Փաստ ինֆո

Կա «ճանաչում՝ հանուն փրկության» գաղափար, ես հատուկ չեմ ասում «անջատում՝ հանուն փրկության» գաղափար, որպեսզի այն չհակադրվի ինքնորոշման իրավունքի հետ: Այս մասին խորհրդարանում քննարկման ժամանակ ասաց «Հայաստան» խմբակցության պատգամավոր Արմեն Ռուստամյանը և հետաքրքրվեց ԱԳ փոխնախարար Վահե Գևորգյանից՝ քննարկվո՞ւմ է «ճանաչում հանուն փրկության» բանաձևը:

ԱԳ փոխնախարարն էլ, արձագանքելով պատգամավորին, ընդգծեց՝արցախահայությունը չի կարող ապրել ադրբեջանական վերահսկողության ներքո, քանի որ փաստացի գնում է բնաջնջման քաղաքականություն.

«Այն, ինչ տեղի ունեցավ Արցախյան առաջին և երկրորդ պատերազմների ընթացքում, հստակ ցույց է տալիս, որ արցախահայությունը չի կարող ապրել ադրբեջանական վերահսկողության ներքո , քանի որ փաստացի գնում է բնաջնջման քաղաքականություն: Դրա լավագույն ապացույցն այսօր Ադրբեջանի վերահսկողության ներքո գտնվող տարածքներում հայերի իսպառ բացակայությունն է»,-ասաց Վահե Գևորգյանը և, դիմելով Արմեն Ռուստամյանին, հավելեց.

«Ձեր ասած սկզբունքն այդ փաստով հստակ հիմնավորում է ստանում: Ես կարծում եմ, որ այն մոտեցումը, որ արցախահայությանը Ադրբեջանի վերահսկողության ներքո սպառնում է ոչնչացում, այդ ճշմարտացի, հուսալի և վստահելի թեզը մենք առաջ ենք մղում թե՛ մեր դիսկուրսում, թե՛ բանակցությունների ընթացքում»,-ասաց ԱԳ փոխնախարարը:

Աղբյուր` Փաստինֆո