Փաստ ինֆո

Հայաստանի օրվա իշխանությունը փորձում է ձեռքերը լվալ Արցախի հարցից, ՀՀ-ն հրաժարվում է Արցախի ինքնիշխանության, անվտանգության երաշխավորի իր պարտականությունից, այս իմաստով մեր մտահոգությունը շատ խիստ է: Այս մասին լրագրողների հետ զրույցում հայտարարեց ՀՅԴ ԳՄ ներկայացուցիչ, ԱԺ փոխնախագահ Իշխան Սաղաթելյանը.

«Իրավիճակը շատ պարզ է, մենք ասում ենք, որ ապագա չկա՝ զիջումների գնալով, իրենք ասում են՝ ապագա կա՝ զիջելով, իշխանության և ընդդիմության կռվի բուն պատճառը և հարցի էությունը Հայաստանի վաղվա օրվա մասին մեր պատկերացումների մասին հակադրություն է: Իրենք Հայաստանի վաղվա օրը տեսնում են զիջելով, իրենց պարտվողական քաղաքականության արդյունքում մեր երկիրը եկել, հասել է այս օրին»,-ասաց ԱԺ փոխնախագահը և ընդգծեց, որ ստեղծված իրավիճակից դուրս գալու հնարավորությունը համաժողովրդական դիմադրությունն է:

Նրա խոսքով՝ սրա շուրջ քննարկումներ են ունենում քաղաքական տարբեր ուժերի, կազմակերպությունների և անհատների հետ.

«Դիմադրությունը երկու ճակատ է ունենալու` արտաքին թշնամու և օրվա իշխանությունների դեմ, որոնք չեն սպասարկում հայ ժողովրդի շահերը և չեն ապահովում Հայաստանի տարածքային ամբողջականությունը, ինքնիշխանությունը»,–ասաց Սաղաթելյանը և խոստացավ` առաջիկայում հասարակությունը դրան առնչվող կոնկրետ քայլեր և գործողություններ կտեսնի։

Աղբյուր` Փաստինֆո