Փաստ ինֆո

Այս տարի փաստաթուղթ պետք է ստորագրվի Հայաստանի և Ադրբեջանի միջև: «Փաստինֆո»-ի հետ զրույցում հայտարարեց ադրբեջանագետ Գառնիկ Դավթյանը՝ նշելով, որ ստորագրվելիք փաստաթուղթը լինելու է ճանապարհների ապաշրջափակման մասին, բացի այդ փաստաթղթում խոսվելու է նաև Ադրբեջանի տարածքային ամբողջականությունը ճանաչելու մասին.

«Փաստաթղթի մեջ տառացի գրված չի լինի , որ Հայաստանը ճանաչում է Ադրբեջանի տարածքային ամբողջականությունը, դա, մասնավորապես, կարտահայտվի Արցախ զինվոր չուղարկելով, հայտարարություններով, որոնք կասկածի տակ կդնեն Արցախի հայկական լինելը: Նիկոլ Փաշինյանը չի կարող մեկ օրում հայտարարել, որ ճանաչում է Ադրբեջանի տարածքային ամբողջականությունը, նա իր քայլերի հաջորդականությամբ կբերի այդ տրամաբանությունը և իր հակաազգային քայլերով ընկալում կստեղծի, թե արդեն ճանաչել է Ադրբեջանի տարածքային ամբողջականությունը»,-ասաց նա՝ նկատելով, որ եթե Ադրբեջանին հաջողվի խաղաղ բնակչությանը ստիպել, որ վախի մթնոլորտից դրդված լքեն Արցախը, ապա ավելի հեշտ կլինի իրենց համար տարածքային ամբողջականության օրակարգը իրագործելու տեսակետից:

Վերջին օրերին ագրեսոր Ադրբեջանը կտրուկ ակտիվացրել է հրադադարի ռեժիմի խախտումները՝ ընդհուպ ականանետերից գնդակոծելով հայկական բնակավայրերը՝ բարձրախոսներով պահանջելով հեռանալ իրենց լքել բնակավայրերը։ Ըստ փորձագետի, սա ունի մի քանի պատճառ, նախ՝ Ադրբեջանը օգտվում է ռուս-ուկրաինական բախումից և փորձում է ամեն ձև սրել իրավիճակը սահմաններին, բացի սա, Ադրբեջանը արցախցիների մոտ ահի մթնոլորտը փորձում է խորացնել, որպեսզի զիջումների գնալիս հանրությունը չընդդիմանա.

«Ադրբեջանը վախի դոզան մեծացնում է, մարդիկ էլ դրա հետ համակերպվելով այս իրավիճակին, կարճ ժամանակ հետո կասեն՝ պետք է զիջումներ անենք՝ պատերազմից խուսափելու հաշվին »,-ասաց փորձագետը

Գառնիկ Դավթյանի դիտարկմամբ՝ Արցախը փորձում է իր ուժերով, առանց Հայաստանի օգնության, բարձրացնել իր սուվերենությունը, ինչը դուր չի գալիս Ադրբեջանին և սադրանքների է գնում.
«Ռուս-ուկրաինական պատերազմի սկզբում Արցախը հումանիտար օգնություն ուղարկեց Արցախ, մինչ այդ էլ Արցախի խորհրդարանը օկուպացված տարածքների մասին օրենք էր ընդունել, Արցախը փորձում է իր ուժերով բարձրացնել իր սուվերենությունը, հետևաբար, այստեղ Ադրբեջանը վտանգ է տեսնում և հասկանում է, որ Արցախը փորձում է իր գոյաբանական և որևէ ձևով ստատուս քվո ամրագրել, սա Ադրբեջանին ձեռնտու չէ, Ադրբեջանի ագրեսիվ գործողությունները նաև սրան են ուղղված»,-ասաց փորձագետը:

Իսկ Հայաստանի իշխանություններն էլ ոչինչ չեն անում Արցախի և Արցախի բնակչության անվտանգությունն ապահովելու ուղղությամբ, ավելին, ըստ նրա, Հայաստանի իշխանությունները իրենց ընկալումներում Արցախը դիտարկում են Ադրբեջանի մաս.
«Հայաստանը ոչինչ չի անում այդ ուղղությամբ, պաշտոնական ընկալման մակարդակով Հայաստանի իշխանությունները մոռացել են Արցախի մասին, ավելին՝ նրանց ընկալումներում Արցախը համարում են Ադրբեջանի տարածք:

Նիկոլ Փաշինյանը վախենում է Արցախ այցելել, խուսափում է գնահատականներ տալ Արցախում տիրող իրավիճակի մասին, ամենայն հավանականությամբ՝ Ալիևի սպառնալիքների ներքո,, Անդրանիկ Քոչարյանն էլ ակնարկում է, թե միգուցե հայկական կողմն է խախտել հրադադարը, ես չեմ զարմանա, որ մեր այն զինվորների նկատմամբ, որոնք արձագանքել են ադրբեջանական սադրանքներին, հետագայում քրգործեր հարուցվեն, այս իշխանությունը բազմիցս ապացուցել է, որ Ադրբեջանի շահը սպասարկող կառավարություն է արտաքին քաղաքականության մակարդակում, պետք չէ ակնկալել, որ օրը կբացվի և Նիկոլ Փաշինյանի իշխանությունը կդառնա հայամետ, այդպես չի լինի »,-ասաց նա:

Իսկ թե ի՞նչպես է գնահատում ռուսական կողմի արձագանքը ադրբեջանական սադրանքներին, փորձագետը նշեց, որ Ռուսաստանը հիմա զբաղված է Արևմուտքի հետ պայքարով, այդ պատճառով էլ չի կարողանում արձագանքել ադրբեջանցիներին՝ ինչպես հարկն է.

«Ամբողջ աշխարհը պայքարում է Ռուսաստանի դեմ, այնտեղ ֆրոնտը լայն է, Ռուսաստանը զբաղված է իր պետության խնդիրներով:

Բացի սա, մեր իշխանություններն իրենք որևէ ձև չեն արձագանքում ադրբեջանական պրովոկացիաներին, եթե անգամ պրովոկացիաներ արձանագրվում են, բայց դրանք չեն զեկուցվում, Նիկոլ Փաշինյանը չի զանգում Պուտինի և տեղեկացնի՝ ի՞նչ է կատարվում:

Ինչո՞ւ պետք է այլ պետություն պաշտպանի քո երկրի շահերը, եթե դու ինքդ չես անում ոչինչ, մեր խնդիրն այն է, որ մենք միշտ ակնկալում ենք, որ ռուսը, ամերիկացին կամ ֆրանսիացին պետք է գան ու մեր խնդիրները կարգավորեն, բայց հենց գալիս է մեր պատասխանատվության մասը, մենք դա չեն անում և գցում են երրորդ կողմի վրա »,-ասաց փորձագետը:

Աղբյուր` Փաստինֆո