Փաստ ինֆո

Նիկոլ Փաշինյանի հայտարարությունները Արցախի վերաբերյալ ծրագրավորված էին, նա ակնարկում էր, որ Հայաստանը ձեռքերը լվանում է Արցախից: «Փաստինֆո»-ի հետ զրույցում ասաց քաղաքագետ Երվանդ Բոզոյանը՝ անդրադառնալով Նիկոլ Փաշինյանի վերջին ասուլիսի ժամանակ Արցախի վերաբերյալ հնչեցված հայտարարություններին:

Նիկոլ Փաշինյանը, մասնավորապես հայտարարել էր, թե ԼՂԻՄ-ը երբեք բանակցային գործընթացում չի դիտարկվել որպես զուտ հայկական միավորում, քանի որ ԼՂԻՄ-ում ապրել են նաեւ ադրբեջանցիներ, ավելին՝ նա պնդել էր, թե ԼՂ կարգավիճակի ճշգրտման համար նախատեսվող հանրաքվեին պետք է մասնակցեին Լեռնային Ղարաբաղի ողջ բնակչությունը՝ ոչ միայն հայկական բնակչությունը, այլ նաև՝ ադրբեջանական:

Քաղաքագետի արձանագրմամբ՝ Նիկոլ Փաշինյանն այդ հայտարարություններն արել է հայ-թուրքական հարաբերությունների կարգավորման ֆոնին՝ Թուրքիայի պահանջով։ Ըստ նրա՝ Նիկոլ Փաշինյանը բացեց «Օվերտոնի պատուհանը»՝ նշելով, թե դեռևս 1993թ-ից Արցախը մնացել էր Ադրբեջանի կազմում, որպեսզի երբ ինքը պաշտոնապես ձևակերպի, որ Արցախը պետք է մնա Ադրբեջանի կազմում, հայտարարի՝ թե նախկին իշխանությունների ժամանակ էր դա հայտարարված, սակայն հայ ժողովրդին չէին ասում այդ մասին.

«Բանն այն է, որ Նիկոլ Փաշինյանը շատ շահագրգռված է հայ-թուրքական հարաբերությունների վերականգնմամբ, իսկ Թուրքիան դրա համար նախապայմաններ է առաջադրել՝ նախապայմաններից ամենակարևորն է, որ Հայաստանը ճանաչի Ղարաբաղն Ադրբեջանի կազմում, 7 շրջաններն արդեն հանձնված են, իսկ ցեղասպանության խնդիրը շատ հեշտությամբ կարելի է լղոզել »,-ասաց Երվանդ Բոզոյանը:

Ըստ նրա՝ իր հայտարարություններով Նիկոլ Փաշինյանն ակնարկում էր, որ Հայաստանը ձեռքերը լվանում է Արցախից, ինչը պաշտոնապես հաստատել է Թուրքիայի նախագահի խոսնակը, որն այս օրերին գտնվում է ԱՄՆ-ում ,հանդիպումներ է ունենում ԱՄՆ պաշտոնյաների հետ և հայտարարում, թե Հայաստանի հետ արդեն պայմանավորվել են, որ նա հրաժարվում է Արցախից.

«Այսինքն՝ հիմա իրենք աշխատում են Արցախի հարցը բանակցային գործընթացից հանել արդեն միջազգային հարթակներում: Նիկոլ Փաշինյանից պաշտոնական ազդակ ստացել են, իրենց մնացել է արդեն միջազգային հարթակներում այս խնդիրը լուծել: Այսպիսի խարդախ, խաբեբա և մանիպուլյատիվ իշխանություն, որն աշխատում է սեփական երկրի շահերի դեմ, Հայաստանի պատմության մեջ չի եղել»,-ասաց քաղաքագետը և հավելեց, որ Նիկոլ Փաշինյանն այս հայտարարություններով ստուգում էր նաև հանրության տրամադրությունները Արցախի հարցի կարգավորման վերաբերյալ

«Այս մարդը ամբողջ կյանքում զբաղվել է մանիպուլյացիաներով և խարդախությամբ, նախկինում, որպես թերթի խմբագիր, Փաշինյանը բանսարկություններով է զբաղվել, հիմա իր մտածողությունն ու պատկերացումները փորձում է ներկայացել որպես պետության ղեկավար՝ արտաքին քաղաքականության վրա: Նա տեսնում է, որ մեր ժողովրդին մանիպուլացնելը շատ հեշտ է, Հայաստանի պարզունակ և ցածրորակ մակարդակի քաղաքացին դարձել է այսօրվա իշխանության հենարանը, Փաշինյանը, ըստ էության, այս մարդկանց վրա հղում անելով ,մանիպուլյացիա է անում, բայց իր գլխավոր խնդիրը ոչ թե հայ հասարակությունն է, այլ՝ արտաքին քաղաքականության մեջ իր նոր գործընկերն է՝ ի դեմս Թուրքիայի»,-ասաց նա: 

Նիկոլ Փաշինյանին արձագանքել էր Արցախի նախագահը՝ ընդգծելով, որ միայն Արցախի Հանրապետության իշխանություններն են լիազորված խոսելու Արցախի բնակչության անունից:
Զրուցակցի խոսքով՝ Երբ Արցախում նման տրամադրվածություն կա, Արցախի նախագահը չէր կարող այլ գնահատական տալ, հակառակ դեպքում՝ Արցախում որպես նախագահ չէր ընկալվի
«Արցախն իր տեսակետը հայտնեց, գնդակը գտնվում է Հայաստանի դաշտում, հայ ժողովուրդը չպետք է իներտ մնա, սա նաև ստուգատես է հայ ժողովրդի համար, աշխարհը ուշադիր հետևելու է՝ հայ ժողովուրդն ինչպե՞ս է արձագանքում այս պրոցեսներին: Հայաստանը 30 տարի ունեցել է որոշակի դոկտրին Արցախի նկատմամբ, հիմա այս անձնավորությունը եկել է իշխանության և փորձում է փոխել այդ դոկտրինը, սա է խնդիրը»,-ասաց Երվանդ Բոզոյանը:

Աղբյուր` Փաստինֆո