Փաստ ինֆո

Հայաստանի Հանրապետական կուսակցության Արթիկի շրջանային կոմիտեի համակարգող, «Պատիվ ունեմ» դաշինքի պատգամավորության թեկնածու Սուսաննա Տոնոյանը կմնա ազատության մեջ։ Վերաքննիչ քրեական դատարանը՝ դատավոր Մհեր Արղամանյանի նախագահությամբ, անփոփոխ է թողել Սուսաննա Տոնոյանի նկատմամբ որպես խափանման միջոց ընտրված գրավը՝ մերժելով դատախազի միջնորդությունը։ Այս մասին «Փաստինֆո»-ն տեղեկանում է փաստաբան Միքայել Շխիմյանից։

Նշենք, որ Սուսաննա Տոնոյանը մեղադրվում է արտահերթ խորհրդարանական ընտրություններին մասնակցելու, կուսակցությունների դաշինքի օգտին կողմ քվեարկելու համար մի խումբ անձանց կաշառք տալու համար։ Քրեական գործով մեղադրանք է առաջադրվել ևս 11 անձի, որոնք մեղադրվում են ընտրակաշառք ստանալու մեջ։ Ըստ գործի տվյալների՝ ենթադրյալ ընտրակաշառքի գումարը կազմել է 10 հազար դրամ՝ յուրաքանչյուր ընտրողի համար։ Ամբաստանյալների մեծ մասը կանայք են։

Բացի դրանից, պարզվում է, որ քաղաքացիներից մեկը նաեւ խաբեությամբ հափշտակել է ընտրակաշառքի համար նախատեսած գումարը։ Նախաքննության վարկածով, քաղաքացի Գալոյանը, մտածելով, որ Շիրակի մարզի Սպանդարյան համայնքում կլինի 16 ընտրող, որոնք ընտրական իրավունքի ազատ իրականացմամբ կքվեարկեն «Պատիվ ունեմ» դաշինքի օգտին, երաշխավորել է, թե կարող է 16 ընտրողի կողմ ձայնն ապահովել ընտրությունների ընթացքում՝ Ս.Տոնոյանից պահանջելով 160 հազար դրամ՝ իբր նրանց բաժանելու համար։
2021թ. հունիսի 20-ին՝ ժամը 17-ի սահմաններում Շիրակի մարզի Հոռոմ գյուղի մոտ վերցրել է նշված գումարը և խարդախությամբ տիրացել դրան:

Ընտրակաշառք ստանալու մեջ մեղադրվող բոլոր ամբաստանյալների նկատմամբ որպես խափանման միջոց է կիրառվել ստորագրությունը՝ չհեռանալու մասին, իսկ Ս. Տոնոյանը և Ե.Գալոյանը նախաքննության ընթացքում կալանավորվել են։ Գործը դատարան ուղարկվելուց հետո Շիրակի մարզի ընդհանուր իրավասության դատարանը՝ դատավոր Նարեկ Բեգլարյանի նախագահությամբ, նրանց գրավի դիմաց ազատ արձակելու որոշում է կայացրել։

Պաշտպանության կողմը դատարանում բարձրացրել է այն հանգամանքը, որ Սուսաննա Տոնոյանը տարեց կին է, այրի, ունի առողջական խնդիրներ, ինչի հետևանքով ՔԿՀ-ում վերցվել է հաշվառման, շուրջ 30 տարի դասավանդել է տարբեր ուսումնական հաստատություններում, դրսևորել դրական վարքագիծ։ Բացի այդ՝ նախաքննության ընթացքում նրան կալանավորելու որոշում է կայացվել՝ բացառապես գործի քննությանը հնարավոր խոչընդոտման հավանականությունը հաշվի առնելով, մինչդեռ նախաքննության ավարտով պայմանավորված այդ ռիսկն էականորեն նվազել է, ավելին՝ Տոնոյանն ընդունել է առաջադրված մեղադրանքը։ Դատարանը որոշել է Սուսաննա Տոնոյանի նկատմամբ կիրառել գրավ՝ 3 մլն ՀՀ դրամի չափով։ Ինչ վերաբերում է Երջանիկ Գալոյանին, ապա վերջինիս նկատմամբ ևս կիրառվել է գրավը՝ 1 մլն դրամի չափով։

«Փաստինֆո»-ի հաղորդմամբ՝ մեղադրող դատախազ Աշոտ Ժամկոչյանը վերաքննիչ բողոք է ներկայացրել՝ պահանջելով վերացնել Տոնոյանին և Գալոյանին գրավի դիմաց ազատ արձակելու մասին որոշումը և կրկին կալանավորել վերջիններիս։ Օրերս Վերաքննիչ քրեական դատարանը քննել է վերաքննիչ բողոքները և մերժել դրանք։
Հ

եղինակ՝ Իզաբել Սահակյան

Աղբյուր` Փաստինֆո