Փաստ ինֆո

Մեր երկրում առաջին անհրաժեշտության ապրանքների կտրուկ գնաճը խիստ մտահոգիչ ցուցանիշներ է գրանցում, առաջիկայում նոր թանկացումներ դեռևս սպասվում են։ «Փաստինֆո»-ի հետ զրույցում նկատել է բիզնես խորհրդատու Արեն Ապիկյանը։

Թանկացումները տարածվում են նաեւ տեղական արտադրության ապրանքների վրա՝ բիզնես խորհրդատուն նկատում է՝ պատճառն, իհարկե, առաջին հերթին հումքի գներով է պայմանավորված, որովհետև շատ ու շատ տեղական ապրանքների համար, հումքը, նույնպես դրսից է ներմուծվում։ Հետևաբար, հումքի գնի փոփոխություններով պայմանավորված, փոխվում է նաև ինքնարժեքի գինը: «Այստեղ էական դեր կարող է խաղալ նաև կոմունալ թանկացումների հանգամանքը, այսինքն, եթե երկրում թանկանում են գազն ու էլեկտրոէներգիան, շղթայական թանկացումներ են տեղի ունենում նաև տեղական արտադրության ապրանքների գներում»,- ասում է Արեն Ապիկյանը։
Հարցին՝ արդյո՞ք այս տարի արձանագրված գնաճը մոտ է անցյալ տարիների՝ նույն ժամանակահատվածի գնաճի տեմպերին, բիզնես խորհրդատուն պատասխանում է՝ միանշանակ ոչ. «Այս ողջ իրավիճակում ամենավատ իրողությունն այն է, որ արտաքին աշխարհում բարենպաստ միջավայր նույնպես չկա: Այսինքն, եթե նախկինում մեր երկրում տնտեսական վիճակը այս կամ այն չափով անկում էր ապրում, ապա դրսից դեպի Հայաստան ուղարկվող տրանսֆերտները գոնե օգնում էին, որպեսզի այստեղ՝ ներսում տնտեսությունը զգալի վնասներ չկրի: Հիմա դրսից ուղարկվող տրանսֆերտների վրա հույս դնել այնքան էլ չի ստացվի, որովհետև համավարակի թողած հետևանքները տնտեսական լուրջ և խորը ճգնաժամ են առաջացրել նաև ամբողջ աշխարհում: Այլ կերպ ասած, տնտեսական առումով հիմա ողջ աշխարհն ուղղակի աղետի առաջ է հայտնվել»։

Վերադառնալով գնաճի թեմային և հարցին՝ ի՞նչ սպասելիքներ կարող են ունենալ մեր հայրենակիցներն այս առումով, Արեն Ապիկյանը ցավով նկատում է՝ ընդհանուր վերլուծության արդյունքում որևէ լավ լուր այս առումով ասել չի կարող. «Գնաճի տեմպերը հանգեցնելու են նրան, որ մարդիկ սկսելու են ավելի վատ ապրել: Ցավալի իրողությունն այն է, որ առաջիկայում մարդիկ կսկսեն խնայել նաև ուտելիքի վրա ծախսվող գումարը: Գնաճի տեմպերը և գործազրկության աճող մակարդակը կարող են հանգեցնել նրան, որ մարդիկ բառացիորեն ստիպված կլինեն կտրուկ կրճատել նաև առաջին անհրաժեշտության մթերքների ձեռքբերումը՝ բառացիորեն հանելով իրենց սննդակարգից քիչ թե շատ թանկ մթերքները՝ միսը, կաթնամթերքը և այլն: Մնացած անհրաժեշտ և բնական կարիքները բավարարելու համար, կլինի դա՝ դեղորայք, կոմունալ ծախսեր, մինիմում հագուստ և այլն, այս ամենը ձեռք բերելու համար, մարդիկ ստիպված են լինելու գնալ այդ սահմանափակումներին, ինչը, բնականաբար, ցավալի և ոչ մի տեղ չտանող հեռանկար է, որ ոչ մի լավ բան չի խոստանում մեր երկրի ու ապագայի համար»,- ամփոփելով զրույցն, ասում է բիզնես խորհրդատու Արեն Ապիկյանը։

Տեղեկացնենք, որ 2021 թվականից ի վեր, Հայաստանի սննդի շուկայում գրանցվող գնաճն այսպիսի տեսք ունի՝ ձեթը թանկացել է 45-50%, հաց – հացամթերքը՝ 10%,

սուրճը 13-15 %, ծխախոտը՝ 10%, բուսական յուղը թանկացել է 48-52%-ով, շաքարավազի գնաճը կազմել է 50%, ձուն թանկացել է 30%-ով,

կաթ – կաթնամթերքը՝ 10%-ով, միրգը թանկացել է 20-25%-ով, բանջարեղենի գնաճը կազմել է 10-15%,

սխտոր թանկացել է 100%-ով, խառը կանաչին՝ 60-70% ալյուրը՝ 12,5%, խմիչքը 10-13%

ոչ պարենային ապրանքները թանկացել են 15-20%-ով։

Աղբյուր` Փաստինֆո