Փաստ ինֆո

Մենք երեք տարի շարունակ ունեցել ենք շատ ցածր կատարողականներ, իսկ մեր օրենքով, եթե կատարողականներին ավագաին դեմ է քվեարկում, ապա քաղաքապետի անվստահության հարցն է բարձրացվում։ Երեք տարի շարունակ սա տեղի չի ունեցել, նոր բերում են նման օրակարգ, սա է տարակուսանքը։ Այս մասին լրագրողների հետ զրույցում ասաց Երևանի ավագանու «Լույս» խմբակցության ղեկավար Դավիթ Խաժակյանը։ 

«Քաղաքացիների շրջանում տեսնում ենք, որ Մարությանն ունի աջակցություն և դրա հետ իշխանությունը պետք է հաշվի նստեր։ Մենք մեր գնահատականը տալիս ենք՝ կառավարման ցածր արդյունավետության, բայց իշխանությունը պետք է հաշվի նստեր։ Սա անհարմար պահ էր, մանավանդ, երբ նոր ավտոբուսներն արդեն եկել էին, Մարությանի վարկանիշը դրական էր։ Այս քայլերը, կարծում եմ, իշխանության համար խնդիրներ կառաջացնի»,- նշեց Խաժակյանը։

Նրա դիտարկմամբ՝ հետպատերազմյան շրջանում, երբ մթնոլորտը բացասական էր հիմնական բոլոր քաղաքական դերակատարների իմաստով, Մարությանը չէր մասնակցում ներքաղաքական գործընթացներին, ներքաղաքական գզվռտոցներին, իրեն դրական իմաստով՝ մի կողմում էր պահում։

« Մյուս կողմից գիտենք, որ Երևանի քաղաքապետի պաշտոնը քաղաքական պաշտոն է և իշխող ուժն ակնկալում է, որ հենց իրենց աջակցություն պետք է ցուցաբերեր բարձր վարկանիշ ունեցող մարդը, ինչը չի արվել և հիմա իրենք, կարծես թե, ազնիվ ասում են, որ պատճառը դա է՝ ներկուսակցական է, իսկ մենք ներկուսակցական վեճերի մեջ անելիք չունենք»,- ընդգծեց Խաժակյանը։

Աղբյուր` Փաստինֆո