Փաստ ինֆո

Կդժվարանամ պնդել, որ Էրդողանի հայտարարությունն իր մեջ ամբողջապես ապատեղեկատվություն է պարունակում։ «Փաստինֆո»-ի հետ զրույցի ժամանակ այս մասին ասաց Ադրբեջանի հարցերով փորձագետ Գառնիկ Դավթյանը՝ անդրադառնալով Էրդողանի այն հայտարարությանը, թե Ադրբեջանի նախագահ Իլհամ Ալիևը ՀՀ վարչապետ Նիկոլ Փաշինյանի հետ խոսակցություն է ունեցել, որի ընթացքում օրակարգ է բերվել տարածաշրջանում «3+3» ձևաչափ ստեղծելու հարցը։

Գառնիկ Դավթյանը նկատեց՝ փաստ է, որ «3+3» ձևաչափն այսօր առարկայական առաջարկ է, և Ռուսաստանը, Վրաստանը, Իրանը, Թուրքիան ու Ադրբեջանն այս առումով դիրքորոշում ունեն և սպասում են Հայաստանի պատասխանին։

Ընդ որում՝ փորձագետը հատկանշական է համարում, որ վերջին շրջանում, մասնավորապես 2018թ.-ից հետո պատերազմ սկսելու մասին, բանակցություններում հայկական կողմի ոչ կառուցողական լինելու հետ կապված տեղեկությունները գալիս էին ադրբեջանական կամ թուրքական լրատվականներից, որոնք որոշ ժամանակ հետո հաստատվում էին։

«Ինչ վերաբերում է Էրդողանի ասածին, ապա այն երկու տեսանկյունից կարող ենք դիտարկել։ Առաջինը՝ թուրքական աշխարհը փորձում է Եվրոպային համոզել, որ տարածաշրջանում խաղաղության փուլ է սկսվել, և երկու պետությունները՝ Ադրբեջանն ու Հայաստանն իրար հետ լեզու են գտել և կարիք չկա արտաքին ուժերի ճնշման մասով։ Այսինքն՝ փորձ է արվում զսպել Եվրոպայի տրամադրվածությունն ընդդեմ Ադրբեջանի»,-նշեց Գառնիկ Դավթյանը։

Վերջինս հավելեց՝ հստակ չի կարող ասել Փաշինյանի և Ալիևի միջև նման խոսակցություն եղել է, թե ոչ, բայց չի էլ բացառում, որ այդ ձևաչափի քննարկում լինի, քանի որ Ադրբեջանը բարձրաձայն հայտարարում է դրական ազդակների մասին։

«Վարչապետն այսօր ինչ հայտարարություն անում է, դրա հակառակն է տեղի ունենում։ Ինչ-որ պոպուլիստական, ականջ շոյող հայտարարություններ է անում։ Հիմա նրանք խուսափում են որևէ պատասխանից, քանի որ իրենք էլ հստակ չգիտեն՝ «3+3» ձևաչափում Հայաստանն ինչ օգուտներ կունենա։ Մարտահրավերները բազմաթիվ են, խնդիրներն էլ այնքան շատ են, որ հայկական կողմից չի պարզաբանվում, թե դա ինչ ձևաչափ է, իր մեջ ինչ է ներառում»,-ասաց փորձագետը։

Գառնիկ Դավթյանի խոսքով թուրքական կողմն ավելի շատ է շահագրգռված այս ձևաչափի ստեղծմամբ։ Փորձագետը ենթադրում է, որ այդ ձևաչափը հնարավորություն կտա, որ թուրքական տնտեսական էքսպանսիան Կովկասում էլ ավելի լավ ներդրվի և աստիճանաբար նաև կազդի Հայաստանի ներքաղաքական գործընթացների վրա։

Աղբյուր` Փաստինֆո