նիստը նշանակվել է մայիսի 2-ին։ Պաշտպանության կողմը միջնորդել է խափանման միջոց կալանավորումը փոխարինել անազատության հետ կապ չունեցող խափանման միջոցով, այդ թվում՝ գրավով՝ գրավի չափ առաջարկելով 10 մլն ՀՀ դրամը։

Դատական նիստին հայտարարությամբ է հանդես եկել նաև Դավիթ Տոնոյանը՝ միանալով միջնորդություններին, ինչպես նաև՝ առարկել դատավորի գործողությունների դեմ այն առումով, որ հաջորդ դատական նիստը պետք է կայանա մայիսի 2-ին։ Տոնոյանը հայտարարել է, որ անհարկի ձգձգումներ են տեղի ունենում քրեական գործով, ամիսը մեկ անգամ դատական նիստ է տեղի ունենում կամ սուբյեկտիվ պատճառներով ձգձգվում է, իսկ այդ ընթացքում ինքն անօրինական կերպով գտնվում է անազատության մեջ։ Փաստաբանի փոխանցմամբ՝ դատարանը պատճառաբանել է, որ դատական նիստը մինչև մայիսի 2-ը պետք է հետաձգվի, քանի որ դատավորը պետք է մասնակցի վերապատրաստման դասընթացներին, ինչպես նաև՝ դա պայմանավորված է դատարանի ծանրաբեռնվածությամբ։

«Տոնոյանը հորդորել է դատարանին՝ հարգել իր ազատության իրավունքը և դատարանին՝ իր աշխատանքն այնպիսի գրաֆիկով կազմակերպել, որ դա այլ անձանց ազատության իրավունքի հաշվին տեղի չունենա»,- նշեց փաստաբանը։

Հիշեցնենք, որ ԱԱԾ քննչական դեպարտամենտում հարուցվել էր քրեական գործ՝ ռազմամթերքի ձեռքբերման գործընթացում ենթադրյալ չարաշահումների, մասնավորապես, անորակ, անպիտան հրթիռներ ձեռք բերելու վերաբերյալ։ Քրեական գործի շրջանակներում մեղադրանք է առաջադրվել յոթ անձի, այդ թվում՝ ՊՆ նախկին նախարար Դավիթ Տոնոյանին, ՀՀ ԶՈՒ ԳՇ պետ Արտակ Դավթյանին, ԶՈՒ ԳՇ պետի նախկին տեղակալ Ստեփան Գալստյանին, «Պատրոն Դավո» մականունով հայտնի՝ զենքի մատակարարմամբ զբաղվող գործարար Դավիթ Գալստյանին։ Մասնավորապես, նախնական քննության տվյալներով՝ ՀՀ ԶՈւ և ՀՀ ՊՆ բարձրաստիճան պաշտոնատար անձինք, չարաշահելով իրենց պաշտոնեական դիրքը, «Մոսթոն Ինժիներինգ» ընկերության սեփականատիրոջ հետ նախնական համաձայնությամբ, «Նեյտրոն ԳԱՄ» և «Բագավան» ՓԲ ընկերությունների մասնավորեցումից ընկերության կողմից ՀՀ պաշտպանության նախարարության հանդեպ ունեցած պարտավորությունը մարելու նպատակով, 2018թ. ընկերությունից ընդունել՝ ձեռք են բերել թվով 4232 հատ ժամկետանց, տեխնիկական պահանջներին չհամապատասխանելու պատճառաբանությամբ նախկինում չընդունված և ՀՀ ՊՆ-ում պահեստավորված ռազմամթերքը։

Ըստ նախաքննական մարմնի՝ վերը նշված անձինք ռազմամթերքի ձեռքբերման պայմանագրի կնքման համար առկա խոչընդոտները վերացնելու և իրենց գործողություններին օրինական տեսք տալու համար պայմանագրի մաս կազմող տեխնիկական բնութագիրը համապատասխանեցրել են փաստացի ՊՆ-ում ի պահ հանձնված ապրանքի տվյալ տեսակին՝ դրանում նշելով ռազմամթերքը գործարանային արկղերով ՀՀ ՊՆ N զորամասի կենտրոնական պահեստ մատակարարելու վերաբերյալ իրականությանը չհամապատասխանող տվյալներ։

Ընդ որում՝ նշված ռազմամթերքը ձեռք է բերվել նույն խմբաքանակից ռազմամթերքի նախկինում ձեռքբերման արժեքից գրեթե կրկնակի թանկ գնով՝ կատարելով առանձնապես խոշոր չափերով՝ 2,277,323,840 ՀՀ դրամին համարժեք, 4.655.200 ԱՄՆ դոլար գումարի հափշտակություն։ Դավիթ Տոնոյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով, Արտակ Դավթյանին՝ ՀՀ քրեական օրենսգրքի 375-րդ հոդվածի 3-րդ մասով, Ստեփան Գալստյանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Ավետիկ Մուրադյանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Վլադիմիր Բաբայանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Արտյոմ Համբարյանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Դավիթ Գալստյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով։

Հեղինակ՝ Իզաբել Սահակյան

Աղբյուր` Փաստինֆո