Փաստ ինֆո

Նիկոլ Փաշինյանի գրառումը գործարք էր թուրքերին և ադրբեջանցիներին՝ «կպահեմ աթոռս, կանեմ ամեն ինչ» ձևակերպման ներքո: «Փաստինֆո»-ի հետ զրույցում ասաց «Հայաստան» խմբակցության պատգամավոր Ագնեսա Խամոյանը՝ արձագանքելով Նիկոլ Փաշինյանը վերջին գրառմանը, որտեղ նա հերթական անգամ մեղադրել էր ընդդիմությանը պատերազմում պարտության և իշխանության համար կռիվ տալու մեջ:

Ագնեսա Խամոյանի արձանագրմամբ՝ Նիկոլ Փաշինյանը շարունակում է մեղավորների փնտրտուքը պատերազմում պարտության մեջ՝ մեղավոր ճանաչելով բոլորին, բացի՝ իրենից:

Ըստ Խամոյանի՝ Փաշինյանի գրառման ենթատեքստից հասկանալի է, որ նա նոր փաստաթուղթ է ստորագրելու, որով անշրջելի կդառնա կապիտուլյացիոն առաջին փաստաթուղթը, այսինքն՝ որևէ բան այլևս փոխել հնարավոր չի լինի. «Այս ամենի համար Նիկոլ Փաշինյանի փորձում է համապատասխան ֆոն և մթնոլորտ ստեղծել: Տեսնում եք, որ ակտիվորեն սկսել են նոյեմբերի 9-ի գիշերը կառավարություն և իր առանձնատուն մտած քաղաքացիների գործերով որոշումներ կայացնել, սրանով փորձում է վախեցնել, վախի մթնոլորտ ստեղծել , ինչպես նաև մեղավորների նշանակել, որպեսզի հնարավոր երկրորդ փաստաթղթի դեպքում մատնացույց անի արդեն իսկ նշանակված մեղավորներին, մյուս կողմից էլ՝ փորձի կանխել և կառավարելի դարձնել մարդկանց զայրույթը, բայց ես կարծում եմ իրեն չի հաջողվի»,-ասաց պատգամավորը՝ հավելելով, որ Նիկոլ Փաշինյանը փորձում է համոզել և մոլորեցնել հասարակությանը, թե ինքը կապ չունի նոյեմբերի 9-ի փաստաթղթի հետ:

«Իր ողջ խոսույթը և ձևակերպումները դրան են միտված, նա փորձում է ընդամենը մեկ հարց լուծել՝ պահել իր աթոռը, իսկ այն, ինչ ես մատնացույց արեցի, դրա ածանցյալ նպատակներն են»,-ասաց Ագնեսա Խամոյանը: Նիկոլ Փաշինյանն իր գրառման մեջ ընդդիմադիր պատգամավորներին մեղադրել էր «արտաքին ուժերի հետ համագործակցելու մեջ»: Ընդդիմադիր պատգամավորը կոչ արեց Նիկոլ Փաշինյանին և իշխանական պատգամավորներին, եթե համապատասխան փաստեր ունեն, թող դիմեն իրավապահ մարմինններին:

«Թեման տաք պահելու համար՝ Նիկոլ Փաշինյանը նաև հանձնարարել է ՔՊ-ական պատգամավորներին ստատուսներ գրել, օրինակ Հայկ Կոնջորյանին, Վահագն Ալեքսանյանին: Ես անդրադարձել եմ Վահագն Ալեքսանյանի գրառմանը, որն ասում էր՝ ինչպե՞ս է Խամոյանը հայտարարում, որ Ռոբերտ Քոչարյանը եթե իշխանության լիներ, պատերազմ չէր լինի, դեռահսը երևի չի նկատել որ այդ ժամանակ ինքն ապրել է երրորդ հանրապետության ամենախաղաղ 10 տարիները, երբ Արցախը մերն էր, իսկ Հայաստանը՝ խաղաղ: Նիկոլ Փաշինյանը փողով հոդված գրող չէ, եթե ինքը ինչ-որ փաստերի և հանգամանքների է տիրապետում, պետք է խնդրեմ, որ հաղորդում տա իրավապահներին, կարող է անգամ չգնալ, այլ՝ զանգով հաղորդում տալ, նույնն էլ Վահագն Ալեքսանյանը:

Ո՞ւմ եք սպասում, պարոնա՛յք, թե գիտե՞ք, որ սուտ մատնության հերթական դեպքն է լինելու, օրինակ ինչպես Նիկոլ Փաշինյանն էր անուղղակիորեն մարդասպան անվանում Ռոբերտ Քոչարյանին, հետո դատարանում հայտարարեց, թե Ռոբերտ Քոչարյանին նկատի չի ունեցել, նույն վճիռն է սպասվում , դրա համար էլ փորձում են մարդկանց էմոցիաների վրա խաղալ: Ես համզոզված եմ, ՏԻՄ ընտրությունների պատկերն էլ ցույց է տալիս, որ մարդիկ արդեն դուրս են գալիս վշտից»,-ասաց Ագնեսա Խամոյանը:

Աղբյուր` Փաստինֆո