Փաստ ինֆո

Երրորդ համաշխարհայինն է սկսվում, իսկ մենք, նստած ծառի տակ, նկարում ենք նապաստակ։ Սննդի կետերում աղ դնելու համար տնտեսվարողին տուգանելու սպասվող որոշումն այսպես բնութագրեց բիզնես խորհրդատու Արեն Ապիկյանը։ 

«Չեմ կարծում, որ իմաստ ունի անգամ քննարկել այդ թեման։ Մենք նման անիմաստ բաների համար ժամանակ չունենք։ Փոխանակ կառավարությունը հիմա մտածի, թե ինչ անի, որ ապահովագրի մեր տնտեսությունն ու ժողովրդին սպասվող տնտեսական աղետից, որին կհանգեցնի այս պատերազմը, աբսուրդային բաներով են զբաղված»,-«Փաստինֆո»-ի հետ զրույցում ասաց Ապիկյանը։

Տեղի ունեցող համաշխարհային զարգացումների, մասնավորապես՝ Ռուսաստան-Ուկրաինա ռազմական բախումը, ըստ նրա, համաշխարհային տնտեսական ճգնաժամի կհանգեցնի, որի սկիզբն արդեն տեսանելի է։ «Արդեն իսկ պարենային անվտանգության խնդիր ունենք։ Հացահատիկը թանկանում է, քանի որ համաշխարհային շուկայում հացահատիկի 40 տոկոսը ՌԴ- ն է արտահանում, 20-25 տոկոսը՝ Ուկրաինան։ Մենք էլ ներմուծող երկիր ենք, բնականաբար, այդ ամենը ազդելու է մեր տնտեսության վրա»,-ասաց Ապիկյանը։

Ստեղծված իրավիճակում կառավարությունը, ըստ Ապիկյանի, պետք է սցենարներ մշակի, թե ինչ է արվելու պատերազմի ելքը պարզ դառնալուց հետո, որպեսզի հնարավորինս նվազեցնի ռիսկերն ու շահի՝ որպես չեզոք երկիր։

2020թ․ Ադրբեջանի սանձազերծած պատերազմից հետո հայկական շուկայում միանգամից գլուխ բարձրացրած գնաճը ռուս-ուկրաինական պատերազմի հետևանքով շարունակում է խորանալ։ Նման իրավիճակում՝ որպես զսպող մեխանիզմ, ինչպես մեր զրուցակիցն է ասում, աշխատում է կամ սուբսիդավորումը, կամ՝ հարկային բեռի թեթևացումը, որոնք, սակայն, մեր երկրում թույլ տալ չենք կարող։

«Տնտեսության մեջ ամեն ինչ փոխկապակցված է․ չի կարելի ընդունել որոշումներ՝ առանց հետևանքները հաշվի առնելու։ Գնաճի զսպման այս մեխանիզմները եթե կիրառվեն, բյուջեի վրա մեծ ծանրաբեռնվածություն կլինի, առանց այդ էլ՝ հսկայական պարտքեր ունի երկիրը »,-շեշտեց Ապիկյանը։

Պարենային խնդիրները մեղմելու խելամիտ տարբերակներից մեկը, ըստ նրա, թերևս, տեղական արտադրությունների խթանումն է։

Կառավարության երեկվա նիստում ևս դա շեշտադրվեց ՝առավելագույնս մշակել հողատարածքները։ Ապիկյանը նկատում է՝ կոչ անելուց առաջ պայմաններ պետք է ստեղծել, նախ և առաջ, ոռոգման համակարգերի խնդիրը լուծել, որ դարձյալ հազարավոր գյուղացիներ խնդրի առաջ չկանգնեն։

«Տեղական արտադրողներին ինչո՞վ է աջակցում այսօր կառավարությունը․ Խոշոր թռչնաբուծարաններից մեկը փակվեց, մի քանիսն էլ փակման եզրին են։ Տեղական արտադրության խթանման մասին ենք խոսում, բայց ինչո՞վ է պետությունն օգնում սնանկացող տեղական ընկերություններին»,-մտահոգիչ հարց է բարձրացնում Ապիկյանը։

Աղբյուր` Փաստինֆո