Փաստ ինֆո

«Կանայք՝ այս մսաղացքը սարքողների դեմ». Կառավարության շենքի մոտ մի խումբ քաղաքացիներ են հավաքվել, որոնք դեմ էին արտահայտվում «խաղաղության դարաշրջանում» շարունակվող մարդկային կորուստներին: Ակցիայի մասնակիցները պահանջում են, որ երկրի իշխանությունը սկսի գործել և լուծի քաղաքացիների և երկրի անվտանգության հետ կապված հրատապ խնդիրները։

«Դադարեցրեք մսաղացը», «Դադարեցրեք երեխեքի սպանդը», «Լուծեք մեր պաշտպանության հարցը կամ հեռացեք», «ՀԱՊԿ-ը նախագահում ես, որ ի՞նչ անես» գրություններով քաղաքացիները պաստառներ ունեին ձեռքներին։

Ակցիայի կազմակերպիչ Իզաբելլա Սարգսյանը հայտարարեց, որ սա ինքնաբուխ ֆեյսբույքան ակցիա է և որ քաղաքացիները բարձրաձայնում են առկա խնդիրները։ Նրա խոսքով` այս պահի դրությամբ ամենահրատապ հարցը զինվորների անվտանգությունն է, որոնք զոհվում են Սյունիք և Գեղարքունիք ադրբեջանական զինված ուժերի ներթափանցման պատճառով:

Քաղաքացիները պնդում էին՝ ՀՀ սուվերեն տարածքում երկու օր առաջ զոհվել են երիտասարդ զինվորները՝ ունենք երեք զոհ և երկու վիրավոր։ Քաղաքացիների պնդմամբ՝ «սողացող պատերազմ է ընթանում», պատերազմը չի դադարել։

«Նրանք խաղաղության դարաշրջանից են խոսում, բայց երկու օր առաջ են զոհվել 2002-2003 թվականներին ծնված 3 զինվորներ, կան վիրավորներ։ Կա լուրջ խնդիր, և այն պետք է լուծեն իշխանությունները։Այսպես չի կարող շարունակվել, զոհերին պետք է վերջ տալ», - ընդգծեց Սարգսյանը։

Կառավարության մոտ հավաքված մտահոգ քաղաքացիները հայտնում էին նաև, որ պետք է բարձրաձայնեն խնդիրների մասին և ժամանակն է, որ մյուս՝ մտածող քաղաքացիները ևս բարձրաձայնեն իրենց խոսքը, որպեսզի կառավարությունը տեսնի, որ ընդդիմացողներ կան ու այսպես հնարավոր չէ շարունակել։

Ակցիայի մասնակիցների պնդմամբ՝ ոչ մի նորակոչիկ սահմանին չպետք է լինի, չպետք է վտանգի իր կյանքը, պետությունը պետք է միջոցներ գտնի, այս սպանդը վերացնելու համար։

«Որքա՞ն կարելի է այս սպանդին, մսաղացին դիմանալ։ 2020 թվականի արյունալի պատերազմից հետո պետք է ուժ ունենանք ապրելու, այս իրավիճակը հնարավորություն չի տալիս ժողովրդին նորմալ կյանքին վերադառնալու։ Ինչքա՞ն կարելի է երեխա սպանել, պետք է բանակային ռեֆորմ անեն, նորմալ վերազինեն բանակը։ Սա այն պետությունն է, որը գերեզմանատները կարողանում է տեխնիկայով ապահովել, իսկ սահմանային ինժեներական աշխատանքները երեխաները ձեռքով են անում, դա նորմալ չէ»,- ասաց իրավապաշտպան Զարուհի Հովհաննիսյանը։

Աղբյուր` Փաստինֆո