Փաստ ինֆո

Ադրբեջանը կենտրոնացած է Սյունիքի վրա,որն իրենց համար ռազմավարական շատ մեծ նշանակություն ունի: Ադրբեջանական կողմի քայլերը, որին նպաստում են նաև մեր իշխանությունները, նպատակ ունեն՝ որքան հնարավոր է անվտանգային իրավիճակը վատթարացնել Սյունիքում և ստիպել, որ մեր գյուղերի բնակիչերը հեռանան իրենց տներից: «Փաստինֆո»-ի հետ զրույցում ասաց անվտանգության հարցերով փորձագետ Արմեն Մանվելյանը և շեշտեց, որ սահմանամերձ շրջաններում ինքնապաշտպանական ջոկատներ կազմելու կարիք կա.

«Այս հարցը վաղուց է բարձրացված, սահմանամերձ շրջաններում բնակիչներն իրենք ինքնապաշտպանություն են կազմակերպում, բայց իշխանությունը զենք չի ցանկանում տալ բնակիչերին, էլ չեմ ասում՝ այն կամավորական ջոկատների մասին, որոնք պատրաստ են այս գործն իրենց վրա վերցնել: Սա նաև ցույց է տալիս մեր պետության անկարողությունը և թուլությունը՝ մեր ժողովրդին պաշտպանելու հարցում»,-ասաց փորձագետը:

Հայաստանի, Ռուսաստանի և Ադրբեջանի ղեկավարների Սոչիում կայացած վերջին հանդիպման ընթացքում հստակեցվեց, որ առաջիկայում մեկնարկելու են սահմանագծման և սահմանազատման աշխատանքները:

Ըստ զրուցակցի՝ այս պայմաններում, երբ Ադրբեջանը ներխուժել է մեր տարածք, չի վերադարձնում մեր գերիներին, սահմանագծման գնալը «պետական դավաճանություն է»:

Արմեն Մանվելյանը վստահեցրեց, որ սահմանագծումը և սահմանազատումը անվտանգային ոչ մի հարց չի լուծելու.

«Չեմ հասկանում, այս գործընթացի օգուտը ո՞րն է հայկական կողմի համար, ենթադրենք, օրինակ՝ Վարդենիսում ինչ-որ հատված սահմանագծվեց, ինչ է՝ ադրբեջանցիները դադարելո՞ւ են կրակել, մեր գյուղացիներին անհանգստացնել, անասուններ գողանալ, ոչինչ էլ չի փոխվելու»,-ասաց զրուցակիցը և պնդեց, որ սահմանագծումը և սահմանազատումը բացարձակապես Ադրբեջանի շահերից բխող գործընթաց է, որը ոչ մի առնչություն չունի ՀՀ շահերի հետ և խնդիրների հետ:

Նիկոլ Փաշինյանը խնդրի լուծման մեկ այլ տարբերակ էր առաջարկել՝ այն է, կողմերը հայելային եղանակով զորքերը պետք է հետ քաշեն:

Արմեն Մանվելյանի արձանագրմամբ՝ «հայելային հետքաշման գաղափարը հիմարություն է, որը շարունակաբար կրկնում են մեր իշխանությունները.

«Ադրբեջանը չի էլ արձագանքում դրան, քանի որ անիմաստ է դրան պատասխանել: Պետք է հասկանանք, որ մենք և Ադրբեջանն այլևս հավասար հակառակորդներ չենք, քանի որ պարտված իշխանություն ունենք, հետևաբար՝ պետք է մոռանալ հավասար բանակցությունների, հայելային հետ քաշելու, խաղաղության դարաշրջանի մասին »,-ասաց Մանվելյանը:

Մինչ մեր իշխանությունները վստահեցնում են, որ Սյունիքով միջանցքի հարց չկա, Ադրբեջանի և Թուրքիայի նախագահները պնդում են, որ «Զանգեզուրի միջանցքի հարցը լուծված է», ՌԴ նախագահը ևս Սոչիում հանդիպման ժամանակ օգտագործեց միջանցք արտահայտությունը:

Արմեն Մանվելյանի դիտարկմամբ՝ Ադրբեջանը որոշակի ճանապարհի խոստում է ստացել, սակայն կարևոր չէ՝ ինչպես կանվանվի դա,.

«Եթե ճանապարհը տրվելու է, և դա չի լինելու մեր վերահսկողության տակ, այլ լինելու է երրորդ երկրի վերահսկողություն տակ, սա ինքնիշխանության կորուստ է: Ես վստահ եմ, որ ճանապարհի հարցում ամբողջ կռիվը գնում է նրա շուրջ՝ թե ո՞վ է վերահսկելու, սա բերելու է Հայաստանի ինքնիշխանության անկմանը և Սյունիքի դատարկմանը, Սյունիք Հայաստանից կտրելու գործընթացի սկիզբն է լինելու »,-ասաց Մանվելյանը:

Ըստ փորձագետի՝ եթե Հայաստանը համաձայնվի Սյունիքով միջանցք տրամադրել Ադրբեջանին, ապա ակամա կդառնա թուրք-ադրբեջանական աշխարհաքաղաքական շահերի սպասարկողը՝ առանց դրանից որևէ շահ ունենալու:

Արմեն Մանվելյանի արձանագրմամբ՝ իշխանությունների գործունեության հետևանքով Սյունիքի մի շարք ռազմավարական դիրքեր և ճանապարհներ անցել են Ադրբեջանի վերահսկողության տակ՝ մասնավորապես Գորիս-Կապանը:

Փորձագետը պնդեց, որ սա տնտեսական մեծ վնաս է ոչ միայն իրանական կողմի, այլ նաև՝ Հայաստանի համար.

«Իրանը կնախընտրի գնալ այն ճանապարհով, որի դեպքում կրկնակի վճարումներ չի անի: Այս ամենի նպատակը Հայաստանին հնարավորինս վնաս հասցնելն է, որն էլ ադրբեջանական կողմը սիստեմատիկ իրականացնում է, իսկ մեր իշխանությունները դա չնկատելու են տալիս, դրա հետ համակերպվել են և այդպես էլ ապրում են»,-ասաց Մանվելյանը՝ արձանագրելով, որ այս ամենի արդյունքում ստացվում է՝ «մենք մեր տարածքով՝ Գորիս-Կապան ճանապարհով, փոխադրումներ անելիս պետք է հարկեր վճարենք Ադրբեջանին.

«Իրենք ցանկացած մեքենա կարող են կանգնեցնել, ստուգումներ անել , գումարներ պոկեն: Հայաստանը խոսում է իբրև թե ապաշրջափակման մասին, բայց ավելի խորքային արտաքին և ներքին շրջափակման մեջ է հայտնվում »,-ասաց նա:

Աղբյուր` Փաստինֆո