Փաստ ինֆո

Խորհրդարանում «Քաղաքացիական պայմանագիր» խմբակցության պատգամավոր Արթուր Հովհաննիսյանի ելույթից հետո իրավիճակը կրկին լարվեց, այն բանից հետո, երբ պատգամավորն ընդդիմադիր խմբակցություններին որակեց «ռևանշիստական ուժեր».

«Մենք անդադար նույն ցիկլի միջով ենք անցնում: Այստեղ գալիս են խորհրդարանում ներկայացված ընդդիմադիր ուժերը, բայց իմ խորին գնահատմամբ՝ ռևանշիստական ուժերը և խոսում են բովանդակային հարցերին»,-ասաց Հովհաննիսյանը:

ՔՊ-ական պատգամավորի ելույթին տեղից արձագանքեցին «Հայաստան» խմբակցության ղեկավար Սեյրան Օհանյանը, այնուհետև ընդդիմադիր մի քանի պատգամավորներ:

Ինչին ի պատասխան Արթուր Հովհաննիսյանն ասաց.

«Եկեք՝ դուք բոլորով, ես՝ մենակ: Ելույթ եմ ունենում, սա քաղաքական թիվ մեկ ամբիոնն է։ Ես կոչ եմ անում հարգել այս ամբիոնը, լռե՛ք երբ ես ելույթ եմ ունենում»,-ասաց Հովհաննիսյանը, ինչից հետո ընդիմադիրներին սպառնաց՝ «ռեալ կյանքում կարող է իրենց համար շատ վատ հետևանքներ լինեն».

«Խորհրդարանում ներկայացված ռևանշիսատական ուժերը բովանդակության հետ կապված միշտ խնդիրներ են ունենում, նրանք փորձում են իրենց մտքերը համեմել իրականության հետ կապ չունեցող հայտարարություններով: Բոլորը ձեզ տեսնում են, լսում են և մարդիկ մեկ վայրկյանում բացահայտ գնահատական տալիս են ձեր խոսքին, որոնք էլ իրենց հետևանքն են ունենում ռեալ կյանքում:

Երեկ շատ վտանգավոր արտահայտություն հնչեց Գեղամ Մանուկյանի կողմից, պրն Մանուկյանի կողմից սա ավանդույթ է դարձել, երբ լեզուն մտքից առաջ է ընկնում: Ի՞նչ է նշանակում ասել՝ որ անկախության օրվա միջոցառմանը ժողովուրդը բաժանվել էր երկու մասի՝ մի մասը ժողովուրդն էր, մի մասն էլ անհասկանալի մարդիկ էին, որոնք նստած էին հրապարակում: Դուք գիտեիք, որ այդ հրապարակում նստած էին զոհված զինծառայողների հարազատներ, վիրավոր զինծառայողներ և պատերազմի մասնակից մարդիկ:

Դուք հասկանու՞մ եք ինչ եք ասում այդ մարդկանց, հասկանու՞մ եք, որ ռեալ կյանքում սա կարող է ձեզ համար շատ վատ հետևանքներ ունենալ»,-ասաց Հովհաննիսյանը:

Աղբյուր` Փաստինֆո