Փաստ ինֆո

Իշխանությունների վարկանիշն ահավոր անկում է ապրում: Ես վստահ եմ, որ եթե հիմա համապետական ընտրություններ լինեն, ապա Նիկոլ Փաշինյանի քաղաքական ուժը բարձր տոկոսներ չի հավաքի:«Փաստինֆո»-ի հետ զրույցում ասել է քաղաքական վերլուծաբան Արմեն Բաղդասարյանը:

Երեկ Հայաստանի մի շարք համայնքներում տեղի ունեցան ՏԻՄ ընտրություններ, որի արդյունքում՝ իշխող քաղաքական ուժը Սյունիքում՝ Կապանում, հերթական ջախջախիչ պարտությունը կրեց, փոխարենը՝ հաղթեց Իջևանում և Ստեփանավանում:Հատկանշական է, որ իշխող քաղաքական ուժը հաղթել է այն տեղերում, որտեղ մասնակցության բավականին ցածր ցուցանիշ է գրանցվել, իսկ Կապանում, որտեղ մասնակցության ցուցանիշը 60%-ից ավել էր, ՔՊ-ն կրկնակի արդյունքով պարտվեց գործող համայնքապետ Գևորգ Փարսյանին:

Ըստ փորձագետի՝այն համայնքներում, որտեղ կազմակերպված դիմադրություն եղավ, ընդդիմությունը հաղթեց, իսկ այն տեղերում, որտեղ դիմադրություն չկար, իշխանությունը վերարտադրվեց.

«Կապանում մասնակցությունը մոտ 60% էր, իշխող կուսակցությունը ստացավ մոտավորապես 30 % ձայն, այսինքն՝ բոլոր ընտրողների 20%-ը, նույնն էլ եղավ մյուս տեղերում, որտեղ Նիկոլ Փաշինյանի կուսակցությունը հաղթեց, այնտեղ էլ ընտրողների 20%-ի ձայնը ստացավ, բայց քանի որ մասնակցությունը քիչ էր, հերիքեց այդ ձայները: Ստացվում է, որ այնտեղ, որտեղ ընդդիմությունն ունի ուժեղ թեկնածու և ուժեղ թիմ, կարողանում է մասնակցություն ապահովել, այնտեղ հաղթում է, իսկ բոլոր տեղերում, որտեղ, ի սկզբանե ,հասկանալի է՝ ինչով կավարտվի, մասնակցությունը շատ ցածր է, իշխող կուսակցությունն է հաղթում»,-ասաց Արմեն Բաղդասարյանը;

Մեզ հետ զրույցում փորձագետն արձանագրեց, որ ընդդիմությունն, առհասարակ, շատ պասիվ է համայնքային ընտրություններում. «ընտրողներին թողեց բախտի քմահաճույքին, թողեց մենակ՝ այս իշխանությունների դեմ», որի արդյունքում՝ այս իշխանությունների վերարտադրվելու համար կանաչ ճանապարհ բացվեց:

«Ընդդիմության մեղքը կա, կարելի էր համագործակցել, միանալ և այլ արդյունքներ կլինեին: Որևէ ուժ չի կարող միայնակ այս իշխանության դեմ արդյունավետ պայքարել, պետք է լինի միասնական ուժ, որը կհամախմբի բոլորին, այլ ելք չկա: ՔՊ-ն առանձին-առանձին բոլոր ուժերին կարող է հաղթել՝ հաշվի առնելով իր վարչական լծակները, իսկ եթե ընդդիմությունը համախմբվի, ապա կհաղթի՝ ինչպես դա եղավ Կապանում»,-ասաց Բաղդասարյանը:

Նկատենք, որ իշխող քաղաքական ուժը Սյունիքից արդեն երկրորդ «ապտակն է ստանում»՝ ջախջախիչ պարտություն կրելով Կապանում և Գորիսում:

Արմեն Բաղդասարյանի արձանագրմամբ՝ Սյունիքը մերժում է իշխող քաղաքական ուժին, քանի որ սյունեցին իր մաշկի վրա է զգում այս իշխանության գործունեության արդյունքը.

«Նիկոլ Փաշինյանն իր քարոզչության ժամանակ շեշտը դնում է սոցիալական խնդիրների վրա, բայց Սյունիքում առաջանային են անվտանգային խնդիրերը, ինչն առայժմ չկա Տավուշում, Լոռիում, բայց, ակնհայտ է , որ վաղը այս նույն խնդիրները լինելու են նաև Տավուշում, Նոյեմբերյանում: Սա խոսում է մեր հասարակության կարճատեսության մասին և այն մասին, որ միասական պետության գաղափար չկա, շատերին թվում է՝ Սյունիքի խնդիրը միայն Սյունիքի խնդիրն է, բայց այդպես չէ»,-ասաց զրուցակիցը և հավելեց՝ «Եթե մի իշխանություն ասում է, որ մոտավոր պատկերացումներ ունի Հայաստանի սահմանների վերաբերյալ, բնականաբար, թշնամին էլ պետք է գա և իր մոտավոր պատկերացումներով կանգնի այնտեղ, որտեղ հարմար է գտնում: Վաղ թե ուշ, սա իրենց մաշկի վրա զգալու են ոչ միայն Սյունիքում, այլ Երևանում և այլ մարզերում են զգալու: Ցավոք սրտի, մեր ժողովուրդն այնքան հեռատես չի, որ դա անմիջապես տեսնի, բայց ժողովուրդը կամաց-կամաց տեսնում և հասկանում է ամեն բան, դրա համար էլ իշխող կուսակցության վարկանիշը նվազում է»:

Ըստ փորձագետի՝ հունիսի 20-ի արտահերթ ընտրություններից հետո հասարակությունը մեծապես հիասթափված է թե՛ իշխանությունից, թե՛ ընդդիմությունից.

«Արտահերթ ընտրություններից ընդամենը վեց ամիս է անցել, բայց Նիկոլ Փաշինյանի վարկանիշը կտրուկ անկում է արձանագրել: Ընդդիմությունից ևս հիասթափված են,մարդիկ գնացին, ձայն տվեցին ընդդիմությանը, բայց արդյունքում այդ ուժերը մտան խորհրդարան և իրենց բավականին պասիվ են պահում, հասարակությունն իրենցից այլ ակնկալիքներ ունի»,-ասաց Արմեն Բաղդասարյանը:

Աղբյուր` Փաստինֆո