Փաստ ինֆո

Մարդականց աչքերին «թոզ են փչել», քաղաքացիները մտածել են՝ ընտրում են «Բալասանյան դաշինքին», հետո պարզվել է, որ նրանց միանում է ՔՊ-ն և կառավարումը համատեղ են իրականացնելու: Արդյունքում ընտրեցին հաճելի սուրճ խմելու տարբերակը: Այս մասին «Փաստինֆո»-ի հետ զրույցում ասաց 7-րդ գումարման ԱԺ պատգամավոր Սոֆյա Հովսեփյանը:

Հիշեցնենք, որ թեև հոկտեմբերի 17-ին Գյումրու ՏԻՄ ընտրություններում «Քաղաքացիական պայմանագիր» կուսակցությունը պարտվել էր,սակայն ընդամենը երկու օր առաջ «Քաղաքացիական պայմանագիր»-ը և ընտրություններում հաղթած «Բալասանյան դաշինքը» համագործակցության հուշագիր ստորագրեցին, արդյունքում՝ Գյումրիում կառավարումը այս երկու քաղաքական ուժերը կիրականացնեն համատեղ:

Ըստ ԱԺ նախկին պատգամավոր Սոֆյա Հովսեփյանի՝ կա՛մ քաղաքական ուժերի միջև նախապես պայմանավորվածություն է եղել, կա՛մ էլ ՔՊ-ին հաջողվել է ինչ-որ միջոցներով ճնշել «Բալասանյան» դաշինքին.

«Եթե ճնշման արդյունք է,ապա ինչո՞ւ են պայմաններ ստեղծել, որ իրենց ճնշեն: Նախադրյալներ կան, որ ճնշվել են, բացթողումներ են ունեցել, ինչի հետևանքով էլ իշխանությունը կարողացել է ճնշել: Ես կարծում էի, նրանք կհարգեն իրենց քաղաքացիներին և չեն գնա նման գործարքների, բայց, փաստ է, որ քաղաքացիների նկատմամբ հարգանքը դարձել է 100-րդ ական»,-ասաց ԱԺ նախկին պատգամավորը՝ հուշագրի ստորագրումը գնահատելով անարդար վերաբերմունք՝ քաղաքացիների ընտրության նկատմամբ.

«Քաղաքացիներն ունեին ՔՊ-ին ընտրելու հնարավորություն, բայց ընտրեցին «Բալասանյան» դաշինքին, արդյունքում՝ Գյումրի քաղաքի կառավարման մեջ դերակատարում կունենա նաև ՔՊ-ն, ինչը դեմ է քաղաքացիների որոշմանը»,-ասաց նա:

Սոֆյա Հովսեփյանի փոխանցմամբ՝ քննարկվում է, որ Գյումրիում փոխքաղաքապետերը պետք է լինեն ՔՊ-ականներ.

«Եթե համախոհություն էին ուզում, ապա շատ ավելի արդար կլիներ, որ «Բալասանյան» դաշինքի թեկնածուն լիներ քաղաքապետ, իսկ փոխքաղաքապետերը լինեին նաև մյուս ընտրված դաշինքներից՝ օրինակ « Զարթոնք»-ից, մյուսը «Ապրելու երկրից» լիներ, պետք է բոլորին ներգրավեին, ոչ թե գնային և միավորվեին ՔՊ-ին և արդյունքում այսպիսի իրավիճակ ունենային»:

Այսօր «Բալասանյան» դաշինքի թեկնածու Վարգես Սամսոնյանն ընտրվեց Գյումրու քաղաքապետի պաշտոնում:

Ըստ Սոֆյա Հովսեփյանի՝ վերջինս միակ թեկնածուն էր, որ բավականին ընկալելի էր գյումրեցիների կողմից.

«Քաղաքացիները դրական կարծիք ունեն նրա մասին, բոլորը խոսում են, որ աշխատող, իր գործն իմացող անձնավորություն է, ինչը չէին ասում ՔՊ-ի ցուցակի որևէ անդամի մասին»,-ասաց նա:

Մամուլում լուրեր են շրջանառվում, որ «Քաղաքացիական պայմանագիր» խմբակցության արդեն նախկին պատգամավոր Նազելի Բաղդասարյանը օրերս նշանակվելու է Շիրակի մարզպետ, վերջերս էլ նա հրաժարվել է պատգամավորական մանդատից:

Մեզ հետ զրույցում Սոֆյա Հովսեփյանը նշեց, որ հստակ տեղեկություն չունի այդ մասին, բայց «այն, որ մանդատը վայր է դրել, խոսում է նրա մասին, որ հնարավոր է նշանակվի մարզպետի պաշտոնում»

«Այլ պատճառ դժվար թե լինի մանդատը վայր դնելու:Կարծում եմ, մոտ օրերս արդեն տեսանելի կլինի՝ ի՞նչ է նախապատրաստված իր համար:Այսօրվա քաղաքական պրոցեսների մեջ ես ոչինչ չեմ բացառում, էական չէ՝ տվյալ անձը կարող է, չի կարող, էական է,որ քաղաքական թիմը կամ կոալիցիա կազմած ուժերն այդպես են ուզում, եթե ուզեցին՝ էլ որևէ մեկի կարծիք հաշվի չի առնվում»,-ասաց Սոֆյա Հովսեփյանը:

Աղբյուր` Փաստինֆո