Փաստ ինֆո

«Քաղաքացիական պայմանագիր» խմբակցության պատգամավոր Լուսինե Բադալյանը կարծում է, որ Անդրանիկ Քոչարյանը ճիշտ չի մեկնաբանել՝ Արցախում ստեղծված հումանիտար աղետը՝  հայտարարելով, որ պետք է սովորենք առանց գազ ապրել։

Արցախում արդեն տևական ժամանակ է հումանիտար ճգնաժամ է, Ադրբեջանը միտումնավոր Արցախը զրկել է գազից, հետեւապես այս ցուրտ եղանակին տաքանալու ու տաք ջուր ունենալու հնարավորությունից։

«Փաստինֆո»-ի հետ զրույցում  ՔՊ-ական պատգամավոր Լուսինե Բադալյանը վստահեցրեց, Հայաստանը՝ որպես Արցախի անվտանգության երաշխավոր, ջանք ու եռանդ չի խնայում հարցը լուծելու համար։

«Առաջին անգամ, երբ խնդիրը ի հայտ եկավ, հենց Հայաստանի կառավարության ջանքերով խնդիրը, սակայն հետո էլի առաջացավ խնդիրը, կրկին Հայաստանի կառավարության ջանքերով պետք է այդ խնդիրը լուծվի: Ամեն դեպքում ոչ մի վայրկյան գիտակցման թուլացում չի եղել, որ Հայաստանը Արցախի անվտանգության երաշխավորն է, նույն տեմպերով շարունակվում են բանակցությունները, խնդիրը լուծելու ուղղությամբ ձեռնարկվում է ամեն ինչ»-ասաց Բադալյանը:

Իսկ թե այս ուղղությամբ ի՞նչ քայլեր ձեռնարկվում, ՔՊ-ական պատգամավորը խուսափեց պատասխանել, պարզաբանելով, որ դա իր գործառույթների շրջանակներում չէ: Դիտարկմանը, որ  ԱԺ անվտանգության և պաշտպանության հարցերի մշտական հանձնաժողովի նախագահ Անդրանիկ Քոչարյանը երեկ իր հարցազրույցում հայտարարել է. «Մենք պետք է սովորենք գազատարը փակ վիճակում ապրել», Լուսինե Բադալյանը հայտարարեց, թե, հավանաբար, Անդրանիկ Քոչարյանը ճիշտ չի հասկացվել.

«Պետք է հասկանալ, որ սա չի նշանակում, որ իշխանությունը չի պատրաստվում որևէ բան անել, ժողովուրդ համակերպվեք ստեղծված իրավիճակի հետ, խոսքը դրա մասին չէ, իշխանությունը ջանք ու եռանդ չի խնայում, որպեսզի այդ խնդիրը կարգավորվի: Պարոն Քոչարյանը ճիշտ չի հասկացվել կամ ճիշտ չի մեկնաբանել, չեմ կարող ասել։ Հավանաբար, նրա այս հայտարարությունը ունեցել է շարունակություն, որ պրն. Քոչարյանը ասի՝ «դա բացարձակ չի նշանակում, որ մենք ամեն ինչ չենք անելու, որպեսզի խնդիրը կարգավորվի»,-ասաց Լուսինե Բադալյանը:

Մանրամասները տեսանյութում

Աղբյուր` Փաստինֆո