Փաստ ինֆո

«Մարտի 1»-ի գործով մեղադրյալ Գեղամ Պետրոսյանն առողջական վիճակի հետ կապված պետք է Հայաստանից դուրս գար, և ՀՔԾ-ն թույլատրեց նրան դուրս գալ երկրից։ «Փաստինֆո»-ին այս մասին ասաց փաստաբան Վաղարշակ Գեւորգյանը։

Նրա փոխանցմամբ՝ Գեղամ Պետրոսյանն արդեն վերադարձել է։

Ավելի քան երկու տարի առաջ ՀՔԾ-ն հայտարարեց, թե, իբր, բացահայտել են 2008 թվականի մարտի 1-ին արձանագրված 10 մահվան դեպքերից մեկը եւ հրազենի գործադրմամբ Զաքար Հովհաննիսյանին դիտավորությամբ կյանքից զրկելու համար մեղադրանք է առաջադրվել 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, շտաբի պետի պաշտոնը զբաղեցրած Գեղամ Պետրոսյանին։ Իսկ 2019 թվականի հունիսի 7-ին հայտնի դարձավ, որ դատարանը բավարարել է նրան կալանավորելու միջնորդությունը։

Զաքար Հովհաննիսյանը հրազենային վնասվածք է ստացել որովայնի շրջանում՝ Մաշտոցի պողոտայի մոտակայքում՝ 2008 թվականի մարտի 1-ի ուշ երեկոյան՝ Մակարով տեսակի ատրճանակի արձակված կրակոցի հետեւանքով։

Գ.Պետրոսյանին մեղադրանք առաջադրելու մասին հայտարարելով ՀՔԾ-ն այդպես էլ չէր մանրամասնել, թե արդյոք սպանությունը կատարվել է տաբելային զենքով եւ արդյոք հանցագործության գործիք հանդիսացած ատրճանակը հայտնաբերվել է։ Հետագայում արդեն պարզ դարձավ, որ զենքը չի հայտնաբերվել, հետեւաբար չկա որեւէ ապացույց, որ Գ.Պետրոսյանին ամրակցված զենքով է արձակվել կրակոցը, որով Զ.Հովհաննիսյանին պատճառվել է կյանքի համար անհամատեղելի վնասվածք։

ՀՔԾ-ի կեղծ փուչիկը պայթեց, երբ ընդամենը երկու ամիս անց՝ 2019 թվականի օգոստոսի 4-ին, Գ.Պետրոսյանն ազատ արձակվեց Երևան-Կենտրոն քրեակատարողական հիմնարկից, քանի որ լրացել էր կալանքի երկամսյա ժամկետը, իսկ նախաքննական մարմինը՝ ՀՔԾ-ն, ժամկետը լրացնելու միջնորդություն չէր ներկայացրել։

Նրա հետ կապված արդեն երկու տարի է, ինչ որևէ քննչական գործողություն չի կատարվել։

«Գործը կարճելու միջնորդություն ներկայացրել եմ, բայց առայժմ ինչ-որ հանգամանքներ պարզելու համար միջնորդության քննարկումը հետաձգվել է։ Սպասում ենք՝ տեսնենք ինչ հանգամանքներ պետք է պարզեն։ Եթե գործողություններ ունեն անելու, գուցե կհրավիրեն»,- «Փաստինֆո»-ին ասաց Վաղարշակ Գեւորգյանը։

Աղբյուր` Փաստինֆո