Փաստ ինֆո

Գերիների և անհետ կորած զինվորների հարազատներն այս պահին ակցիա են իրականացնում Կառավարության դիմաց՝ ԱԺ նախագահ Ալեն Սիմոնյանի սկանդալային հայտարարությունների առնչությամբ:

Անհետ կորած զինվորի հարազատ Արսեն Ղուկասյանը հայտարարեց, որ անթույլատրելի են համարում ԱԺ նախագահի կողմից գերիներին դասալիք անվանելը.

«Ազգային ախոռի դիրեկտոր Ալեն Սիմոնյանը հայտարարել է, որ մենք գերիներ չունենք: Իմ երեխեն արդեն 1 տարուց ավել է չկա, ո՞ւմ է ասում դասալիք, իմ երեխո՞ւն: Իմ երեխան մինչև վերջին փամփուշտը կռվել է, հիմա էլ հայտնի չէ՝ ուր է, իմ երեխեն էնքան բան է արել, որ իրենք բոլոր չեն կարող անել»,-ասաց անհետ կորած զինվորի հարազատը:
Արսեն Ղուկասյանն առաջարկեց գերերվարված և անհետ կորած զինվորների լուսանկարները փակցնել Հանրապետության Հրապարակի մոտակայքում.

«Այս տղաները երկրի համար կյանք են տվել, իրենց ամենաթանկն են տվել ու այս երկրում ամեն տեղ տեղ ունեն, ով կփորձի դրան ընդդիմանալ, ինձ հետ հարց կունենան»,-ասաց Ղուկասյանը:

Նա նաև հայտարարեց, որ մարզերից շուտով իրենց են էլի ծնողներ են միանալու:
«Նախապես չեմ հայտարարելու՝ ի՞նչ ենք պատրաստվում անել, անակնկալը կանեք, նոր կտեսնեն»,-ասաց Արսեն Ղուկասյանը:

Հիշեցնենք, որ տելեգրամյան ալիքներում Ալեն Սիմոնյանի մասնակցությամբ սկանդալային տեսանյութ է հրապարակվել, որտեղ նա մեղադրում է Բաքվում գտնվող հայ ռազմագերիներին՝ զենքը վայր դնելու և թշնամուն հանձնվելու մեջ. «Էդ գերիներին համարում եմ, որ արդեն իրանք չկան, իմ համար չկան»,-ձայնագրության մեջ ասում է Սիմոնյանը:

Աղբյուր` Փաստինֆո