Փաստ ինֆո

Նոյեմբերի 16-ին գերեվարված և Բաքվում առ այսօր գտնվող զինծառայողների ընտանիքները հայտնվել են բավական խնդրահարույց իրավիճակում։ Մի կողմից պետությունը չի փոխանցել աշխատավարձերն ամբողջությամբ, հարազատներին չի վճարվել նաեւ փոխհատուցման գումարները՝ 300.000-ական դրամները, մյուս կողմից վարկային կազմակերպությունները չեն ընդառաջում՝ վարկերի տոկոսները սառեցնելու, մարումը  հետաձգելու հարցում։ Շիրակի մարզից գերեվարված պայմանագրային զինծառայողի կինը՝ Լիլիթը «Փաստինֆո»-ին հայտնել է, որ նույնիսկ զորամասից թուղթ է ներկայացրել վարկային կազմակերպություն, որը հաստատում է, որ վարկառուն գերության մեջ է, սակայն աջակցություն չի ստացել։

«Աշխատավարձերը լրիվ չեն փոխանցվել։ Նույնիսկ Ֆասթ կրեդիտ թուղթ եմ տարել, որ սառեցնեն տոկոսները, իրենք ոչ մի բան չարեցին։

Թուղթը զորամասից վերցրել եմ, որ ամուսինս գերեվարված է, փոխանցել եմ ֆասթ կրեդիտ, բայց ասացին՝ «նման օրենք չունենք, չենք կարող ընդառաջել»։ Ամուսինս վարկ է վերցրել, ոսկի է գրավադրված, ոչինչ չեն անում, նույնիսկ չեն սառեցնում տոկոսները։ Ամսական վճարում ենք մոտ 18 հազար դրամ»,- պատմել է Լիլիթը՝ նշելով, որ ամուսնու նոյեմբերի աշխատավարձը կիսատ է ստացել։ Նոյեմբերի 23-ին պետք է վճարվեր 63.000 դրամ, որը չի փոխանցվել։ Դեկտեմբերի 3-ին պետք է վճարվեր 180.000 դրամ, ստացել է 130 հազարը։

Ընտանիքը եկամտի այլ աղբյուրը գրեթե չունի։ Լիլիթը երկու անչափահաս երեխա է մեծացնում։ ՊՆ-ին այլևս չի պատրաստվում դիմել։

«Ավելի լավ է չխոսեմ, քան բարբաջանքները լսեմ։ Ոչ մի ստույգ տեղեկություն չեն տալիս։ Ասում են՝ սպասեք, մենք ոչ մի բան չգիտենք»։

Գերեվարված զինծառայողի կինը նշել է, որ տարբեր աղբյուրներից տեղեկություններ են ստացել, որ մոտակա օրերին գերության մեջ պահվող 11 զինծառայողները կվերադառնան։ Հստակ օր չի նշվում,պաշտոնական աղբյուրներն էլ տեղեկություններ չեն հայտնում։ Երկու օր առաջ մարզպետարանում հավաքվել են հարազատները՝ Կարմիր խաչի աջակցությամբ Բաքվում պահվող պայմանագրայինները տեսանյութ ու նամակ էին ուղարկել հարազատներին։ Տեսահոլովակները երկու-երեք րոպեանոց էին, ընտանեկան բնույթի։

«Մենք մարզպետարանից մի երկու օր առաջ նամակներ ու վիդեոներ ենք ստացել։ Կարմիր Խաչն է փոխանցել։ Հադիպումը մարզպետարանում է եղել։ Տղաները վիդեոներ են ուղարկել ու նամակներ ընտանիքներին։ Ամուսնուս նայելով նկատեցի, որ վիրակապեր չկային։ Ասում էր՝ լավ է, սպասում է մինչև հետ գա։ Տեսանյութը նկարահանված էր նորմալ կաբինետում»,- ասաց գերեվարվածի կինը։

Աղբյուր` Փաստինֆո