Փաստ ինֆո

Խորհրդարանն այսօրվա նիստում երկրորդ ընթերցմամբ շարունակեց քննարկել «Քաղաքացիական պայմանագիր» խմբակցության պատգամավորներ Վլադիմիր Վարդանյանի և Վահագն Հովակիմյանի հեղինակած «Դատական օրենսգիրք» սահմանադրական օրենքում փոփոխություններ կատարելու մասին օրենքի նախագիծը:

Նախագծում առաջինից երկրորդ ընթերցման ընթացքում նոր դրույթ է ավելացվել, այն է՝ փոփոխվում է դատավորին և ԲԴԽ անդամին կարգապահական պատասխանատվության ենթարկելու, նրանց լիազորությունները դադարեցնելու,դատավորի և ԲԴԽ անդամ նկատմամբ քրեական գործ հարուցելու կամ նրան ազատությունից զրկելու վերաբերյալ համաձայնություն տալու համար անհրաժեշտ ձայների հարաբերակցությունը:

Այս պահին գործող օրենսդրությամբ պահանջվում է, որ նախ դատական խորհուրդը այս հարցով առնվազն 2/3 մասնակցությամբ քվորում ապահովի, այսինքն՝ ԲԴԽ 10 անդամից 7-ը այսօրվա կարգավորուններով պետք է կողմ քվեարկեն, որպեսզի դատավորների նկատմամբ այսպիսի գործողություն: ՔՊ-ական պատգամավորների հեղինակած նախագծով առաջարկվում է փոփոխել այս հարաբերակցությունը և թույլատրել, որպեսզի քվորում լինի 6 անդամի առկայության դեպքում, իսկ 5-ի կողմ քվեարկության արդյունքում դատավորների նկատմամբ իրավական գործընթացներ կիրականացվեն:

«Հայաստան» խմբակցության պատգամավոր Արծվիկ Մինասյանն ընդգծեց, որ սա շատ վտանգավոր դրույթ է և անթույլատրելի է, երբ նախագծի առաջինից երկրորդ ընթերցման ընթացքում նման սկզբունքային նշանակության հարց է բերվում օրակարգ՝ առանց լուրջ մասնագիտական քննարկումների, առանց իրավասու մարմինների քննարկումների, առանց փաստաբանական և իրավաբանական համայնքի հետ քննարկումների.

«Բայց ամենավտանգավորն այն է, որ այսօրվա ֆոնին, երբ դատավորի նկատմամբ ապօրինի հետապնդումներ, կալանավորումներ են սկսվել, կարգապահական պատասխանատվության ենթարկելու գործընթաց է սկսվել, այս գործընթացը ոչ այլ ինչ է, քան պարզապես օրինականացնել դատական և իրավապահ համակարգի ապօրինի նվաճման գործընթացը»,-ասաց նա:

Աղբյուր` Փաստինֆո