Փաստ ինֆո

Առողջապահության նախարարության շենքի դիմաց շտապ հավաք է հրավիրվել։ Քաղաքացիները բողոքում են պարտադիր պատվաստումների ու նոր սահմանափակումների դեմ։ 

«Ազատ կամք» նախաձեռնության ղեկավար, հանրահավաքի պատասխանատու, իրավաբան Արա Զոհրաբյանը նշեց, որ քաղաքացիներին իրազեկում են, որ կա փաստաբանական թիմ, որոնք կարող են անվճար օգնություն ցուցաբերել։ Նախարարի հետ հանդիպում չեն պահանջում, քանի որ նկատում են, որ գերատեսչությունում շարունակում են դրսևորել ապակառուցողական վարքագիծ։
Հունվարի 22-ից սննդի կենտրոններ, մշակութային օջախներ և մարզասրահներ քաղաքացիները պետք է մուտք գործեն կամ պատվաստված, կամ թեստավորված։ Իրավաբանորեն, ըստ Զոհրաբյանի, օրինակ եթե անձը փորձի մուտք գործի մարզասրահ առանց պատվաստվելու, իսկ ստուգողները չեն կարող տուգանել մարզասրահի կազմակերպությանը, այլ անհատին։ Հետևաբար նախարարի հրամանը մեծ շրջանցելու հնարավորություն է տալիս։

«Նույնը գործատու-աշխատողի դեպքոմ։ Գործատուների վրա դրված չէ պարտականություն՝ իրենց աշխատողներին պատվաստեն կամ ՊՇՌ հետազոտություն իրականացնեն։ Գործատուների մի մասը ԱՆ-ից ավելի մոլեռանդ իր աշխատողներին ստիպում է պատվաստվեն։ Ընդ որում կեղծ տեղեկություններ են տարածվում, թե կտուգանեն 500 հազար դրամով, բայց վարչական իրավախախտումների վերաբերյալ տուգանք նախատեսում է քաղաքացիների համար 10-20 հազար դրամ, եթե օրինակ չի պատվաստվել, կամ սերտիֆիկատ չունի, իսկ պաշտոնատար անձանց համար՝ 40-120 հազար դրամ։ Սա է տույժի չափը։ Բայց լեգենդներ են տարածվում, թե եթե աշխատողը պատվաստված չէ, գործատուին են տուգանելու, բայց իրականում գործատուն գրանցամատյանը վարեց՝ խնդիր չկա»։

Հարցին՝ իրավական առումով հնարավո՞ր է սահմանափակումներից ազատվել, Զոհրաբյանը նշեց, որ դիմելու են դատարան, վիճարկելու են որոշումը, բայց քանի որ սա նորմատիվ իրավական ակտ է, վարչական դատարանում այն քննվում է հատուկ ռեժիմով, իսկ դա երկարաժամկետ գործընթաց է։

«Մեր հասարակությունը պետք է պահանջատեր լինի։ Այս լկտիությունը՝ գնալով ավելի սահմանափակելը, կախված է մեր պասիվությունից, որքան պասիվ լինենք, այդքան ավելի լկտի են իրենց պահելու»։

Իրավաբանը նկատեց՝ ուսանողներին չեն պարտադրում պատվաստվեն, չնայած գերատեսչության «երազանքը» դա է։ Նրանց նկատմամբ պարտադրանք չկա, քանի որ ուսանողներից վախ կա՝ նրանք պասիվ չեն, իրենց իրավունքները սահամնափակելով, նրանք արագ ոտքի կկանգնեն։ Մյուսների իրավունքները սահմանափակելով կփորձեն ուսանողներին ևս սահմանափակել։

«Սա խտրական քաղաքականություն է, մեզ բաժանել են պատվաստվածների ու չպատվաստվածների։ Ի վերջո պատվաստված մարդն էլ է վարակի աղբյուր։ Որքանպատվաստվածների թիվը մեծացնեն, հետո գալու է մի օր՝ իրենք պատվաստվածներից են ուզելու ՊՇՌ սերտիֆիկատները։ Կասեն ճիշտ եք՝ խտրական է, նրանցից էլ կպահանջեն։ Կտեսնեք, բոլորին ստիպելու են գնել ՊՇՌ թեստ»։

Զոհրաբյանը նշեց, որ ուսումնասիրում է միջազգային փորձը։ Մոսկվայում փորձել են կիրառել ռեստորանային սահմանափակումները, հետո որոշումից հետ են կանգնել։ Նույնը տեղի է ունենում Սանկտ պետերբուրգում։ Տարբեր երկրներ հարցին այլ կերպ են մոտենում։

«Հայաստանում ինչ որ բան լսում են, որ այլ տեղ կատարվել է, վերցնում են վատ օրինակը, փորձում են հետո կիրառել ու չի ստացվում։ Կարծում եմ ռեստորանների, թատրոնների մուտքի սահամանփակումները երկար չեն տևելու, բայց եթե հասարակությունը սա ընդունեց, կեցվածք չդրսևորեց, ավելի են նեղացնելու։ Հետո էլ ասելու են՝ խանութ չեք կարող գնալ»,- ասաց Զոհրաբյանը։

Աղբյուր` Փաստինֆո