Փաստ ինֆո

Ակնհայտ է, որ Հայաստանի վարչապետը ամեն կերպ ձգտում է Թուրքիայի նախագահի հետ հանդիպման, կարելի է ասել, անգամ մուրում է այդ հանդիպումը՝ այլ երկրների միջոցով:

«Փաստինֆո»-ի հետ զրույցում նման դիտարկում արեց անվտանգության հարցերով փորձագետ Արմեն Մանվելյանը:
Ըստ փորձագետի՝ հանդիպման շարժառիթը հավանաբար «խաղաղության դարաշրջան» մուրալն է, ինչը շատ վտանգավոր է.

«Զգոնությունը բթացնելու և քաղաքական «կուտը» տալու քաղաքականություն է տարվում Անկարայի և Բաքվի կողմից, հետևաբար, շատ զգույշ պետք է լինել, բայց չեմ կարծում, որ այսօրվա իշխանությունները ի վիճակի են դա անել »,-ասաց փորձագետը:

Զրուցակցի դիտարկմամբ՝ փորձում են «խաղաղության կեղծ լոզունգներով» խաբել հասարակությանը, հատկապես՝ այն մարդկանց, ովքեր վախեցած են նոր պատերազմի վտանգից.

«Իսկ իրականում սա դեպի ցեղասպանություն և երկրի վերջնական քանդում տանող քաղաքական կուրս է: Եթե սա նրանց հաջողվի, ապա Հայաստանը կդառնա ադրբեջանա-թուրքական ազդեցության տարածք, մեր ինքնիշխանությունը վերջնականապես կվերանա, կարող է անգամ մի պահ գալ, որ Անկարայից և Բաքվից սկսեն թելադրել Հայաստանի քաղաքական օրակարգը»,-ասաց Մանվելյանը:

Փետրվարի 4-ին միջազգային լրատվամիջոցներում տեղեկատվություն տարածվեց, որ մարտին նախատեսվում է ՀՀ վարչապետ Նիկոլ Փաշինյանի այցը՝ Թուրքիա։ Հղում կատարելով Թուրքիայի փոխվարչապետ Ֆուաթ Օքթայի հայտարարությունները նշվում էր, որ Նիկոլ Փաշինյանը պատրաստվում է այցելել Թուրքիա և մասնակցել Անթալիայում կայանալիք դիվանագիտական համաժողովին: Փետրվարի 5-ի առավոտյան ՀՀ ԱԳՆ-ն հերքեց այս տեղեկությունը՝ նշելով, թե Նիկոլ Փաշինյանի այց Թուրքիա և մասնակցություն Անթալիայի դիվանագիտական համաժողովին չի քննարկվում:

Արմեն Մանվելյանի խոսքով՝ Հայաստանի արտաքին քաղաքականությունն այսօր կանոնակարգված չէ, շատ դժվար է ասել՝ Հայաստանն արտաքին ի՞նչ քաղաքականություն է վարում, ի՞նչ օրակարգով է շարժվում,ըստ նրա, այդ օրակարգերը շատ հաճախ դրսից են թելադրվում, թուրք-ադրբեջանական տանդեմը թելադրում է Հայաստանի արտաքին քաղաքական օրակարգը, մենք դա բազմիցս տեսել ենք:

«Հայաստանի արտաքին քաղաքականությունը կանոնակարգված չէ, դոկտրինա, սկզբունքներ չունի, հիմնված է մեկ մարդու տրամադրության, կապրիզների և ցանկության վրա:Երկուսին էլ կարելի է հավասարապես և՛ վստահել, և՛ չվստահել։ Այս պայմաններում դժվար է ասել՝ ո՞վ է ավելի մոտ ճշմարտությանը, Հայաստանի արտգործնախարարությունը, թե՝ Թուրքիայի: Ժամանակը ցույց կտա »,-ասաց նա:

Փորձագետը չբացառեց, որ Նիկոլ Փաշինյանի՝ Թուրքիա մեկնելու պայմանավորվածությունը լինի առանց ԱԳՆ-ի իմացության և համաձայնության.
«Բազմաթիվ անգամ տեսել ենք, որ ԱԳ նախարարությունը արտաքին քաղաքական բնագավառում չի տիրապետում այն ինֆորմացիային, որին տիրապետում է վարչապետի աթոռին նստած անձը և նրա շրջապատը: Շատ դեպքերում այդ քաղաքականությունը վարչապետը վարում է՝ շրջանցելով ԱԳՆ-ին: Նախկին ԱԳ նախարարի հրաժարականի պատճառն էլ հենց դա էր, որ, լինելով արտաքին քաղաքականության առաջին գծում, նրանք շատ բաներ ուշացումով էին իմանում, հետո էին տեղեկանում, որ Հայաստանի կառավարությունը, իրենց շրջանցելով, ինչ-որ երկրների հետ պայմանավորվածության է եկել: Ես համոզված եմ, որ ԱԳՆ-ն շրջանցելու պրակտիկան մինչև հիմա էլ պահպանվում է արտաքին քաղաքական բնագավառում »,-ասաց նա:

«Փաստինֆո»-ն արդեն տեղեկացրել է, որ ԱԳ նախկին նախարար Արա Այվազյանը տեղյակ չի եղել Հայաստանի և Ադրբեջանի միջև երրորդ փաստաթղթի շուրջ Նիկոլ Փաշինյանի բանակցություններից:

Փաշինյանը բանակցություններ էր վարել՝ առանց ԱԳՆ-ի իմացության: Հիշեցնենք, որ փաստաթղթի նախագիծը հրապարակվել էր Վատիկանում ՀՀ նախկին դեսպան Միքայել Մինասյանի կողմից, ինչը հետագայում հաստատել էր նաեւ Նիկոլ Փաշինյանը՝ հայտարարելով, թե այն 100 տոկոս բխում է ՀՀ շահերից ու ստորագրելու է։ Սակայն, պարզվեց, որ ԱԳՆ-ն տեղյակ չի եղել այդ փաստաթղթի գոյության մասին, իսկ փաստաթղթի ստորագրման մասին պաշտոնական հայտարարություն առայժմ չի եղել։

Աղբյուր` Փաստինֆո