Փաստ ինֆո

Պարգևատրումներով վարձատրության հարց չպետք է լուծվի, սա աննորմալ մոտեցում է, աշխատանքի դիմաց մարդիկ պետք է ստանան հիմնական աշխատավարձ, իսկ պարգևատրումն այլ հարց պետք է լուծի:Պարգևատրումը և կարգապահական տույժերը աշխատողների նկատմամբ շատ կոնկրետ խնդիրներ են լուծում, դրանցով գործատուն կարողանում է բարձրացնել աշխատանքի արդյունավետությունը՝ լավ աշխատողին պարգևատրելով, իսկ թերացող աշխատողին կարգապահական պատասխանատվության ենթարկելով: «Փաստինֆո»-ի հետ զրույցում նման դիտարկում արեց «Հայաստան» խմբակցության պատգամավոր Թադևոս Ավետիսյանը:

Պատգամավորը միևնույն ժամանակ արձանագրեց, որ այս համակարգը 2018թ-ից հետո ամբողջությամբ ձևախեղվել է, կան ոլորտներ, որտեղ, փաստացի, արձանագրվել են ձախողումներ, բայց այդ ոլորտի բարձրաստիճան պաշտոնատար անձինք, տվյալ ամսվա համար արձանագրված ձախողված գործի համար, ոչ միայն ստացել են ամբողջական աշխատավարձ, այլ նաև դրա չափով ստացել են պարգևատրումներ.

«Սա ընկալելի չի, բացատրելի չի, անտրամաբանական է»,-նկատեց պատգամավորը:

Ընդդիմադիր պատգամավորը նաև փաստեց, որ պետական համակարգում աշխատողների աշխատավարձը շատ ցածր է, ընդգծեց՝ խոսքը բարձրաստիճան պաշտոնյաների մասին չէ.

«Միջին և ցածր օղակներում աշխատողների վարձատրությունը շատ ցածր է, 2021թ-ի վիճակագրությամբ՝ ընդամենը միջինը 5%-ով է աճել պետական օղակներում աշխատողների վարձատրությունը, այստեղ առավելապես մեղքի իր բաժինն ունի բարձրաստիճան պաշտոնյաների սիստեմատիկ պարգևատրումները: Ակնհայտ է, որ սննդամթերքի մոտավորապես 12 % աճի դիմաց այդ մարդկանց եկամուտները նվազում են, խոսքը վերաբերվում է պետական ծառայողներին, որոնց թվում կարելի է առանձնացնել նաև աշխատողներ, որոնք, ըստ էության, աշխատող աղքատներ են »,-ասաց նա՝ արձանագրելով, որ պետական համակարգում, ՊՈԱԿ-ներում կան աշխատակիցներ, որոնք ստանում են նվազագույն աշխատավարձ՝ 68.000 դրամ, մինչդեռ արդեն 2021թ-ին սպառողական զամբյուղը հասել էր մոտ 73.000 դրամի:

Ընդդիմադիր պատգամավորն ընդգծեց՝ պարգևատրումները չպետք է լինեն համատարած, որակյալ և արդյունավետ աշխատանքի համար է պետք պարգևատրում, բայց դա պետք չէ դիտարկել որպես ցածր աշխատավարձը կոմպենսացնելու միջոց, դա սխալ մոտեցում է, անարդյունավետ կարգավորում է.

«Եթե իրենք ուզում էին օբյեկտիվորեն բարձրացնել արդյունավետությունը և գնաճի պայմաններում չեզոքացնել դրա հետևանքները, ուրեմն պետք բարձրացնեին բազային աշխատավարձը: Ես ներկայացրել եմ նաև հանրային ծառայողների ոչ միայն նվազագույն, այլ նաև՝ բազային աշխատավարձի բարձրացման առաջարկ, սակայն սա նույնպես մերժվել է»

Արձանագրենք, որ չնայած պետական բարձր օղակներում շարունակաբար բաժանվող պարգևավճարներին, իշխանությունը մերժել էր «Հայաստան» խմբակցության նախագիծը, որով նախատեսվում էր բարձրացնել նվազագույն աշխտավարձը:

Մեզ հետ զրույցում Թադևոս Ավետիսյան նկատեց՝ լավ օրից չէ, որ իշխանությունները նախագիծը մերժել են.

«Երկրի տնտեսությունը հյուծելով բերել հասցրել են մի վիճակի, որ հիմա արդեն ստիպված պետական բյուջեի ձախողումների հետևանքը գցում են սոցիալապես անապահով մարդկանց վրա՝ չբարձրացնելով ո՛չ նրանց նվազագույն աշխատավարձը, ո՛չ թոշակները »:

Աղբյուր` Փաստինֆո